Vala Tāua Lona 5: Magafagafa

‘Ia iloa lo outou magafagafa.’—Filipi 4:5.

Lona Uiga. I aiga e taulau manuia, e iai i ulugalii le uiga o le fefaamagaloaʻi. (Roma 3:23) E lē pulepuletutū pe soona tuufau foʻi a latou fanau. Ae e latou te fai ni tulafono e talafeagai mo le aiga. Pe a manaʻomia le faasaʻoga, e latou te “aʻoaʻi faatatau.”—Ieremia 30:11.

Le Tāua. Ua faapea mai le Tusi Paia, “o le atamai mai i lugā, . . e magafagafa.” (Iakopo 3:17) E lē tāpā e le Atua tagata lē lelei atoatoa ia lelei atoatoa, o lea, e lē tatau foʻi i ulugalii ona faatalitalia lenā tulaga mai i o latou taʻitoʻalua. O le vaavaai i masei, e na o le ita e tupu ai ae e lē faaleleia ai. Ae ia e malamalama, “e sesē i tatou uma i mea e tele.”—Iakopo 3:2.

E faaalia e mātua e taulau le fetuutuunaʻi i le feagai ai ma a latou fanau. E lē soona faia a latou aʻoaʻiga, pe “faamaliegatā.” (1 Peteru 2:18) E latou te tuu atu le saʻolotoga i fanau talavou e faamoemoeina. E latou te lē taumafai e pulea vala uma o olaga o fanau talavou. Ua taʻua e se tasi tusi, o le taumafai e pulea vala uma o le olaga o se talavou, “e tai pei o loo fai se siva tiotio e pei ona faia i isi atunuu ina ia tō mai ai le timu. E na o le vaivai ai ae aunoa ma se timu e toʻulu ifo.”

Faataʻitaʻi mea nei. Fua pe faapeʻī lou magafagafa i le taliina o fesili nei.

▪ O anafea na gata ai lou faamālō i lou toʻalua?

▪ O anafea na gata ai lou faitio i lou toʻalua?

Fai sau faaiʻuga mautū. Afai na faigatā ona taliina le fesili muamua ae faigofie ona tali le fesili lona lua, mafaufau la i se sini e mafai ona e faatū ina ia e faaalia ai le magafagafa i isi.

Aiseā e lē talanoa faatasi ai ma lou toʻalua i faaiʻuga ua lua faia?

Mafaufau i ni avanoa e tuu atu i lau tama talavou pe ia faaalia le faamoemoeina.

E manaia pe a talanoa faatasi ma lau tama i mataupu tāua, e pei o le taimi e tatau ai ona sau i le fale.

[Ata i le itulau 7]

O se tagata magafagafa o le aiga, e pei o se avetaavale faautauta, e lologofie