Pe Mafai Ona Faasaoina Lau Faaipoipoga?

Na iloa e tagata e ana le fale ua matuā faalētonu le tulaga o le fale, ae ua la filifili e toe faaleleia.

PE E te manaʻo e faapena foʻi lau faaipoipoga? Afai o le tulaga lenā, o fea e amata mai ai? Faataʻitaʻi fautuaga o loo mulimuli mai.

1 Fai se faaiʻuga.

Ia lua malilie ma galulue faatasi e toe faafoʻisia le filemu o le lua aiga. Taumafai e tusi i lalo lua faaiʻuga e fai. Pe a taumafai e toe faalelei le lua aiga, o se taumafaiga e ao ona fai faatasi.—Failauga 4:9, 10.

2 Ia iloa le faafitauli.

O le ā le mea ua faalētonu i lau faaipoipoga? Tusi i lalo i se fuaiupu se tasi, se uiga e lē o maua pe e te manaʻo e sui. (Efeso 4:22-24) Ia e malamalama, atonu o le faafitauli o loo taʻua e ese mai le faafitauli o loo tusi e lau paaga.

3 Faatū se sini.

O le ā le ituaiga faaipoipoga e te manaʻo e iai i le ono masina mai le taimi lenei? O ā ni faaleleiga patino e te manaʻo e fai? Tusi lou sini i se pepa. Pe a e iloa lelei le mea e te manaʻo e fai, o le a faigofie la lou sini.—1 Korinito 9:26.

 4 Faatatau fautuaga a le Tusi Paia.

O le taimi lava e te iloa ai lou faafitauli ma ua tonu i lou mafaufau ni faaleleiga e te manaʻo e fai, ona vaai loa lea i le Tusi Paia mo se fautuaga. E aogā pea taʻiala o loo iai. (Isaia 48:17; 2 Timoteo 3:17) O se faataʻitaʻiga, ua timaʻi oe ma lau paaga e le Tusi Paia ia fefaamagaloaʻi. Ioe, ua faapea mai le Tusi Paia, ‘e matagofie le lē manatua o le agaleaga.’—Faataoto 19:11; Efeso 4:32.

E tusa lava pe lē taulau au taumafaiga i le taimi muamua, ae aua e te fiugofie! Na lipotia mai e le tusi, The Case for Marriage ni iʻuga lelei o se suʻesuʻega na faia e faapea: “E faateʻia ni iʻuga na maua: e 86 pasene o ulugalii na lē fiafia a latou faaipoipoga ae na tumau pea e ui i faafitauli, na iloa na fiafia atu a latou faaipoipoga i le lima tausaga mulimuli ane ai.” E oo lava i ulugalii na faapea mai na lē fiafia a latou faaipoipoga, na matuā suia lava.

Atonu o faapena foʻi lou tulaga. Ua iloa e Molimau a Ieova o loo lomia lenei mekasini, ua aumaia e le Tusi Paia taʻiala aogā mo ulugalii faaipoipo. O se faaaʻoaʻoga, ua faaleleia faaipoipoga pe a agalelei, alofa mutimutivale ma fefaamagaloaʻi paaga. Ua iloa e avā le tāua o le faaalia o le “agaga agamalu,” ma ua tofo tane i aogā o le lē soona feita i a latou avā.—1 Peteru 3:4; Kolose 3:19.

Ua aogā nei taʻiala faale-Tusi Paia ona o Lē e Ana le Tusi Paia o Ieova le Atua, na ia amataina faaipoipoga. Aiseā e te lē fesili atu ai i Molimau a Ieova mo nisi faamatalaga i le auala e fesoasoani ai le Tusi Paia i lau faaipoipoga? *

[Faaopoopoga i lalo]