Le Manatu o le Tusi Paia

Feoaʻi ma le Sini e Faaipoipo

Na feoaʻi Iulia ma Lee, ma na mananaʻo e tausisi i amioga mamā. * A o iai na o i laʻua i se tasi pō, na oso aʻe o la lagona fia feusuaʻi. O le mea e faafetai ai, na toe sagatonu o la mafaufau, ma lē faia ai se agasala matuiā.

O LE tapuaʻiga moni, e lē na o le alu i le lotu i vaiaso taʻitasi. E aofia ai le olaga atoa o se tasi, lea e aafia ai lana amio. Na fetalai Iesu Keriso e na o i latou e “faia le finagalo o . . . le Tamā” e talia e le Atua. (Mataio 7:21) Ina ia faafiafiaina le finagalo o le Atua, e tāua ona tausia lo tatou tulaga mamalu a o tatou feoaʻi ma le isi itupā, ma ia feoaʻi ma le sini e faaipoipo.

E faapefea la ona faaauau ona mamā le lua faigāuō i le silafaga a le Atua, aemaise o le tele o faaosoosoga ina ia feusuaʻi tama ma teine o loo feoaʻi? Muamua lava, ia tatou iloa o tapulaa a le Atua e mo lo tatou lelei. Lona lua, ia iloa le mea moni e faatatau i le natura o le tagata. Lona tolu, ia fai muamua se lua tonu i amioga e tatau ona oulua faaalia. Lona fā, ia iai le Atua i la oulua faigāuō. Seʻi o tatou talanoa auauaʻi i nei manatu.

O Tapulaa mo lo Tatou Lelei

O loo taʻua i le Isaia 48:17, 18: “O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai. E lelei pe a e faalogo mai i aʻu poloaʻiga! Ona pei ai lea o se vaitafe lou filemu, ma lau amiotonu e pei o galu o le sami.”

Ioe, o tulafono ma taʻiala o loo i le Afioga a le Atua, le Tusi Paia, e mo lo tatou lelei. (2 Timoteo 3:16, 17) Ua faamaonia ai le manatu mamafa mai o Lē na faia i tatou, ma e finagalo o ia ina ia tatou fiafia ma taulau manuia i vala uma o le olaga. (Salamo 19:7-10) Po o ou faalogona na? Afai o lea, o oe moni lava la o se tagata atamai.

Ia Iloa le Mea Moni e Uiga iā te Oe

I le pei o se uō moni, e faamaoni Ieova iā i tatou; e na te faailoa mai le mea moni e faatatau iā i tatou. O se faaaʻoaʻoga, ua lapataʻi mai lana Afioga: “E sili ona faaʻoleʻole le loto nai lo o mea uma, ma e matuā leaga lava. O ai sē e mafai ona iloa?” (Ieremia 17:9) Ua faapea mai foʻi le Tusi Paia: “E valea o lē e na te faatuatuaina lona lava loto, ae e sao o lē e savali ma le atamai.”—Faataoto 28:26.

E faapefea ona faaalia e se tama ma se teine o loo feoaʻi, lo la faatuatuaina o o la loto? O se tasi o auala, o le iai lea i se nofoaga e faaosoosoina ai i laʻua e soona fepaʻiaʻi, e pei o le faigāuō o loo taʻua i luga. O se isi auala, o le lē amanaʻia lea o fautuaga poto mai i mātua e matataʻu i le Atua. Ua silafia e na mātua o lagona fia feusuaʻi aemaise lava a o talavou, e tai pei o se afi malosi e tatau ona vaai faalelei.

O lea la, o talavou o ē e ‘savavali i le atamai’ mai le Atua, e latou te manatu mamafa i faatonuga a mātua. E latou te teuloto fautuaga a mātua alolofa o ē e talanoa saʻo atu iā i latou, e ui lava e lē o fia faalogo i ai. Ae o lē e sili lona alofa iā te oe, o lou Tamā o i le lagi o Ieova le Atua, ua fautua mai o ia ina ia “faateʻa ese ia mai i lou loto o mea e te tigā ai, ma puipuia lou tino mai i mala.” (Failauga 11:9, 10) E faapefea ona e faia lenā mea? Aua neʻi e lolo atu i tuʻinanauga sesē.

