Le Auala e Maua ai e Talavou le Fesoasoani

I se lalolagi e sologa lelei ai mea uma, o mātua alolofa e avatu pea faatonuga ma toleniga alofa i a latou fanau. E latou te talanoa, ma faitau faatasi tusi ma fanau, aai faatasi, ma faaalia foʻi le malamalama iā i latou. Peitaʻi, e leai ni mātua e lelei atoatoa. Ua moni ai le Tusi Paia: “Ua agasala tagata uma lava, ma ua lē ausia le mamalu o le Atua.”—Roma 3:23.

O oe le talavou, atonu o loo e mafaufau faapea, e lē lelei lou aiga—ma atonu e saʻo oe. Ae ui i lea, e tele mea e mafai ona e faia e faaitiitia ai lou popole ae faateleina ai lou fiafia. Ia mātau mai ni auala e aogā ai iā te oe, le faatatauina o taʻiala o le Tusi Paia.

Fautuaga 1

Ia Faatasitasi ma Isi ae Aua le Faaesea Oe Lava

“O lē e na te faaesea o ia lava, e saʻili o ia i lona lava faanaunauga; o le a tetee o ia i le atamai aogā uma.” (Faataoto 18:1) O nisi talavou e matamumuli e faasaga i tagata ae e faigofie ona faasagasaga i le TV pe fai se taaloga vitiō. O le matamumuli tele o nisi ua faaesea ai i latou mai tagata. Ua taʻua e le talavou e igoa iā Elisapeta e faapea, “e lē mafai ona teʻa loʻu matamuli. Ua pei ou te fefe i tagata. E ese le faigatā ona ou faamasani ma talanoa atu i tagata.”

Ua faapefea ona faaleleia e Elisapeta lona faafitauli? O ia o se Molimau a Ieova ma o se vala o lana tapuaʻiga le toʻaga e auai i sauniga. Ua fai mai o ia: “E ui ina ou matamuli, a o loʻu sini ia talanoa ma se isi i le sauniga. A lē mafai ona ou faia faapea, ou te taumafai pea. Ou te mafaufau i mea ua mafai ona ou faia. Ma e tele aogā ua ou maua i loʻu faamasani i isi.”

E manaia ae tusi i lalo igoa o ni tagata se toʻalua po o se toʻatolu e te fia faamasani i ai. I vaiaso o i luma, ia fai ma ou sini le iloa o se mea fou e uiga iā i latou. Ona tusi lea i lalo se mea manaia e te fia faia mo i latou i le masina o i luma, ma fai loa.—Galuega 20:35.

Afai e te faaesea mai tagata ma e sola mai faafitauli, e oo ina e manatu faapito, ma e lē lelei lenā mea. Peitaʻi, ua fautua mai le Tusi Paia “ia vaavaai ma le naunau e lē gata i au lava mea, ae i mea foʻi e lelei ai isi.” (Filipi 2:4) Pe a e faaaogā lea taʻiala i au feutagaʻiga ma lou aiga ma isi, o le a saʻo ai lea o lau vaai i ou faafitauli, ma mafai foʻi ona e taulimaina.

 Fautuaga 2

Ia Sola Ese i le Faitaaga

“Ia sosola ese i le faitaaga. O isi agasala uma e faia e se tagata, e lē o agasala o ia i lona lava tino, ae o lē e faaauau ona faitaaga, ua agasala o ia i lona lava tino.” (1 Korinito 6:18) Talu ai ua taatele le faitaaga i talavou, e faapefea ona e teena le faaosoosoina o oe e faia feusuaʻiga?

Muamua lava, a o leʻi oo tofotofoga iā te oe ia e mafaufau lelei i lau mea e fai. Ua moni ai le faataoto: “O le tagata e iai le utaga mamao, e na te iloilo lelei ona laasaga.” (Faataoto 14:15) Na fai mai Mbali, o se teine talavou mai Aferika i Saute: “A o ou i le aʻoga maualuga, e masani ona fai mai se talavou i laʻu vasega e ma te tafafao. Na uunaʻi aʻu e teineiti o laʻu vasega e ma te ō, ona e aulelei tele o ia, ma e faigaluega i le faaaliga o lavalava, toe taalo foʻi i le ʻau soka a le aʻoga. Sa ou manatu e aulelei o ia, ae ua uma ona fai laʻu filifiliga ou te tausisi i amioga mamā. E manatu laʻu tupulaga e lē afāina le faitaaga. Ae na ou iloa le mea e saʻo ma le mea e lē tatau ona faia, ma ua leva ona ou filifili i le mea e fai pe a tofotofoina aʻu.”

Manatu lona lua, ia tatalo i le Atua e fesoasoani atu i lau filifiliga e tausisi i ana faatulagaga. Ua fai mai Maggie, o se talavou mai Egelani: “Pe a faaosoosoina aʻu e fai feusuaʻiga, ou te maua le malosi ona o le tatalo. E lē taitai ona ou faalagolago i loʻu lava malosi. Ou te talanoa foʻi i oʻu mātua i loʻu faafitauli, faapea foʻi ma aʻu uō taʻumatuaina i nisi taimi.”

