Vala Tāua Lona 3: Galulue Faatasi

“E sili ona lelei o le toʻalua nai lo o le toʻatasi, . . Auā afai e paʻū le tasi, e toe faatūina o ia e lē la te toʻalua.”—Failauga 4:9, 10.

Le Uiga. O ulugalii e taulau manuia, e faaaloalo i le faatulagaga a le Atua i le tulaga ulu, o loo taʻua i le Tusi Paia. (Efeso 5:22-24) E lē o toe mafaufau le tagata na o ia, ae ua manatunatu iā i laʻua uma e galulue faatasi. I le faia faapea, e lē o toe manatu le tane po o le avā na o ia. Ae e tusa ai ma le Tusi Paia, ua “tino e tasi” i laʻua ma ua taʻu mai ai, e ao ona tumau ma māfana le la ulugalii.—Kenese 2:24.

Le Tāua. Afai e lua te lē galulue faatasi, e vave ona avea mea iti ma faafitauli tetelē ma vevesi ai ona o vaivaiga, ae lē talanoa i le auala e foʻia ai. Peitaʻi, afai e lua te galulue faatasi, ua pei oulua o se pailate ma lona soā pailate o loo galulue faatasi, ae lē o ni pailate se toʻalua e eseese vaalele e iai, ma ua fetoʻai. Afai e lua te lē malilie i se mea, ia talanoa i ni auala e faaleleia ai, ae lē o le maʻimau o le taimi ma le malosi e faitio ma tautuuaʻi.

Faataʻitaʻi mea nei. Tali fesili nei e iloa ai po o le ā le tele o lua galulue faatasi ai.

▪ Po ou te manatu, “o aʻu tupe uma” tupe a loʻu aiga, ona o aʻu lea e faigaluega?

▪ Po ou te aloalo mamao i aiga o loʻu toʻalua e ui e māfana o ia iā i latou?

▪ Pe e manaʻomia ona ou alu ese mai loʻu toʻalua, ina ia mapu ai loʻu mafaufau?

Fai sau faaiʻuga mautū. Mafaufau i ni auala e mafai ona faailoa atu ai o loo e fiafia e galulue faatasi ma lou toʻalua.

E manaia ae fesili i lou toʻalua i sana fautuaga.

[Ata i le itulau 5]

O le galulue faatasi, ua pei oulua o le pailate ma lona soā pailate i le vaalele e tasi