Faaaogā le Taimi i Mea e Tāua

“Ua itiiti le taimi o totoe.”—1 Korinito 7:29.

NA TUSIA e Michael LeBoeuf i lana tusi, Working Smart e faapea: “O le osooso solo i le vai ma faapisipisi, e lē faapea ai o loo e aʻau.”

I nisi faaupuga, e iai le eseesega o le gaoioi, ma le faataunuuina moni o se mea e aogā. Seʻi toe vaai i tua i le vaiaso na teʻa nei. O ā au mea na fai? O ā mea na e pisi ai? Po o e iloa e manaʻomia ona faaaogā le taimi i mea e tāua moni iā te oe?

Seʻi manatu i le mea na valoia e Iesu e faatatau i o tatou taimi pisi ua iai. Na ia fetalai, a o lalata atu lenei faiga o mea i lona mutaaga ma ua lata mai le lalolagi fou amiotonu a le Atua, o se taimi pisi lea mo ona soo. I le faia o le ā? I le talaʻiina o “lenei tala lelei o le malo [o le Atua].” Na fetalai foʻi Iesu, o le toʻatele o tagata o le a pisi tele ma ua leai se taimi e faalogo mai ai. O le a popole i le faia o mea masani o le olaga. Na ia toe faapea mai e uiga iā i latou e pisi tele ua lē mafai ai ona faalogo i le feʻau o le Malo, o le a faaumatia i latou.—Mataio 24:14, 37-39; Luka 17:28-30.

O loo talaʻia e Molimau a Ieova i aso nei le tala lelei o le Malo o le Atua i le silia ma le 230 atunuu. Ua moni ai le valoaga a Iesu, o le toʻatele o tagata e lē mananaʻo e faalogo, ma faapea mai e “pisi tele.” Ae e matou te talosagaina oe ina ia faaavanoa sou taimi i lou olaga pisi e iloiloina ai aʻoaʻoga a le Tusi Paia e faatatau i le Malo o le Atua. Ma e matou te faamoemoe, o lou aʻoaʻoina o faamanuiaga ua faataatia e le Atua mo tagata, o le a e talitonu ai, o le faalogo ma utagia le feʻau a le Tusi Paia, e aogā tele ona faaavanoa i ai sou taimi, ona o se mea e tāua tele. *

[Faaopoopoga i lalo]