Tala i Aiga Taulau—Vaega e Lua

E pei ona taʻua i “Tala i Aiga Taulau—Vaega 1,” i taimi faigatā, e maua e aiga le fesoasoani mai taʻiala o le Tusi Paia. * Ua folafola mai e Ieova le Atua i ē e ola e tusa ma ana tapulaa e faapea: “Ou te foaʻi atu iā te oe le tofā mamao, ma faatonu oe i le ala e ao ona e savali ai. Ou te fautua atu foʻi ma ou vaai iā te oe.”—Salamo 32:8.

Feagai ma Faafitauli Tautupe. E masani ona avea tupe ma māfuaaga autū o faafitauli o aiga. Ae e aogā taʻiala o le Tusi Paia e toe mafaufau lelei ai aiga i lea tulaga. Na faapea mai Iesu: “Aua tou te toe popole i o outou ola i mea tou te aai ai pe inu ai, po o outou tino i ofu tou te oofu ai. . . . Ua silafia e lo outou Tamā o i le lagi, o mea uma ia o loo outou manaʻomia.”—Mataio 6:25, 32.

I le itulau e 23, o loo faamatala e Issachar, o se tamā mai Amerika, le auala na fesagaʻia ai e lona aiga le utiuti o le seleni ina ua faaleagaina e le Afā o Katrina lo latou fale.

Pe a maʻi se isi o le aiga. O tagata uma lava e mamaʻi. Ma e masani ona e lē umi se maʻi ae toe malosi. Ae ā pe a maʻi faaumiumi se isi o le aiga? Ua faapea mai le Tusi Paia, e lagolagoina e Ieova i latou o mamaʻi. (Salamo 41:1-3) E faapefea ona avea le aiga ma auala e ala mai ai le tausiga a Ieova?

I le itulau e 24, ua faamatala ai e Hajime, o se tane Iapani, le galulue faatasi ma lana fanau teine e tausi Noriko le tinā o le aiga, ina ua maua i se maʻi faigatā.

Pe a maliu se tasi o le fanau. O se tulaga e sili ona faanoanoa ai se aiga, o le maliu lea o se tamaitiiti. Ua folafola mai e Ieova o le a ia soloiesea loimata uma e māfua i le maliu o se tamaitiiti. (Faaaliga 21:1-4) O loo ia saunia mai foʻi faamāfanafanaga mo ē faanoanoa i le taimi nei.—Salamo 147:3.

I le itulau e 25, o loo faamatala ai e Fernando ma Dilma, o se ulugalii Amerika, le auala na faamalosia ai i laʻua e ala i le Tusi Paia ina ua maliu le la pepe teine.

Ua avea le Tusi Paia ma taʻiala maufaatuatuaina mo aiga o feagai ma faafitauli, e pei ona faaalia mai i tala o sosoo mai.

[Faaopoopoga i lalo]

 [Pusa/Ata i le itulau 23]

Feagai ma Faafitauli Tautupe

Faamatalaina e Issachar Nichols, mai Amerika

“Na faaleaga e le Afā o Katerina lo matou fale, na o le simā o le faavae na totoe. E atoa le masina ma le ʻafa o lolovaia le aʻoga ou te faiaʻoga ai.”

I LE taumāfanafana o le 2005, na matou nonofo ai ma loʻu toʻalua o Michelle, ma le ma tama teine e lua tausaga o Sydney i Bay St. Louis, Mississippi, i Amerika. O i matou o Molimau a Ieova ma sa ma sini ma Michelle ia tele so ma sao i le galuega talaʻi. Sa ou faiaʻoga i tagata matutua, ma e lata le aʻoga ou te faiaʻoga ai i New Orleans, Louisiana. Na mafai ona ou faigaluega mo aso e tolu, ae o isi aso o le vaiaso e aʻoaʻo ai isi e faatatau i le Tusi Paia. Sa ma fiafia lava i le ma faasologa. Ae ina ua taʻu mai i talafou o le a agi le Afā o Katerina, na matou tapena loa e ō ese.

E uma aʻe le afā, ua malepe lo matou fale i Bay St. Louis, faapea le aʻoga ou te faiaʻoga ai i New Orleans. Na maua le tupe mai le inisiua ma le malo mo se isi mea e matou te nonofo ai, ae na faigatā ona maua saʻu galuega tumau. Na maua foʻi loʻu toʻalua i se maʻi e māfua mai vai. Ua lē mafai e lona tino ona puipuia o ia mai faamaʻi, ma na mulimuli ane maua i le maʻi o le West Nile virus, e māfua mai i namu. O le taimi lea ua taugatā lava le tau o le soifuaga faapea ma le inisiua.

