Faasoa Lelei Au Tupe

O LE faaupuga “O tupe o le aʻa o mea leaga uma,” e masani ona faasino atu i le Tusi Paia. Ae o le faamatalaga moni a le Tusi Paia: “O le manaʻo i tupe, o le pogai lea o mea leaga uma lava.” (1 Timoteo 6:10, King James Version) O nisi tagata ua tosina atu i tupe, ma ua tuuina atu o latou ola i le faaputuina o ʻoa. Ua avea nisi ma pologa i tupe, ma ua oo ai ni āuga mataʻutia iā i latou. Peitaʻi, pe a pulea lelei, e mafai ona avea tupe ma meafaigaluega aogā. Ua faapea mai le Tusi Paia, “e tele faafitauli e foʻia e tupe.”—Failauga 10:19, Holy Bible—Easy-to-Read Version.

E ui e lē o faapea mai o le Tusi Paia o se tusi o loo talanoaina ai mataupu tautupe, ae o loo iai ni fautuaga aogā e mafai ona fesoasoani iā te oe e faasoa lelei ai au tupe. O vala e lima ia o loo mulimuli mai e masani lava ona fautuaina e tagata faufautua tautupe ma o loo ōgatusa na fautuaga ma mataupu silisili ua leva ona faamauina i le Tusi Paia.

Sefe. Ua faaalia mai i tala o loo i le Tusi Paia, sa aʻoaʻoina tagata Isaraelu i le tāua o le sefe. Na faatonuina i latou e tuu ese le sefuluaʻi (po o le 10 pasene) i tausaga taʻitasi ina ia faaaogā patino i le auai atu ai i tausamiga faaleatunuu. (Teuteronome 14:22-27) Sa faalaeiauina foʻi e le aposetolo o Paulo ia uluaʻi Kerisiano ina ia tuu ese se tupe e sefe i vaiaso taʻitasi, ina ia mafai ai ona latou foaʻi atu i uso talitonu o loo manaʻomia le fesoasoani. (1 Korinito 16:1, 2) O le toʻatele o faufautua tautupe, e latou te faalaeiauina le sefe. Ia faamuamua le sefeina o tupe. Pe a maua lou totogi, ia teu loa i le faletupe po o se isi nofoaga malupuipuia, le aofaʻiga o loo e manaʻo e sefe. O le a fesoasoani lenā tulaga iā te oe e ʻalofia ai le toe faaaogāina o lenā tupe.

Faasoa lelei. E na o le pau lenei o le auala aogā e iloa ai ona pulea lelei tupe, ma faaitiitia ai tupe faaalu. O le faasoa lelei, e mafai ona e iloa ai le mea o loo alu i ai au tupe, ma e mafai ai ona fesoasoani iā te oe e ausia ou sini tautupe. Ia iloa au tupe maua, ma ia faaitiitia tupe faaalu nai lo o tupe maua. Ia iloa le eseesega o mea manaʻomia ma mea e manaʻo ai. I nei vala, na fautuaina ma le poto e Iesu lana ʻaufaalogologo ‘ia faitau tupe faaalu’ a o leʻi faia se galuega. (Luka 14:28) Ua fautuaina i tatou e le Tusi Paia, ina ia ʻalofia le faia o aitalafu e lē talafeagai.—Faataoto 22:7.

Fuafua lelei. Ia iloilo lelei ou manaʻoga mo le lumanaʻi. O se faataʻitaʻiga, pe a e fuafua e faatau sou fale, o le faia o se aitalafu i se tului talafeagai, atonu o se faaiʻuga lelei lenā. I se tulaga talitutusa, e manaʻomia e le tamā o le aiga ona totogiina ni inisiua mo le ola, soifua mālōlōina, ma le afāina i ni faalavelave, ina ia puipuia ai ē e pele iā te ia. O le iloiloina o ou manaʻoga mo le lumanaʻi, e ono aofia ai le fuafua pe a e mālōlō mai galuega. Ua faamanatu mai e le Faataoto 21:5 iā i tatou, “o mafaufauga o ē filigā i galuega, na o le mau mea e iʻu i ai.”

