“Ia E Fesoasoani Mai iā te Aʻu”

● Na maua e le ofisa o le lālā a Molimau a Ieova i Mekisikō le tusi lenei, mai i se fafine e faigaluega i se aʻoga mo tagata e lē atoatoa le malosi. Na tusi mai o ia: “Na maliu si oʻu tinā pele iā Me 9. E faigatā ona ou faamatala atu le matuā mafatia o loʻu loto. I ni nai masina a o leʻi maliu o ia, na fai ai aʻu saʻiliʻiliga mo laʻu galuega i se mataupu e fesootaʻi atu i le oti, ma le auala e faafetaiaʻia ai e le mafaufau lenā tulaga faigatā. Sa ou faapea o le a fesoasoani iā te aʻu, ae e leʻi aogā iā te aʻu.”

Ona o lona faanoanoa i se tasi aso, na ia tatalo atu ai i le Atua: “Ia e fesoasoani mai iā te aʻu.” Na faapea mai o ia: “Na ou faitau i le pō lenā i le polosiua Pe a Maliu se Tasi e Pele iā te Oe. Na matuā pāʻia ai lava loʻu loto. Na ou iloa ai, o se mea lelei le tagi. I le mataupu ua faaulutalaina: ‘Pe Mafai Faapefea Ona Ou Onosaia Loʻu Faavauvau?’ o loo taʻua ai: ‘Aua e te manatu māmā i le tāua o le tatalo. . . . Ua matuā tele se aogā o le fesoasoani ua saunia e le Atua. . . . E moni, e lē faaitiitia e le fesoasoani mai le Atua le tigā, ae e mafai ona faafaigofie ai ona onosaia. E lē o le uiga o lenā mea e faapea, o le a e lē toe tagi pe o le a e faagaloina sē e pele iā te oe. Ae e mafai ona e toe sologa lelei ai.’ Na matuā aogā iā te aʻu na upu.”

Afai ua maliu se tasi e pele iā te oe ma ua e fia maua se upu faamāfanafana, e mafai ona e maua le faamāfanafanaga, po o se tasi foʻi e te iloaina, e ala i le faitau i le polosiua e 32 itulau, Pe a Maliu se Tasi e Pele iā te Oe.

E mafai ona maua sau kopi pe a e faatumuina le kuponi o i lalo ma lafo atu i le tuatusi e pei ona taʻua, po o se tuatusi talafeagai o loo maua i le itulau 5 o lenei mekasini.

□ Ia lafo mai saʻu kopi o le tusi e pei ona taʻua inei.

□ Ia faafesootaʻi mai aʻu e tusa ai ma le faia o saʻu lesona faale-Tusi Paia e aunoa ma se totogi.