Ua Suia le Manatu o se Faiaʻoga

▪ I nai tausaga ua mavae, na fesili atu ai se faiaʻoga i le aai o Batumi i le atunuu o Georgia, ina ia tusi mai se lisi o Tulafono e Sefulu. Na ofo le faiaʻoga i se tasi o ana tamaitiiti aʻoga e igoa iā Ana, ina ua ia toe faalau mai ma le saʻo le faasologa o le tulafono. Sa ia taliina foʻi nisi o fesili mai i le Tusi Paia i se auala mataʻina. Na matuā ofo le faiaʻoga, ma fesili atu, pe faapefea ona ia iloa nei mea e tele. Ina ua tali atu Ana o loo ia suʻesuʻe le Tusi Paia ma Molimau a Ieova, na taofi o ia e le faiaʻoga ma faapea atu, ou te faapea lava aʻu ia, ua soona faamamafa e Molimau a Ieova o latou talitonuga.

I se isi taimi, na fai atu ai le faiaʻoga i tamaiti e tusi mai se tala i le olaga i Georgia, ma faafitauli eseese o loo feagai ma le atunuu. I le faaiʻuga o lana tala, na tusi ai e Ana e faapea: “E so o se taumafaiga a tagata e faaleleia mea o loo matuā faalētonu, e mautinoa lava e lē taulau, auā o loo faapea mai le Ieremia 10:23, ‘E lē o i le tagata lona ala, e lē o i le tagata e savali ona faatonuina le mea e ui ai o ia.’ E na o le Malo lava o le Atua o le a faaleleia tulaga o mea uma.”

O le aso na sosoo ai, na viiviia ai e le faiaʻoga i luma o le vasega atoa le tala a Ana ma faapea atu: “Ou te fiafia i le maoaʻe o le galuega a Ana, lea na ia tusia i ana lava upu. Na ia faamatala mai ai le auala o le a suia ai tulaga o mea i le lalolagi.” Sa fiafia foʻi le faiaʻoga i le amio a Ana ma viiviia o ia i luma o le vasega atoa, ona o lana amio lelei, ma ona laʻei onomea.

Ina ua asiasi atu Molimau a Ieova i le fale o le faiaʻoga, sa ia faapea atu, na ia manatu ua latou soona faamamafa o latou talitonuga, a ua suia lona mafaufau ona o Ana lea e iai i lana vasega. I le 2007, na auai faatasi ai le faiaʻoga ma Molimau a Ieova i le Faamanatuga o le Maliu o Iesu Keriso, ma na ia faalogologo lelei i le polokalame.

Ina ua uma le Faamanatuga, na ioe le faiaʻoga o Ana e faapea, na matuā maofa o ia ona o le iloa lelei e Molimau a Ieova o le Tusi Paia. I le taimi lenei, o loo suʻesuʻe ai e lē aunoa o ia ma Molimau i le Tusi Paia. E lē taumatea, o le a fetalaʻi lou mafaufau e pei o lenei faiaʻoga, ma uunaʻia oe e iloilo talitonuga o isi ma a latou amioga. Aiseā e lē talosaga atu ai i se tasi o Molimau a Ieova mo sau lesona faale-Tusi Paia i lou aiga e aunoa ma se totogi?

[Ata i le itulau 13]

Ana a o tusia lana tala