Le Manatu o le Tusi Paia

O le ā le Aso Faamasino?

Ua faapea mai le Tusi Paia “ua tofia [e le Atua] le aso e faamasinoina ai le lalolagi uma.” (Galuega 17:31) E lē fiafia le toʻatele o tagata pe a taʻu le faamasinoina o i latou. Ae ā oe, po o lou lagona foʻi lenā?

AFAI o lea, e mafai ona faamāfanafanaina oe i le iloa, o le Aso Faamasino, o se fuafuaga alofa o le a maua ai faamanuiaga e tele e tagata uma, e aofia ai ma i latou ua maliliu. (Mataio 20:28; Ioane 3:16) Aiseā e manaʻomia ai se Aso Faamasino? O le ā tonu lava e tupu i lenā “aso”?

Aiseā e Manaʻomia ai se Aso Faamasino?

Ina ua tuu e le Atua tagata i le lalolagi, e na te leʻi fuafuaina e avea le lalolagi ma nofoaga e na ona tofotofo ai le tagata pe e tatau ona ola i se isi mea i le lumanaʻi. Na ia faia tagata ia ola e faavavau i le lalolagi. E ui ina lelei atoatoa tino ma mafaufau o le uluaʻi ulugalii, ae na la fouvale i le Atua. Ma la melea ai le faamoemoe o le ola e faavavau mo i laʻua, ma oo mai ai le agasala ma le oti i a la fanau uma.—Kenese 2:15-17; Roma 5:12.

E afe tausaga le umi o le Aso Faamasino, ma e toe maua ai e tagata le mea na leiloa iā Atamu ma Eva. * Ia mātau, o loo taʻua i le Galuega 17:31, o le Aso Faamasino, o le a faamasinoina ai i latou uma e ola i le “lalolagi.” O ē o le a manuia lo latou faamasinoga, o le a maua le ola e faavavau i le lalolagi lelei atoatoa. (Faaaliga 21:3, 4) O lea, o le Aso Faamasino, o le a faataunuu ai le fuafuaga a le Atua mai lava i le amataga mo le lalolagi ma tagata.

O le faamasino ua filifilia e le Atua, o Keriso Iesu. Ua faapea mai le Tusi Paia, o le a ‘faamasinoina e Iesu ē e ola ma ē ua oti.’ (2 Timoteo 4:1) O ai “ē e ola” o le a faamasinoina? O le a faapefea ona toe feola mai i le “lalolagi,” i latou ua feoti?

E Faamasinoina e Iesu ‘Ē o Ola’

Ua tatou tulata atu nei i le iʻuga o lenei faiga amioleaga o mea e pei ona valoia, o le a aveesea ai e le Atua ē amioleaga ma a latou  faiga faapiʻopiʻo. O ē e sao mai i le faaumatiaga o lenei faiga o mea, o i latou ia o “ē e ola” o le a faamasinoina.—Faaaliga 7:9-14; 19:11-16.

I lenā vaitaimi o le faamasinoga e 1,000 tausaga le umi, o le a pule mai ai Keriso Iesu i le lalolagi, faatasi ma le 144,000 o tane ma fafine ua toe faatutūina i le ola i le lagi. O le a avea i latou ma tupu ma ositaulaga e faasoaina mai aogā o le taulaga togiola a Iesu, ma faasolosolo ona faafoʻisia tagata faamaoni i le lelei atoatoa o le tino ma le mafaufau.—Faaaliga 5:10; 14:1-4; 20:4-6.

I le vaitaimi o le Aso Faamasino, o le a taofiofia ai Satani ma ana temoni ia lē faalavelave i galuega ma mea e fai a tagata. (Faaaliga 20:1-3) Ae i le faaiʻuga o le Aso Faamasino, o le a tatala mai ai Satani e toe tofotofoina le faamaoni o tagata ola uma. O ē faamaoni i le Atua, o le a manumalo mai le tofotofoga lea na lē taulau ai Atamu ma Eva. O lea la, o le iʻuga o lo latou faamasinoga, o le a maua le ola e faavavau i le lalolagi lea ua toe avea ma Parataiso. A o ē e fouvale i le Atua, o le a faaumatia e faavavau faatasi ma Satani ma ana temoni.—Faaaliga 20:7-9.