Ia aʻoaʻoina. Ia teu tupe mo oe lava, ina ia maua ai ou tomai ma tausia ai lou soifua mālōlōina i le tino ma faalogona. O tupe teu nei,  o le a e maua ai le tele o aogā. Ia avea le aʻoaʻoina ma au masani i lou olaga atoa. Ua matuā faatāua e le Tusi Paia le “poto ma le mafaufau [lelei],” ma ua faalaeiauina i tatou ina ia atiaʻe pea na tomai.—Faataoto 3:21, 22; Failauga 10:10.

Paleni. Ia iloa pulea au tupe. Ua tele suʻesuʻega ua faaalia mai ai, e sili atu le fiafia o tagata e naunau i isi tagata nai lo o tupe. Ua lē paleni tulaga o isi ona o le matapeʻapeʻa. E faapefea? Pe a uma ona faamalieina o latou manaʻoga, ona latou saʻilia lea o le tele o le ʻoa. Peitaʻi, pe e toe manaʻomia e se tagata nisi mea e sili atu pe afai ua iai meaʻai, lavalava, ma le fale? E lētioa a faapea mai le tusitala o le Tusi Paia o loo taʻua i le amataga o le mataupu e faapea: “Afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.” (1 Timoteo 6:8) O le atiaʻe o le lotomalie, e taofia ai i tatou mai le atiina aʻe o le manaʻo tele i tupe, faatasi ai ma le tele o faafitauli e aumaia e na mea.

O le manaʻo tele i tupe, o le pogai lea o le tele o mea leaga. Afai e te faatagaina, o le a pule tupe iā te oe. Ae peitaʻi, pe a fuafua lelei, e mafai e tupe ona maua ai lou saʻolotoga e saʻilia ai mea e sili atu ona tāua i le olaga, e pei o se faiā vavalalata ma le aiga, uō, ma le Atua. Peitaʻi, i lenei lalolagi, e foliga mai e matuā lē mafai lava ona saʻoloto se tasi mai i le popole i tupe. Po o avea pea tupe ma puna o sea popolega? Po o iai se faamoemoe o le a faaiʻuina le mativa? O le a taliina nei fesili i le faasologa faaiʻu o lenei mataupu.

[Faamatalaga faaopoopo i le itulau 21]

Ia iloa pe e fia lou totogi, ma ia itiiti ifo le tupe faaalu i le tupe maua

[Faamatalaga faaopoopo i le itulau 21]

Ia iloa le eseesega o mea e manaʻomia ma mea e manaʻo i ai

[Faamatalaga faaopoopo i le itulau 22]

E ese mai ai i meaʻai, lavalava ma fale, o ā nisi mea e toe manaʻomia moni e se tagata?

 [Pusa/Ata i le itulau 23]

AʻOAʻO LAU FANAU E FAASOA LELEI A LATOU TUPE

Ona o le toʻatele o tagata matutua ua oo iai faigatā tau seleni, ua timaʻi mai tagata atamamai i mātua ina ia aʻoaʻoina le fanau e faatatau i tupe, ma ia vave amata. Pe a e fesili atu i le toʻatele o tamaiti po o fea e maua mai ai tupe, atonu e latou te tali mai, “O loʻu Tamā” po o “le faletupe.” Pe a mafai ona e aʻoaʻoina lau fanau i le aogā o le tupe, le auala e faaeseese mai ai mea e manaʻo ai ma mea e manaʻomia, le auala e sefe ai, ma le auala e faaalu ai tupe, e mafai ona fesoasoani iā i latou ina ia ʻalofia le tele o tigā ona o le tele o aitalafu ma le pologa i faiga faapisinisi. O nisi nei o fautuaga.

1. Ia avea oe ma faaaʻoaʻoga lelei. E tele ina faataʻitaʻi e le fanau au gaoioiga nai lo o au tala.

2. Ia faatapulaa tupe faaalu. Ia talanoa pe fia le tupe e mafai ona e faaalu, ae fia foʻi le tupe e latou te faaaluina. Ia iloa ona fai atu e leai, ma ia tausisi i ai.

3. Ia faataga i latou e faasoasoa le tupe. Pe afai e maua so latou alauni po o se tupe mai se galuega, ia tuuina atu iā i latou ni taʻiala. Ona tuu lea o le avanoa e latou te faia ai ni faaiʻuga.

4. Ia aʻoaʻo e tufa atu. Ia faalaeiauina lau fanau e tufa atu a latou mea i isi, aemaise ia fai ma masani le tuuesea o se mea e faamamaluina ai le Atua.