Ua Fesili Mai Talavou

Aiseā e Matou te Tauupu Soo Ai?

I le tulaga e pei ona taʻua i lalo, e tolu mea na faia e Rasela ua māfua ai ona tauupu ma lona tinā. Pe e te mātauina mai na mea? Ia tusi au tali i avanoa ua saunia, ona siaki lea i le pusa o loo iai “Tali” i le faaiʻuga o le mataupu.

Ua oo nei i le pō o le Aso Lulu. Ua uma feʻau a Rasela, o lē e 17 tausaga, ma ua fia fai sana koma. Ua aapa atu ki le TV, ma nofo ifo loa i lalo.

O le taimi lava lenā na sau ai lona tinā, ma ua lē fiafia lana pupula. “Rasela! O le ā le mea e maʻimau ai fua lou taimi e matamata ai lenā TV, ae lē alu e fesoasoani i meaaʻoga a le teine le la? Ua alu i luma lou faalogogatā!”

A ua ee atu Rasela, “Matuā e ote soo tele.”

Ua tilotilo mai lona tinā. “O le ā lau tala?”

Ua faasesepa mata o Rasela ma tali atu, “E leai.”

A ua matuā ita lava lona tinā ma fai mai, “Aua le malō mai faapena lou gutu!”

Ae na toe tali atu Rasela, “Ae ā la oe?”

Ua muta ai i inā ma lana matamataga . . . A ua toe tauupu foʻi.

1. ․․․․․

2. ․․․․․

3. ․․․․․

PE E tupu soo iā te oe le tulaga o loo taʻua i luga? Pe e masani ona e tauupu ma ou mātua? Afai o lea, ia iloilo lelei lou tulaga. O ā mataupu e tele ina outou feeseeseaʻi ai? Ia faailoga po o ā mataupu—pe tusi i lalo nisi mea i le avanoa “Isi mataupu.”

◯ Uiga faaalia

◯ Feʻau

◯ Laʻei

◯ Faasāsāaga

◯ Faafiafiaga

◯ Aumea

◯ Le isi itupā

◯ Isi mataupu

 O taugāupu ma ou mātua, e tou te mafatia uma ai. E mafai ona e nofonofo filemu, ma faafoliga e te ioe i tala a ou mātua. Ae pe e fiafia le Atua i lenā mea? E leai. O loo faatonuina oe e le Tusi Paia ina “ia e āva i lou tamā ma lou tinā.” (Efeso 6:2, 3) Ae ua faalaeiauina foʻi oe ina ia e “mafaufau lelei.” (Faataoto 1:1-4; Roma 12:1) Afai o lea, atonu o le a malolosi ni ou manatu ia e ese mai i manatu o ou mātua. Peitaʻi ane, o aiga e faatatauina taʻiala o le Tusi Paia, e talatalanoa ma le filemu mātua ma talavou, e tusa lava pe e eseese o latou manatu.—Kolose 3:13.

E faapefea ona e faailoa atu ou lagona i se auala e logomālie? E faigofie ona e faapea mai: “E tuuaʻia lava oʻu mātua. Ua ova le aiā iā te aʻu ma loʻu olaga!” Ae ia mafaufau: Pe e mafai ona e suia uiga o isi, e aofia ai ma ou mātua? E leai, e pau le tagata e mafai ona e suia, o oe. Afai e te taumafai pea e te toʻafilemu, atonu o le a toʻafilemu foʻi ou mātua, ma la faalogologo mai i ou manatu.

Seʻi o tatou vaai la, po o le ā lau mea e fai e taofia ai a outou taugāupu. Ia faatatau fautuaga o loo mulimuli mai, atonu o le a faateʻia ai ou mātua ma oe lava ia i suiga o lau talanoa.

(Fautuaga: Faailoga fautuaga e manaʻomia ona e faatatauina.)

◯ Mafaufau lelei a o leʻi fai atu sau tali. Ua faapea mai le Tusi Paia: “E manatunatu le loto o lē amiotonu, ina ia fai se tali.” (Faataoto 15:28, O le Tusi Paia Samoa—Lomiga o le 1884) Aua e te faapasae lou ita i le taimi lava e te faalogo ai i se tala e te lē fiafia ai. O se faataʻitaʻiga, a fai mai lou tinā: “O le ā le mea ua lē fufulua ai ipu? Matuaʻi e faalogogatā tele!” O se tali vave atu lenei, “E ese lou ote!” Ae ia e mafaufau lelei. Ia taumafai e malamalama i faalogona o lou tinā. E iai māfuaaga e ala ai ona fai atu ou mātua “matuaʻi e faalogogatā tele!” pe “aua le fiapoto.” E faaalia ai o la lagona. O ā na lagona?