Sa lē soona faaalu vale a matou tupe ae fua i le tulaga ua iai le olaga. Ou te leʻi filifili galuega foʻi, ae sa ou talia so o se galuega.

E moni, ina ua faaleaga e le afā a matou mea, na faigatā lea tulaga. Ae e faafetai ona o loo matou ola pea. Ma ua faatāua mai ai i le mea na tupu le gata o le aogā o mea faitino. Na faamanatu mai ai upu a Iesu: “Aua e lē ola se tasi i le tele o ana mea ua iā te ia.”—Luka 12:15.

Na matou iloa ai foʻi, e ui ina leaga lo matou tulaga, ae e iai isi e sili atu ona leaga, ma ua leiloloa ai o latou ola. O se tasi lenā o māfuaaga ina ua uma le afā, sa ou pisi e fesoasoani i isi, ma faamāfanafana i ē mafatia ona ua faaleagaina pe toesea nisi o o latou aiga.

I lea vaitaimi faigatā, na matuā faamāfanafanaina i matou i le Salamo 102:17. Ua faapea mai, o Ieova, “e liliu mai lava o ia i le tatalo a ē ua aveesea a latou mea uma. E lē inosia foʻi e ia la latou tatalo.” Ua iloa lelei e lo matou aiga lona lagolagosua mai!

[Pusa/Ata i le itulau 23]

Ina ua mavae le Afā o Katerina ma Rita lea na taia ai le Gulf Coast o Amerika i le 2005, na vave lava ona faamautū e Molimau a Ieova nofoaga autū mo fesoasoani e 13, o fale teu mea e iva, ma pamu penisini e fā. E toeitiiti atoa le 17,000 o tagata tauofo Molimau a Ieova mai Amerika ma isi atunuu e 13 na fesoasoani i galuega toe faaleleia. E faitau afe fale sa latou toe faaleleia.

 [Pusa/Ata i le itulau 24]

Pe a Maʻi se Isi o le Aiga

E pei ona faamatalaina e Hajime Ito, mai Iapani

“O se mea e ma te fiafia ma Noriko e fai faatasi a o leʻi maʻi, o le kuka. A o lenei ua lē mafai ona ia ʻai, inu, ma tautala. Ua tele lava ina nofo i le nofoa faataavalevale ma e manaʻomia le masini e mānava ai.”

IĀ Me 2006, na faasolo ai ina lē mafai e loʻu toʻalua ona tautala. E oo ane i le taimi o le taumāfanafana, ua faigatā ona ʻai ma inu. I le masina o Setema, na fai mai fomaʻi, o lona gasegase, e faasolosolo ona aafia ai neula o le faiʻai ma le maea ario. I le fā masina, na suia atoa ai le olaga o le matou aiga. Ae ua na o se amataga na o ona faafitauli.

Na oo ina malō le laulaufaiva ma le lima taumatau o Noriko. Na taoto lona manava e faaalu atu ai le faagaʻau e fafaga ai, ona sosoo ai lea ma le taoto o lona faaʻī e tuu i ai le faagaʻau e mānava ai, ma lē toe mafai ai ona tautala. E mautinoa lava le faigatā o lea mea iā Noriko ona o se tagata e gaoioi. E Molimau a Ieova lo matou aiga, ma sa galulue faatasi Noriko ma le ma fanau teine i le galuega talaʻi faataimi atoa. Ae o lea ua faataotolia o ia ma manaʻomia se masini e mānava ai.

Ae e leʻi taofia ai Noriko mai le talaʻi atu! O se faataʻitaʻiga, e auai o ia i sauniga i lona nofoa faataavalevale e faapipii i ai lana masini. Ua faalētonu foʻi lana faalogo, ma e tusi mata tetele e le ma tama mea o fai mai i le sauniga mo ia. Ma e ui ua tuu le galuega faataimi atoa a Noriko, ae o loo tusitusi pea i tagata e uiga i le faamoemoe mai le Tusi Paia, e ala i le faaaogā o mea faapitoa i lana komepiuta.—2 Peteru 3:13; Faaaliga 21:1-4.

