Fesoasoani le Ala Mai! e Faasaoina le Ola o se Pepe e Leʻi Fanau Mai

● O se fafine Mekisikō e igoa iā Anita e toʻatolu lana fanau, a o lea foʻi ua toe tō. * Na ia taʻu atu i lana tane e lē toe manaʻo i se isi pepe ma o le a taumafai malosi e faapaʻū. Na ia taʻua foʻi le pule i lona ola! O le taimi lenā, o loo fai se lesona faale-Tusi Paia a Anita ma se tasi o Molimau a Ieova, ae e lē o naunau tele i ai. Na ia faapea mai: “Sa iai oʻu uiga faamaualuga.”

Na faamatala e le Molimau lea e suʻesuʻe ma Anita le tāua o taʻiala o loo i le Tusi Paia. O se faataʻitaʻiga, na ia taʻu atu iā Anita e tāua le ola o se pepe e leʻi fanau i le silafaga a le Atua. I Isaraelu anamua, pe a lavea se fafine tō i se tasi ma ua oti ai le fafine po o lana pepe e leʻi fanau mai, o le faasalaga e tusa ai ma le Tulafono a le Atua, ia fasiotia lea tagata. (Esoto 21:22, 23) * Ae e leʻi faalogo Anita. Ua mautū lana filifiliga e faapaʻū le pepe.

Na faapea mai Anita: “Na taʻu mai e se tasi iā te aʻu, a ou tuiina se vailaau patino iā te aʻu o le a mafai ai ona paʻū laʻu pepe. Ona ou faatau mai lea o le vailaau ma fai atu i se uō e tago e tui. Na ia faia faapea, ae e leai se mea na tupu. Na ou iloa mulimuli ane, e leʻi manaʻo o ia e lagolagoina le mea sesē o le a fai, o lea na ia faaaogā ai se vai nai lo le vailaau e aunoa ma loʻu iloa.”

Na faaauau pea taumafaiga a Anita. I le lona fā o masina o lona maʻitaga, na ia maua ai se fomaʻi e mafai ona ia faapaʻūina lana pepe. E toe ono aso faia lea tulaga, ae avatu loa e le Molimau iā Anita se kopi o le mataupu a faa-Samoa, “Faamaumauga a se Pepe e Leʻi Fanau Mai,” na lomia i le Ala Mai! faa-Peretania o Me 22, 1980. Na faaiʻu le “Faamaumauga” i le faapea mai: “O le asō ua fasiotia ai aʻu e loʻu tinā.” Na matuā faateʻia Anita i na upu ma tagi ai mo ni itula. Na ia faapea mai: “O inā na ou iloa ai le mataʻutia o le mea sesē o le a ou fai.”

Na fanau e Anita se pepe teine e mālōlōina lelei. Ua ia faapea mai: “O le asō, ua ou iloa ai Ieova, lea ua ou alofa i ai ma loʻu loto atoa.” E lē gata i lea, o loo ia aʻoaʻoina lana tama teine i le Afioga a le Atua ina ia ola aʻe foʻi o ia e alofa iā Ieova. Ua taʻutino mai e lana tama teine faapea, o le Atua ua ala ai ona ou ola—muamua ona o ia o le Puna o le ola, ma le manatu lona lua, ona o aʻoaʻoga i lana Afioga e pei ona talanoaina i le mekasini o le Ala Mai! ua faasaoina ai lona ola.

[Faaopoopoga i lalo]