Atonu o ātu le mafaufau o si ou tinā, ona ua tele naʻuā ana feʻau e fai. E foliga mai o loo ia manaʻomia lava lau fesoasoani. Ia pe atonu o lau lava lea masani o le fai feʻau fevaavaaiaʻi. Ae e leai sau mea e maua i lou tali atu “E ese lou ote,” nai lo o lea, e na o taugāupu lava e iʻu i ai! Aiseā e te lē fesoasoani ai i le mafatia o si ou tinā? O se  faataʻitaʻiga, e mafai ona e faapea atu: “Aua le popole Tinā, o lea o le a ou alu atu e fufulu ipu.” Faamolemole, aua le tau ina fai atu. O le tali atu ma faalogona agalelei e taofia ai se finauga ma lou tinā.

Ia tusi i lalo se tala e fai atu e lou tamā po o lou tinā lea e ono oso ai lou ita.

․․․․․

Ia mafaufau i sau tali logolelei e ono faatoʻafilemu ai faalogona o ou mātua.

․․․․․

◯ Ia tautala faaaloalo. Ona o mea na tutupu iā te ia, ua aʻoaʻoina ai e Mikeila le tāua o le iloa tautala i lona tinā. Na fai mai o ia: “Po o le ā lava le faafitauli e tulaʻi mai, e lē fiafia lava loʻu tinā i loʻu leo.” Afai o le mea lenā o loo tupu iā te oe, ia aʻo lau tautala filemu ma faagesegese, aua le faasesepā ou mata, pe faia foʻi isi gaoioiga e faaalia ai lou ita. (Faataoto 30:17) Afai lava ua tau pasae aʻe lou ita, ia fai loa sina au tatalo lē leoa i le Atua. (Neemia 2:4) O lau tatalo, ia fesoasoani le Atua iā te oe e pulea lou ita ma lē faateteleina ai le faafitauli, ae lē ina ia tuu ai le ote a ou mātua.—Iakopo 1:26.

Ia tusi i avanoa o i lalo ni upu po o ni gaoioiga e tatau ona e ʻalofia.

O au upu:

․․․․․

O au gaoioiga ma foliga vaaia:

․․․․․

◯ Ia faalogo lelei. Ua faapea mai le Tusi Paia: “O le soona tautala e te faia ai ma se tala lē fetaui.” (Faataoto 10:19, Contemporary English Version) O lea la, ia tuu atu le avanoa e talanoa mai ai lou tamā po o lou tinā, ma ia uaʻi atoatoa i ai. Ia tapē le laau, tuu ese lau tusi po o se mekasini, ma ia tilotilo i ou mātua. Aua e te faasalavei atu o oe e saʻo. Tau lava o le faalogo. Ia faatali seʻia uma ona talanoa, ona e fai atu lea o ni au fesili pe faamatala atu foʻi sou manatu. Ae afai e tatū ou vae ma oso atu, e na o le faateteleina ai o le faafitauli. E ui lava o loo iai pea ni tala e te fia fai atu, ae atonu o le taimi tonu lea e te “filemu” ai.—Failauga 3:7.

◯ Ia nofosauni e faatoese. O se mea lelei le fai atu “Ou te faamalie atu,” pe afai na  e iai i le taugāupu. (Roma 14:19) E mafai foʻi ona e faamalie i ou mātua pe a o iai sou sesē, ua māfua ai le faafitauli. Afai e faafaigatā ona e talanoa saʻo i ou mātua, ia tusi i lalo ou faalogona. Ona e ʻalu lea i le isi maila,’ pe ia taumafai malosi e sui ou uiga lea na māfua ai le tou taugāupu. (Mataio 5:41) O se faataʻitaʻiga, afai na outou tauupu ona o lou lē faia o se feʻau, aiseā e te lē faafiafia ai i laʻua e ala i le tuu i ai o lou fai mea lelei? E tusa lava pe e te lē o fiafia i lenā feʻau, ae sili atu ai le faia nai lo o āuga o le lē fiafia mai o mātua.—Mataio 21:28-31.

O le iʻuga, o le a faafaigofie lou olaga pe a e taumafai e foʻia ma ʻalofia feeseeseaʻiga. Ua faapea mai le Tusi Paia o le tagata “e alofa faamaoni ua agalelei o ia iā te ia lava.” (Faataoto 11:17) O lea la, ia mafaufau i aogā o lou taumafai e faaitiitia feteenaʻiga i le tou va ma ou mātua.

