Le Manatu o le Tusi Paia

Ae ā pe a Nonofo Muamua a o Leʻi Faaipoipo?

PE E te faatauina se peleue po o se ofu a o leʻi faataʻitaʻi muamua? Ailoga. Auā afai e faatau muamua ae mulimuli faataʻitaʻi ae lē ofi, ua maʻimau lou taimi ma lau tupe.

E faapena le manatu o le toʻatele o tagata i faaipoipoga. E latou te manatu e sili le nonofo muamua a o leʻi faia se tautoga e avea o se ulugalii. O lo latou manatu, ‘A iai se faalētonu e faigofie lava ona teteʻa.’

Atonu ua manatu faapena nisi ona ua vaai o faileaga se isi ē la te masani e lona toʻalua. O loo vaai foʻi i le leaga o ulugalii ae lē fealofani. O lea, ua manatu ai o se mea poto le nonofo a o leʻi faaipoipo.

O le ā le vaaiga a le Tusi Paia? Seʻi o tatou iloilo muamua le mea o loo taʻua i le Afioga a le Atua e tusa o le faaipoipoga, ona iloa ai lea o le tali.

“Tino e Tasi”

O le pule a Ieova le Atua na faavaeina ai faaipoipoga ma ua uunaʻia ai i tatou e le Tusi Paia ia faamamaluina. (Kenese 2:21-24) Na fuafuaina e le Atua i le amataga ia avea le tane ma lana avā o le “tino e tasi.” (Kenese 2:24) Na sii mai e Iesu le vaega lea i le Tusi Paia ma toe faapea mai: “O ē ua faatasia e le Atua, aua neʻi tuueseeseina e se tagata.”—Mataio 19:6.

E moni, e iai faaipoipoga ua toe tatala. * Ae e lē faapea ai e leaga le faaipoipo, ae ona ua lē taulau se tasi o le ulugalii, po o i laʻua uma, e ola e tusa ai ma le la tautoga.

O se faataʻitaʻiga: Seʻi faapea e fai se taavale a se ulugalii, ae e lē o vaaia faalelei e tusa o faatonuga mai lē na faia. Afai e leaga le taavale, o ai e tuuaʻia? O lē na faia, po o le ulugalii e ana le taavale?

E faapena foʻi taʻiala mo faaipoipoga. Pe a faatatauina taʻiala o le Tusi Paia e le ulugalii ma taumafai e faaleleia o la faafitauli, e ʻalofia ai le tatalaina o le faaipoipoga. O loo lagona e i laʻua uma le sologa lelei o le la ulugalii ona o loo taufai galulue uma e faatumauina. Ona avea ai lea o le faaipoipoga  ma faavae o se mafutaga fealofani.

‘Ia Faamamao Mai le Faitaaga’

Ae atonu e manatu nisi: ‘Aiseā e lē nonofo muamua ai? Pe e lē lelei le faataʻitaʻi ona nonofo muamua a o leʻi faaipoipo, ma faaalia ai le ava i le faatulagaga tau i faaipoipoga?’

O loo manino le tali a le Tusi Paia. Na tusi Paulo: “Ia faamamao mai i le faia o le faitaaga.” (1 Tesalonia 4:3) O le faaupuga “faitaaga” e faasino i feusuaʻiga a o leʻi faaipoipo. E aofia ai le feusuaʻi o ē e nonofo a o leʻi faaipoipo. E tusa ai ma le Tusi Paia, e sesē ona nonofo faatasi se ulugalii a o leʻi faaipoipo, e tusa lava pe fuafua e faaipoipo mulimuli.

Po o lona uiga ua lē toe aogā le Tusi Paia i aso nei? Atonu o le manatu lenā o nisi. Ona i le tele o atunuu, o le nonofo faatasi e tusa pe fuafua e faaipoipo pe leai, o se mea e masani ai. Ae seʻi tagaʻi i le mea lea e tupu. Po o latou maua ai se fiafia? Po o sili lo latou fiafia i ulugalii ua faaipoipo lelei? Pe a faaipoipo ulugalii sa nonofo muamua, po ua sili atu lo latou faamaoni? E faaalia mai i suʻesuʻega, o le tali e leai. O le mea moni, o ulugalii na nonofo muamua ae faaipoipo mulimuli, e tele feeseeseaʻiga ma e oo foʻi ina teteʻa.

Atonu e fai mai nisi e lē o saʻo lelei na suʻesuʻega. Ua faapea mai se tagata poto: “O ē filifili e faaipoipo muamua e ese o latou mafaufauga mai i ē filifili e nonofo muamua a o leʻi faaipoipo.” Ua faapea mai o ia, e lē o le nonofo le vala tāua, ae o le “faatāua o le faaipoipoga.”

O na manatu, ua faamamafa mai ai le tāua o le iai o le vaaiga a le Atua e tusa o le faaipoipoga. Ua faapea mai le Tusi Paia: “Ia faamamaluina e tagata uma le faaipoipoga.” (Eperu 13:4) Pe a tautō se alii ma se tamaʻitaʻi e avea ma tino e tasi ma faaaloalo i le fuafuaga o le faaipoipoga, ua iā i laʻua se fusi e lē faigofie ona motusia.—Failauga 4:12.

Pe a fua atu i le faatusatusaga i le amataga e faatatau i le faatauina o se ofu, e talafeagai le faataʻitaʻi muamua a o leʻi faatauina. Peitaʻi, e lē mafai ona faatatau lea manatu i le nonofo muamua a o leʻi faaipoipo. Ae ia lava muamua le taimi e faamasani ai i lē o e fia faaipoipo i ai. O se vala tāua lenei e masani ona galo ae o se auala e maua ai le aiga fiafia.

[Faaopoopoga i lalo]

PO O E TAUMĀNATU EA I NISI TAIMI?

▪ Aiseā e na o ulugalii faaipoipo o loo faataga e le Tusi Paia ona feusuaʻi?—Salamo 84:11; 1 Korinito 6:18.

▪ O ā uiga e ao ona iai i lē e te fia faaipoipo i ai?—Ruta 1:16, 17; Faataoto 31:10-31.

[Pusa i le itulau 29]

“UA AGASALA O IA I LONA LAVA TINO”

Ua faapea mai le Tusi Paia: “O lē e faaauau ona faitaaga, ua agasala o ia i lona lava tino.” (1 Korinito 6:18) I tausaga ua teʻa atu nei, ua faamaonia le moni o ia upu ona o le faitau miliona o ē ua maliliu ona o le AIDS ma isi faamaʻi e maua e ala i feusuaʻiga. Ae e lē pau ai i inā. Ua faaalia mai i suʻesuʻega, o talavou e feusuaʻi ae leʻi faaipoipo, ua tele ai le mafatia ma le taumafai e pule i le ola. Ua avea foʻi le feusuaʻi solo ma mea e maʻitaga ai ae lē manaʻomia. Pe a fua i ia mea moni, e lē faapea ua lē toe aogā taʻiala a le Tusi Paia e tusa o amio.