 Ia Fai se Tonu i Amioga e Tatau Ona Faaalia

“E iai le atamai iā i latou o ē e soālaupule faatasi.” (Faataoto 13:10) O teine ma tama faautauta o loo feoaʻi, e latou te faatatauina lenā mau mai lava i le amataga o a latou faigāuō, e ala i le mulimuli i fautuaga a le Tusi Paia i le auala talafeagai e fepaʻiaʻi ai, ma ia maumauaʻi e tausisi i ai. O le soona fepaʻiaʻi po o le mautinoa naʻuā, e tai pei o le avetaavale faatamala. Ua tuai le toe mafaufau i tulafono o le saogalemu i auala i le taimi e lavea ai le taavale!

Ua faapea mai le Tusi Paia: “O lē ua faautauta, na te iloa atu le leaga, ma lafi ai; a o ē ua faigofie, e ō atu pea i latou, ona faasalaina ai lea.” (Faataoto 22:3, Le Tusi Paia Samoa—Lomiga o le 1884) E ʻalofia e faigāuō le tele o faafitauli pe a tafafao faatasi ma aumea lelei, po o se tagata talafeagai e latou te toʻatolu. O āuga o le valea a o feoaʻi, e aofia ai se lotofuatiaifo ua ōia, o le manatu faatauvaa iā te oe ma lau uō, ma le faamāsiasi o isi e aofia ai ma lou aiga. O lea la, ia faautauta; ia lotomalie e mulimuli i tapulaa faale-Tusi Paia, ma tausisi i ai!

Ia Avea Ieova ma “Maea Sautuatolu”

O le faaipoipoga e pei o se maea sautuatolu, ma o le Atua le maea autū. Ua faapea mai le Failauga 4:12: “O le maea sautuatolu e lē vave motusia.” E faatatau foʻi lenā taʻiala i tama ma teine o loo feoaʻi. O ē e fia maua le faamanuiaga a le Atua i a latou faigāuō, e latou te maua lenā faamanuiaga pe a taʻitoʻatasi i latou ma mafuta vavalalata i le Atua. Ua taʻua i le Salamo 1:1-3: “E fiafia le tagata e lē savali i fautuaga a ē e amioleaga, e lē tū o ia i le ala o ē e agasala . . . Ae e naunau o ia i le tulafono a Ieova, e faitau lē leoa o ia i lana tulafono i le ao ma le pō . . . e taulau manuia mea uma e na te faia.”

Ioe, e mafai ona tatou taulau manuia i le olaga, e aofia ai le taulau manuia i faigāuō ma faaipoipoga, pe a tatou faia mea e tusa ma le auala a Ieova. O Ia na faia i tatou, ma o faalogona alofa i le va o le tama ma le teine, atoa foʻi ma le faaipoipoga, o ni meaalofa tautele mai iā te ia. Ona o lea, ua ono ma tatau ai lo tatou matuā faaaloalo i na mea.—Iakopo 1:17.

[Faaopoopoga i lalo]

PO O E TAUMĀNATU EA I NISI TAIMI?

● E faapefea ona tatou iloa e finagalo Ieova ia lelei o tatou olaga?—Isaia 48:17, 18.

● O le ā le mea moni e uiga iā i tatou e ao ona tatou amanaʻia?—Ieremia 17:9.

● O le ā le auala e taulau manuia ai le feoaʻiga a se tama ma se teine, aemaise pe a faaipoipo mulimuli ane ai?—Salamo 1:1-3.

[Ata i le itulau 11]

O teine ma tama faautauta o loo feoaʻi, e latou te mulimuli i fautuaga a le Tusi Paia i le auala talafeagai e fepaʻiaʻi ai, ma e maumauaʻi e tausisi i na tapulaa