E iai foʻi feteenaʻiga i aiga fiafia, a ua latou iloa lelei foʻia i se auala filemu. Ia faatatau fautuaga o loo taʻua i lenei mataupu, ma atonu ai o le a mafai ona outou talatalanoa ma ou mātua i ni mataupu maʻaleʻale—e aunoa ma ni taugāupu!

 

MEA E MAFAUFAU I AI

● Aiseā e manatu ai nisi o au aumea e lelei le tauupu?

● Aiseā e silasila ai Ieova e valea le tagata e finau?—Faataoto 20:3.

[Pusa/Ata i le itulau 27]

TALA A ISI TALAVOU

“Ou te mafaufau e ui lava o lea ou te faigaluega ma tausia aʻu, ae ona o lea ma te nonofo ma loʻu tinā, e tatau lava la ona ou usitaʻi i ai. Ona sa ia tausia aʻu mo le tele o tausaga, o lea pe a ia mataʻituina aʻu e pei o le taimi ou te oo mai ai i le fale, e matuaʻi oʻu malamalama lava.”

“Pe a matou lē femalamalamaaʻi ma oʻu mātua i se mea, e matou te tatalo ma tilofaʻia ni faamatalaga mo na mea, ona matou talatalanoa lea i ai. E masani lava ona iʻu ane ua matou malilie uma i se mea e tasi. Pe afai tatou te faaaofia ai Ieova i ia mataupu, e mautinoa le taulau manuia.”

[Ata]

Tanielu

Cameron

[Pusa i le itulau 29]

TALI

1. O le faaaogā o upu tutui (e pei “Matuā e ote soo tele”) na atili ita ai lona tinā.

2. O le pupula a Rasela (e pei o le faasesepa o ona mata) na atili tupu ai le faafitauli.

3. O le tali upu (e pei “Ae ā la oe?”) e lē maua ai ni iʻuga lelei.

[Pusa i le itulau 29]

FESOASOANI MO MĀTUA

Tagaʻi i le vaaiga na taʻua i le amataga o lenei mataupu. Pe mafai ona e mātauina ni itu na lē taulau ai le tinā o Rasela i le tausia o le filemu? O le a faapefea nei ona e ʻalofia taugāupu ma lou alo? Ia manatua pea fautuaga nei:

ʻAlofia faaupuga e pei o le “Matuaʻi e faalogogatā tele” ma le “Aua le fiapoto.” E na o le tali faasaʻeā lava le mea e maua ai. O ni faaupuga soonafai, ma e iloa lelei e lou alo. E na te iloa lelei foʻi o lou ita ua e lafo ai na tala ae lē ona o le faafitauli ua tupu.

Nai lo o le osofaʻia loa o lou alo ma e faapea atu “o oe,” taumafai e faailoa i ai aafiaga o lana amio iā te oe. O se faataʻitaʻiga, pe a e fai atu “E ese loʻu mafatia pe a e lē . . . . ” O le mea moni, e tāua i lou alo ou faalogona. O le faailoa i lou alo o aafiaga e oo iā te oe, e lē taumatea o le a uaʻi mai ai o ia.

E ui ina faigatā, ae e aogā tele le faatali seʻia e toʻafilemu. (Faataoto 10:19) Afai na māfua le feteenaʻiga ona o ni feʻau, toe talatalanoa lelei ma i latou. Tusi patino lava i lalo a latou feʻau e tatau ona fai, ma faamanino lelei atu aafiaga e oo i ai pe a lē faia faapea. Ia faalogologo lelei a o sasaa mai nai ona manatu e tusa lava pe sesē. O le toʻatele o talavou, e sili atu ona latou usitaʻi pe a faalogologo lelei mātua nai lo o le ote.

Nai lo o le manatu ua aafia si ou alo i le agaga fouvale o lenei lalolagi, ae ia e iloa o uiga na e masani ona oo i talavou o loo tuputupu aʻe. E ono finau lou alo ina ia faamaonia ai o le a avea o ia o se tagata matua. Taumafai e ʻalofia le finau ma lou alo. Ia manatua, o loo e aʻoaʻoina atu i lou alo se lesona i le auala e te tali atu ai pe a faaita oe e se tasi. Ia onosaʻi ma faapalepale, ona e faia lea o se faaaʻoaʻoga lelei e mulimuli ai lou alo.—Kalatia 5:22, 23.

[Ata i le itulau 28]

O le tauupu ma ou mātua e tai pei o le tamoʻe i se masini toleni—e alu ai lou malosi, ae tumau ai lava i le mea e tasi