Mātua Ia Puipui Lau Fanau!

UA TALAFEAGAI ona fesili ifo mātua e faapea, “Aiseā ua tele ai talavou e inu nanā fualaau?” E tele māfuaaga. O nisi talavou e mananaʻo ia fiafia. O isi e manatu e faaleleia ai le faia o mea aʻoga ma teʻa ai le popole. A o isi, e mananaʻo e faateʻa ai le tigā ona o loo mafatia le tino po o faalogona. O le mea moni, e oo lava i tamaiti e taʻi 12 tausaga ua popoto e nanā le faaaogāina o fualaau e faatonu mai e fomaʻi, atonu e ota fualaau e ala i le Initaneti ona e faitau afe kamupani e mafai ona maua mai ai e aunoa ma le masalosalo o se isi. Ae o isi ua faatau mai uō. O le ā se mea e fai e oe le matua e puipui ai lau fanau?

Ia talanoa lelei i lau fanau i lamatiaga o le inu fualaau, pe faatonu mai e le fomaʻi pe leai. Ia teu lelei fualaau pe loka i se sefe po o se kapoti. Ia e iloa po o ā tou fualaau o iai, ma siaki le tele o faaaogā. Afai e lē toe manaʻomia  se fualaau, tiaʻi i se mea e lē toe maua ai. Afai ua uma le tale o lau tama ae o loo inu pea lana vai, fesili i ai pe aiseā. Ma siaki ana polokalame o faaaogā i le Initaneti ma mea o alu i ai ana tupe, faapea ana meli e lafo mai. Ae ia e mataala pe a sui ana uō, pe sui lau vaai i ona foliga, ma lana amio, pe faalētonu foʻi ona togi i le aʻoga.

Pe a Faaaogā Sesē Fualaau e Lau Tama

O le ā e fai pe afai e te masalosalo o loo faaaogā sesē e lau tama fualaau? Ia talanoa ma le alofa i lau tama e tusa o lou popolega. Ua faapea mai le Tusi Paia: “O mafaufauga i le loto o le tagata, o vai loloto ia, a o le tagata e iai le faautaga loloto, e na te utufia mai ai.” (Faataoto 20:5, The New American Bible) Ua faatusaina au taumafaiga ia iloa le mea moni mai lau tama i le taumafai e sisi aʻe se pakete vai i se maea e motugofie. Atonu o le a motu le maea o le lua fesootaʻiga ma lau tama pe a e tuuaʻia pe otegia o ia ona o lou ita. Ia manatua, e valalua le ʻauga o lau taumafaiga. Muamua, o loo e fia iloa po o ia faaaogā sesē fualaau. Lona lua, afai o lea, o ā māfuaaga o lona faia faapea? O loo taʻua i lalo ni māfuaaga ua ala ai ona ia faia faapea.

▪ Uō lē Lelei ma Omiga mai Isi. Ua fai mai le 1 Korinito 15:33: “Aua neʻi faasesēina outou. O aumea leaga e faaleagaina uiga lelei.” (The New English Bible) O lea la, o mātua atamamai, e fesoasoani i a latou fanau ia iloa le mataʻutia o aumea leaga, o ē e mafai ona taaʻina i latou. Ae i le isi itu, e fesoasoani mātua iā latou fanau ina ia iloa ona filifili ni uō lelei. (Faataoto 13:20) Atonu e aogā ona valaaulia e mātua uō e lelei i o latou fale, pe tafafao faatasi ma a latou fanau.

 ▪ Omiga. E tele naʻuā uunaʻiga ina ia taulau i lenei lalolagi, ma e lagona e fanau le mafatia pe a soona uunaʻi e mātua. Po o e malamalama i mea e lelei ai lau fanau ma o latou vaivaiga? Po o talafeagai sini ua e faatutū mo i latou ma fesoasoani ia latou ausia? Po o e taumafai e ʻalofia le faatusatusa o fanau i isi ma lē faatigā ai iā i latou? Pe afai e lē o maua i aiga le fiafia ma le alofa lea e manaʻomia e fanau, o le a ō atu e suʻe i se isi mea. E taumafai foʻi mātua popoto ina ia iai i o latou aiga se siʻomaga e faatāuaina mea faaleagaga, i le faitau faatasi lea o le Tusi Paia ma a latou fanau. Na faapea mai Iesu Keriso: “E fiafia o ē naunau i mea faaleagaga.”—Mataio 5:3.

▪ Tuufau. Ua faaaogā sesē fualaau e nisi fanau ona ua tuufau e o latou mātua. Ua faapea mai le Faataoto 29:15: “A o le tama [po o le teine] ua tuulafoaʻiina, e tupu ai le mā o lona tinā.” O le mea moni, e ui ina e pei e faatautee mai fanau ae e latou te talisapaia aʻoaʻiga e manino ma latou te lagona ai le saogalemu ma le alofagia. O lea, ua faalaeiauina ai e le Tusi Paia mātua ina ia faataatitia taʻiala e aogā i fanau ma fai se faaaʻoaʻoga lelei. (Efeso 6:4) O loo faalaeiau mai foʻi e le Tusi Paia le maumauaʻi ma ia tausi i lau upu. “Ia avea la outou upu o le Ioe, ia Ioe, ma le Leai, ia Leai.”—Iakopo 5:12.

O le mea moni afai e te iloa o loo faaaogā sesē e lau tama i fualaau, e aogā ona talanoa i se fomaʻi po o ē e iai tomai i lea tulaga. E lē faigofie ona tuu lea masaniga ma e manaʻomia ai le fesoasoani a se tagata e poto faapitoa. Ae afai e Molimau a Ieova lou aiga, ia saʻili atu i le fesoasoani a toeaina o le tou faapotopotoga. (Iakopo 5:13-16) E mafai e nei tane ua agavaa faaleagaga ona fesoasoani iā te oe e faatatauina taʻiala o le Tusi Paia ma vave ai ona toe faaleleia le faafitauli.

O le a talanoaina i mataupu e sosoo mai ni taʻiala faaopoopo, faapea le faamoemoe matagofie mo le lumanaʻi.

[Faamatalaga faaopoopo i le itulau 7]

“O mafaufauga i le loto o le tagata, o vai loloto ia, a o le tagata e iai le faautaga loloto, e na te utufia mai ai.”—Faataoto 20:5 New American Bible

[Pusa i le itulau 7]

MEA E ILOA AI TALAVOU UA FAAAOGĀ SESĒ FUALAAU

▪ E iai se isi o lona aiga sa faaaogā sesē le ʻava malosi po o fuālaau ma isi mea

▪ Mafatia pe e lagona e leai sona aogā

▪ E lagona e ese i latou ma isi ma e lē fiafia i ai isi

▪ E masani ona faapalupē; ma faigatā ona moe

▪ E faatautee, ma faamisa i ē e pule *

[Faaopoopoga i lalo]