 Fautuaga 3

Ia Māfana Lou Alofa i Ou Mātua

“Ia autasi outou uma, ia tigā alofa le tasi i le isi, ia iā te outou le alofa faaleuso, ia māfana lo outou alofa.” (1 Peteru 3:8) E leai sau mea e mafai pe a filifili ou mātua e teteʻa, pe filifili i laʻua uma e faigaluega. Ae e mafai ona e filifili e lē avea na mea ma tulaga e faaleaga ai la outou faiā. O se tasi o auala e faaitiitia ai lou popole ae faateleina lou fiafia, o le atiaʻe o lou alofa māfana i ou mātua, e ala i le taumafai e malamalama i tulaga faigatā o feagai ma i laʻua.

Na faaaogā e se talavou e igoa iā Amber lenei fautuaga. E iai taimi e na te iloa e lē lelei ai le la va ma lona tinā, ma e iai mea e lē femalamalamaaʻi ai ma oo ai ina fiu le tasi i le isi. Peitaʻi, fai mai o ia: “Ua tele faigatā ua oo i loʻu tinā. E na o ia e tausia i matou le fanau e toʻafā. Ua maua le mea e matou te nonofo ai, faapea meaʻai ma lavalava ona o ana galuega. E ese loʻu fiafia ona e malosi o ia, ma talosia ia ou faapea, pe a oo ni faigatā iā te aʻu.”

Afai e te taumafai e malamalama i le tulaga o ou mātua ma e lagona o la faalogona, e aogā ina ia saʻo ai lau vaai i ou faafitauli. Atonu o le a e iloa ai uiga lelei o ou mātua ma faataʻitaʻi i ai.

O le Puna o Fautuaga Aogā

O loo taʻua i luga nisi o fautuaga poto o loo iai i le Tusi Paia le Afioga a le Atua. A o e aʻoaʻo atili e uiga i le Tusi Paia, o le a e talisapaia le faatuatuaina o fautuaga o loo iai. *

E mafai ona e iloa atili mea o loo i le Tusi Paia, i lou aufaatasi ma Molimau a Ieova ma suʻesuʻe ma i latou. O le a e maua ai ni uō moni e lagolagoina oe ma fesoasoani iā te oe e faaaogā fautuaga atamai o loo i le Tusi Paia. E lē faigofie ona ola e tusa o faatulagaga a le Tusi Paia. Ae a e filifili e faia faapea, o le a e maua aogā e lē uma.—Isaia 48:17, 18.

[Faaopoopoga i lalo]

[Pusa/Ata i le itulau 8, 9]

Mea e Manaʻomia e Talavou Mai i o Latou Mātua

O lo Latou Taimi: Na fetalai Ieova le Atua i mātua Isaraelu, e ao ona talatalanoa soo ma fanau, ‘pe a nofo i le fale, pe a savali i le ala.’ (Teuteronome 6:6, 7) O lona uiga e ao ona faifaimea faatasi mātua ma a latou fanau. E mautinoa o le manatu foʻi o Iesu, ia tatau ona mafuta o ia ma tamaiti. O se faataʻitaʻiga, o le ā na fai e Iesu ina ua ‘aumai e tagata tamaiti iā te ia, ina ia paʻi ane o ia iā i latou’? Ona “siitia lea e ia o tamaiti i ona lima, ua faamanuia iā i latou.” (Mareko 10:13, 16) O se faaaʻoaʻoga lelei tele lea mo mātua!

E Saʻo ma Saʻoloto Talanoaga: Ua faapea mai le Tusi Paia: “E faalēaogāina fuafuaga pe a lē iai ni talanoaga i mataupu faalilolilo.” (Faataoto 15:22) E tāua tele le talanoa lelei ma lau fanau, ae e sili ona tāua pe a oo ina matutua i latou, ona ua tau lē maua i le fale ae ua tele lo latou taimi e alu i uō i aʻoga ma isi. Afai e lē saʻo ma saʻoloto talanoaga i le va o mātua ma fanau, e ono avea talavou e pei o ni tagata ese i le aiga.

Aʻoaʻiga Talafeagai: O le upu aʻoaʻiga, e aofia ai faasaʻoga ma toleniga, e ui e iai foʻi taimi e faasala ai. Ua taʻua i le Faataoto 15:5: “O le tagata valea e lē amanaʻia le aʻoaʻo atu a lona tamā, a o lē usiusitaʻi i le aʻoaʻiga, e iā te ia le utaga mamao.” E lē iloa e se talavou faatulagaga e ao ona usitaʻia pe a lē aʻoaʻia o ia. E tatau lava i mātua ona magafagafa pe a aʻoaʻia fanau talavou. Aua le faaonoono i fanau auā e tupu ai le fiu o tamaiti, ma lē mautonu ai fanau i le mea e ao ona fai. (Kolose 3:21) Peitaʻi, e lē tatau i mātua ona tuufau a latou fanau ma lē maua ai e fanau aʻoaʻiga tāua. E mataʻutia āuga o le tuufau. *

[Faaopoopoga i lalo]