E Faamasinoina “Ē ua Oti”

Ua faapea mai le Tusi Paia, o le a “tutū mai” ē ua oti i le Aso Faamasino. (Mataio 12:41) Na fetalai Iesu, “e oo mai le itula e faalogo ai i latou uma o loo i tuugamau i lona leo, ma latou ō mai ai, o ē na faia mea lelei e toetutū i le ola, a o ē na faia mea leaga e toetutū i le faamasinoga.” (Ioane 5:28, 29) E lē o faatatau lenei faamatalaga i agaga o ē ua oti. E lē o toe iloa e i latou ua oti se mea ma e leai ni o latou agaga o ola i se isi mea. (Failauga 9:5; Ioane 11:11-14, 23, 24) O le a toe faatutū mai e Iesu i latou o ē ua oti i le ola i le lalolagi.

Po o lona uiga e faalagolago le faamasinoga o ē e toetutū i mea na latou faia a o leʻi maliliu? E leai. Ua aʻoaʻo mai e le Tusi Paia, “o lē ua oti ua magalo o ia mai i lana agasala.” (Roma 6:7) O lea, o ē e toetutū mai i le lalolagi, e tutusa ma ē e sao mai i le faaumatiaga o lenei faiga o mea, o le a faamasinoina i le Aso Faamasino “e tusa ma a latou galuega.” (Faaaliga 20:12, 13) O le auala e latou te tali mai ai i lenā taimi, o le a iloa ai po ua latou toetutū mai i le ola e faavavau, po o le toetutū i le faaumatiaga. O le toʻatele o i latou o le a toe faatutūina i le ola, o le taimi muamua lea o le a iloa ai mea e manaʻomia e Ieova le Atua mai iā i latou ina ia maua ai le ola e faavavau. O le a latou maua ai le avanoa e ola e tusa ma le finagalo o le Atua, ma maua ai le ola e faavavau i le lalolagi.

E Lē o se Aso e Mataʻu Ai

I le Aso Faamasino, o le a aʻoaʻoina ai tagata e le Atua, ma faatatauina e i latou mea ua aʻoaʻoina, ma maua ai faamanuiaga. Seʻi faaata i lou mafaufau lou fiafia pe a toe feiloaʻi ma ē pele ua toetutū mai, ma oo ina tou maua faatasi ai le lelei atoatoa.

O le a tuu e le Atua iā Satani le avanoa e tofotofoina ai le faamaoni o tagata i le faaiʻuga o le Aso Faamasino. Ae e leai se mea e ao ai ona popole pe mataʻu. E oo ane i le faaiʻuga o le Aso Faamasino, ua lava saunia tagata uma e fesagaʻi ma le tofotofoga mulimuli. O lea, o le Aso Faamasino, o se vala o le faataunuuga o le finagalo o le Atua, ina ia aveesea uma ai āuga leaga ona o le fouvalega i le faatoʻaga i Etena.

[Faaopoopoga i lalo]

PO O E TAUMĀNATU EA I NISI TAIMI?

● O le ā le Aso Faamasino?—Galuega 17:31.

● O ai o le a faamasinoina ai?—2 Timoteo 4:1.

● O le ā le umi o le Aso Faamasino?—Faaaliga 20:4-6.

[Faamatalaga faaopoopo i le itulau 19]

Seʻi faaata i lou mafaufau lou fiafia e toe feiloaʻi ma ē pele ua toetutū mai

[Ata i le itulau 18]

I le taimi o le pulega a Keriso, o le a toetutū mai ai ē ua oti i le lalolagi parataiso