Tala o Mea Tutupu i le Lalolagi

▪ “E tusa ma le tasi vaetolu o teine i Amerika e totō a o leʻi aulia le 20 tausaga.”—CENTERS FOR DISEASE CONTROL AND PREVENTION, U.S.A.

▪ Na faia se suʻesuʻega i Amerika o alii e 420 ua “faileagaina e o latou aiga,” ma e “tusa o le toʻa 3 mai i le toʻa 10 o i latou ua fasiina pe sauāina.”—AMERICAN JOURNAL OF PREVENTIVE MEDICINE.

Tele Gagana e Iloa?

E toʻatele mātua e fefefe neʻi avea le iloa e a latou fanau o se isi gagana ma mea e galo ai le latou gagana. Ae ua faapea mai Laura-Ann Petitto, o se saienitisi i Toronto, Kanata, e lē moni lenā mea. Ua fai mai o ia: “O sela na e fanau mai ma oe . . . ua sauni e aʻoina gagana ma e tele gagana e mafai ona aʻoina.” I aʻoga, e sili atu ona lelei tamaiti e lua gagana i lo o ē e tasi le gagana. Peitaʻi, ua taʻua i le pepa Toronto Star, “e ao i mātua ona tausolomua e aʻoaʻo se gagana lona lua i fanau laiti pe afai e latou te mananaʻo ia maua aogā o le iloa o gagana e lua.”

E Ōia Mafaufau o Fanau i Ata Leaga

Ua faatupulaʻia le laiti o fanau e matamata i ata leaga ma sauā i vitiō i le Initaneti. Ua taʻua e Heinz-Peter Meidinger, o le taʻitaʻifono o le asosi Siamani o ē tomai i gagana, o tamaiti e 12 tausaga ma sili atu, e iloa suʻe le mea e maua ai polokalame o ata sauā ma ata leaga. Atonu e foliga e lē o popole i ai fanau, ae loo ōia ai ma afāina ai. Ua uunaʻi mai e Meidinger mātua ia latou iloa mea o mafaufau i ai fanau ma mea o loo iai iā latou komepiuta.

Sauniuni Neʻi Tatala le Faaipoipoga

Ua taʻua i se pepa i Sini, ua tele tagata i Ausetalia ua fai tuutuuga faaletulafono a o leʻi faaipoipo, e tusa ma aiāiga i ē e faaipoipo i ai. O ia tuutuuga, o loo taʻua ai le auala e vaevae ai meafaitino a se ulugalii pe a teteʻa. O le tele o ia tuutuuga ua faamanino mai ai le auala e ola ai le ulugalii ina ia mau le la faaipoipoga. O mea e aofia i nei tuutuuga, e faamanino ai po o ai e faia le kuka, faamamā le fale, ave le taavale, pe fai ni fagafao, le lapoʻa o le paaga, po o ai e aveina le taʻifau e faasavali, ma ave i fafo le lapisi. Na faapea mai le lōia o Christine Jeffress, “e lē o faatalitalia e tagata e tumau a latou faaipoipoga.”

O Mātua e Lē Iloa Faaali le Alofa

Ua taʻua i le mekasini Polani o le Newsweek Polska, “Ua faatupulaʻia mātua e manaʻomia se tusi e aʻoaʻo ai le auala e fai ai a latou fanau ona e lē iloa faaali i ai le alofa.” E ao ona aʻoaʻo mātua i le auala e opo ai a latou fanau, ma taaalo ma pepese iā i latou. E tāua tele nei vala auā le ola lelei aʻe o fanau. Peitaʻi, ua faaalia i suʻesuʻega, “i aiga Polani, o mea e faamuamua i mea e masani ona fai faatasi e mātua ma a latou fanau, o le matamata TV ma le ō e faatau.” Ae o le taaalo ma a latou fanau, e lona ono.