E Mafai Ona E Taulau o se Matua Nofo Toʻatasi

UA FAASOLO ina faaitiitia aiga e toʻalua mātua e iai. Seʻi mātau mai: E silia ma le 13 miliona mātua nofo toʻatasi i Amerika, ma e toʻatele i tinā. Ua iloa mai suʻesuʻega, e tusa ma le ʻafa o fanau i lea atunuu o le a ola aʻe i se aiga e na o le tasi le matua.

Afai o oe o se matua nofo toʻatasi, ia e mautinoa, e mafai ona taulau lou aiga. Ia faatino manatu nei.

▪ Ia suia manatu lē lelei i manatu lelei. Ua faapea mai le Tusi Paia: “O aso uma o lē ua mafatia e leaga; a o lē ua lelei lona loto, e fai e lē aunoa lana faigaʻai.” (Faataoto 15:15) E moni atonu e lē sologa lelei aso uma. Ae e pei ona taʻua i le mau, e lē o meafaitino e maua ai le fiafia ae o le saʻo o le vaaiga. (Faataoto 17:22) E lē aogā lou manatu e faapea ua faalētonu lau fanau ma lou aiga. Ona e faavaivaia ai oe ma atili ai ona faigatā ona fai ou tiute o se matua.—Faataoto 24:10.

Fautuaga: Tusi i lalo ni faaupuga lē lelei o e faia e faatatau iā te oe ma lou aiga, ona tusi lea i autafa o se faaupuga lelei e sui aʻi. O se faaaʻoaʻoga, sui le faaupuga “Ua faigatā tele le olaga” i le faaupuga “Ou te mafaia uma oʻu tiute o se matua e nofo toʻatasi, ma ou te maua le fesoasoani ou te manaʻomia.”—Filipi 4:13.

▪ Faasoa lelei au tupe. E sili ona afāina mātua nofo toʻatasi i faafitauli tau tupe. Ae, o nisi taimi, e ono faigofie faafitauli pe a  faasoa lelei au tupe. Ua taʻua i se faataoto o le Tusi Paia: “O lē ua iai le utaga mamao e na te iloa atu le mala ma lafi ai.” (Faataoto 22:3) E tāua le fuafua lelei ma le manatunatu mamao ina ia ʻalofia ai “mala” ona ua faalētonu le faasoa.

Fautuaga: Fai se lisi o mea e faaaogā i ai tupe. Faamaumau mea e faaaogā i ai tupe mo le masina e iloa ai mea o alu i ai tupe. Fuafua lelei mea o faaalu i ai au tupe. Po o tele ina aitalafu au faatau? Pe e te faatauina mea e faafiafia ai lau fanau ona e na o outou e leai se tamā? A faasolo ina malamalama tamaiti i tupe, talanoa faatasi i auala e sefe ai tou tupe. O se toleniga lelei lea mo i latou. Ma atonu e iai foʻi ni o latou manatu lelei i lea tulaga!

▪ Talanoa faalelei ma lou toʻalua muamua. Afai o oulua uma e paʻū i ai le tausiga o le fanau, o lou taufaaleaga o lou toʻalua muamua i tamaiti, pe fai i tamaiti e taʻu atu mea o fai e lou toʻalua, e lē lelei. * E sili le galue ia maua se faiā lelei ma lou toʻalua muamua e tusa o le aʻoaʻiina o fanau po o se isi vala mo lo latou lelei. Ua faapea mai le Tusi Paia: “Afai e mafai iā te outou, ia nonofo filemu ma tagata uma,” e aofia ai ma lou toʻalua muamua.—Roma 12:18.

Fautuaga: O se isi taimi e tupu ai se feeseeseaʻiga ma lou toʻalua muamua, ia lua feutagaʻi e pei o tagata e faigaluega faatasi. I taimi o galuega, e te taumafai e faaali uiga lelei i tagata uma, e oo lava i ē e te lē fiafia i ai. Ia faapena ona fai lou toʻalua muamua. E ui ina lua feeseeseaʻi, ae ia lē avea ma mea e pisa ai.—Luka 12:58.

▪ Ia avea ma faaaʻoaʻoga lelei. Ia fesili ifo e faapea: ‘O ā mea e faatāua, ma uiga ou te manaʻo ai i laʻu fanau? Po o ou faaalia na uiga?’ O se faataʻitaʻiga, e ui ina e nofo toʻatasi, pe e tele lava ina e fiafia? Pe e avea ou faafitauli ma mea e te manatu ai ua lē lelei lou aiga? Po o e lagona pea le ita i lou toʻalua muamua? Po o mafai ona e fesagaʻia tulaga faigatā e ui e leai se mea e mafai i ai? (Faataoto 15:18) O nei tulaga e lē faigofie, ma e lē mafai foʻi ona taulimaina atoatoa. Peitaʻi o auala e te taulimaina ai, o le a faataʻitaʻi i ai lau fanau.

Fautuaga: Ia tusi i se pepa uiga e tolu e te manaʻo e iai i lau fanau pe a matutua. * Tusi i autafa o le pepa mea e te faia i le taimi nei e fai ai se faaaʻoaʻoga lelei mo lau fanau e tusa o lea uiga.

▪ Ia fuafua lou malosi. Ona o le pisi o le olaga, e faigatā ai ona lava lau mālōlō ma fai mea e te fiafia ai. Ae faaeteete ina neʻi e afāina ai! E tāua le vaai faalelei o lou itu “faaleagaga”! (Mataio 5:3) Ia manatua, e lē mafai ona alu se taavale pe a leai se penisini. O lea, a lē lava lau mālōlō, e tele mea e lē mafai ona e faia.

E iai foʻi le “taimi e ʻataʻata ai” ma le “taimi e osooso ai ma le fiafia.” (Failauga 3:4) E lē o se faamaʻimau taimi le faafiafia. E faafouina ai lou malosi ma maua ai le fiafia e faia ai ou tiute o se matua nofo toʻatasi.

Fautuaga: Talanoa ma isi mātua nofo toʻatasi i auala e maua ai taimi e mālōlō ai. A o ‘e faamautinoa mea e sili ona tāua,’ manaia ae sema sou taimi e fai ai se mea e te fiafia i ai. (Filipi 1:10) Tusi i lalo se mea o e manaʻo e fai ma le taimi e fai ai.

[Faaopoopoga i lalo]