Vala Tāua Lona 7: Se Faavae Mautū

Le Uiga. O se aiga e sologa lelei, e pei o se fale e mautū le faavae ma e tumau mo se taimi umi. O aiga taulau, o loo faavae i le puna o taʻiala maufaatuatuaina.

Le Tāua. E tele fautuaga mo aiga e maua mai i tusi, mekasini, ma polokalame o TV. E uunaʻia e nisi faufautua o faaipoipoga ulugalii o iai faafitauli ina ia nonofo pea, ae o isi e uunaʻia ulugalii e tatala a latou faaipoipoga. Ae ua toe sui manatu o na faufautua. O se faataʻitaʻiga, i le 1994 ina ua amata le galuega a se faufautua lauiloa, na ia tusi e faatatau i faafitauli o talavou, o lona manatu, “e sili ona lelei pe a nonofo tamaiti ma se matua e toʻatasi ae fiafia, i lo o mātua e faaipoipo ae lē fiafia. Sa ou manatu o se filifiliga lelei le tatala o le faaipoipoga i lo le tauivi ma se faaipoipoga leaga.” Peitaʻi, ina ua mavae le luasefulu tausaga ma ua ia vaai i mea e tutupu, na toe sui ai lona manatu. Na faapea mai o ia: “O le tatala o le faaipoipoga, e pagatia ai lava le tele o tamaiti.”

E fai ma sui manatu o tagata, ae o le fautuaga sili o loo iai, e atagia mai ai taʻiala o loo i le Afioga a le Atua, le Tusi Paia. Atonu o e mātauina, a o faitauina lenei faasologa o mataupu, o loo iai taʻiala mai le Tusi Paia i le pito i luga o itulau e 3-8. Ua fesoasoani na taʻiala i le tele o aiga ia taulau manuia. E iai foʻi o latou faafitauli. A o le eseesega, ua latou maua mai i le Tusi Paia le faavae mautū mo faaipoipoga faapea le olaga faaleaiga. Ua tatau ai lea tulaga auā o Ieova le Atua lē na tusia le Tusi Paia, o Ia na faavaeina aiga.—2 Timoteo 3:16, 17.

Faataʻitaʻi mea nei. Fai se lisi o mau o loo i luga o itulau e 3-8. Faaopoopo i ai ma nisi mau na aogā iā te oe. Tuu lau lisi i se mea e faigofie ona e tago atu i ai.

Fai sau faaiʻuga mautū. Ia maumauaʻi e faatatau le Tusi Paia i le olaga o lou aiga.

[Ata i le itulau 9]

O le avea o le Tusi Paia ma faavae mautū i le olaga o lou aiga, e mafai ai ona tatalia faafitauli