E matou te tausia faatasi Noriko. Na suʻe ni galuega fou a le ma fanau teine e toʻalua auā se taimi faaopoopo mo feʻau i le fale. E matou te faia faatasi feʻau sa masani ona fai e Noriko i le fale.

Pe a ou vaai iā Noriko i nisi taimi i le taeao, e foliga lē lavā. Ma ou te faapea ifo, ‘Ou te manaʻo e fai i ai e mālōlō i lenei aso.’ Ae o loo manaʻo pea Noriko e taʻu le feʻau o le Tusi Paia i isi. E pupula fiafia mai pe a ou kīina lana komepiuta! Ma a faasolo ina fai ana tusi, e maua ai lona malosi. Ua ou iloa le aogā o le ‘tele pea o mea e fai i le galuega a le Alii.’—1 Korinito 15:58.

I le Awake! 2006, o loo iai le tala a Jason Stuart, na aogā iā Noriko ia lē lotovaivai ai ona e tutusa o la maʻi. O le mea moni, na fia iloa e fomaʻi le māfuaaga o le fiafia o Noriko, ma na matou faamatala i ai le mataupu lea ma ave i ai ni kopi. Ua matuā faalaeiauina lava loʻu toʻalua ona o le aʻoaʻoina o isi i le upu moni.

Ua atoa le 30 tausaga talu ona ma faaipoipo ma Noriko, ae i le tolu tausaga talu ona maʻi, ua ou talisapaia le tele o mea sa ou lē amanaʻia muamua e uiga iā te ia. O ia o se avā lelei tele!

 [Pusa/Ata i le itulau 25]

Pe a Maliu se Tasi o le Fanau

E pei ona faamatalaina e Fernando ma Dilma Freitas, mai Amerika

“E leai ni upu e faamatalaina ai le tigā pe a maliu se tasi o le fanau. E lē mafaatusalia le faigatā o lea tigā.”

NA MALIU le ma tama teine o Precious iā Aperila 16, 2006. E na o le sefulu aso na ola ai. Na iloa e iai se faalētonu tele i lona fatu, i le masina lona tolu o loʻu maʻitaga. A o lalata le taimi e fanau ai, na iloa ai e na o ni nai aso e ola ai. Sa faigatā ona matou talia lea mea. Ona e toʻatolu le ma fanau e malolosi uma. E ma te leʻi talitonu o le a oti si a ma pepe lea.

Ina ua fanau mai Precious, na taʻu mai e se fomaʻi e faapitoa i sela o le tino, e maua Precious i le maʻi o le Trisomy 18, e na o le 1 mai le 5,000 pepe e maua ai. Na manino mai e lē umi se taimi e ola ai Precious. Na matou lagona le leai o se mea e matou te mafaia. Pau o lea, o le faaaogā lelei o lo matou taimi ma ia a o ola. Ma o le mea lenā na fai.

E faafetai ona na maua ni aso se sefulu e matou te faatasi ai ma Precious. I lenā taimi, o i matou ma le ma fanau teine e toʻatolu, na matou faamasani ai ma ia. Na matou siiina, talanoa, fusi, ma sogi iā te ia, ma e tele ona ata na puʻe. Sa matou talanoa foʻi po o ai o i matou e soo i ai. E lē misi se aso e asiasi mai ai le fomaʻi faapitoa iā i matou. E matou te fetagisi faatasi ma e na te taʻu mai lona faanoanoa ona ua leai se mea e mafai. A o talanoa mai iā i matou, na ia tusia se ata o Precious, e manatua ai o ia, ma aumai se kopi mo i matou.

E Molimau a Ieova lo matou aiga, ma e matou te talitonu atoatoa i le aʻoaʻoga a le Tusi Paia, o le a toe faia e le Atua le lalolagi ma parataiso ma o loo naunau o ia ia toe faatūina mai i latou ua maliliu, e aofia ai ma pepe e iai Precious. (Iopu 14:14, 15; Ioane 5:28, 29) E matou te fiafia ona e sau le taimi e matou te toe opoina ai o ia. E matou te fiafia pe a faalogo o taʻu le “parataiso!” Ae i le taimi nei, e faamāfanafanaina i matou i le iloa, o loo manatua e le Atua Precious ma e lē o toe iai ni ona tigā.—Failauga 9:5, 10.