Le Manatu o le Tusi Paia

Po o Aogā Pea Vaega Uma o le Tusi Paia?

“E pau le aogā o le Tusi Paia mo tagata i aso nei, e na o le taliina o ni fesili i taaloga i le TV.”

“O mau o le Tusi Paia e faatatau i gafa o aiga, o le tulaga mamā o se tasi, ma le mataʻu i le Atua, e na o le vaitaimi lenā na fetaui ai ae ua tau lē aogā i le senituri lona 21.”

“Ua leva lava ona lē toe aogā le Tusi Paia a o leʻi taitai ona lomiaina.”

O FAAMATALAGA na na maua i le Initaneti i se taimi lata mai nei, a o iloiloina le fesili “Po ua tuai ma lē toe aogā le Tusi Paia?” O le ā sou manatu i na faamatalaga? Pe e te ioe i ai?

Atonu e te lē ioe i na faamatalaga lē saʻo e faatatau i le Tusi Paia, ae o loo iai pea ni ou masalosaloga po o aogā vaega uma o le Tusi Paia. O le Tusi Paia ua faaaogā e le tele o lotu, ua vaevaeina i le Feagaiga Tuai ma le Feagaiga Fou, e foliga mai ua tuai le silia i le 75 pasene o le Tusi Paia.

E leai se tasi o faatinoina pea taulaga i manu, e pei ona taʻua i le Tulafono a Mose. O le ā se aogā o le faamaumauina o na faamatalaga e faatatau i taulaga i le tusi o Levitiko? (Levitiko 1:1–7:38) Ae e faapefea uluaʻi mataupu o le 1 Nofoaiga a Tupu, o loo taʻua ai gafa o aiga? (1 Nofoaiga a Tupu 1:1–9:44) Pe afai e lē mafai e se tasi i aso nei ona suʻe lona gafa e tau i se tagata o loo taʻua i na mataupu, pe e iai ea la se aogā?

Seʻi faapea e te tago e tau se moli mai i le laau o le moli. O lea ua e uuina le moli, po ua lē aogā la le laau na tau mai ai le moli? E leai, aemaise pe a e fia ʻai i nisi moli! O le Tusi Paia, e tai pei o lenā laau. O nisi o vaega o le Tusi Paia, e pei o le Salamo ma le Lauga a Iesu i luga o le Mauga, e tele ina faitauina e tagata ma e “fiafia” i ai. E ui lava e tatou te faatāuaina na vaega, e pei ona tatou fiafia i se fualaau ʻaina, ae po o lona uiga ea o le a tatou lafoʻia isi vaega? O ā fā a le Tusi Paia e faatatau i lenei mataupu?

Na tusia e le aposetolo o Paulo lana tusi lona lua iā Timoteo i le pe tusa o le 65 T.A., e faamanatu i ai e faapea: “Na e iloa foʻi tusitusiga paia talu ona e laʻitiiti, lea e mafai ona faapotoina ai oe mo le faaolataga e ala i le faatuatua e tusa ai ma Keriso Iesu.” Ona toe faapea atu lea o Paulo: “O Tusitusiga Paia uma e mai i le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu.” (2 Timoteo 3:15, 16) Ina ua tusi Paulo e faapea “o Tusitusiga Paia uma e mai i le agaga o le Atua, ma e aogā,” pe e na o le Feagaiga Fou na faasino i ai lana faamatalaga?

Seʻi mātau mai upu a Paulo e faatatau iā Timoteo i lona iloa o “tusitusiga paia talu ona . . . laʻitiiti.” Pe afai e moni manatu o nisi tagata e faapea, na silia ma le 30 tausaga o Timoteo i le taimi na tusia ai le tusi a Paulo, o lona uiga na laʻitiiti Timoteo i le taimi na maliu ai Iesu. O lona uiga la, e leʻi tusiaina le Feagaiga Fou, po o Tusitusiga Eleni. O le tinā o Timoteo o le Iutaia, o lona uiga o tusitusiga paia lea na ia aʻoaʻoina ai Timoteo a o laʻitiiti, e lē taumatea o le Feagaiga Tuai, po o Tusitusiga  Eperu. (Galuega 16:1) O le faamatalaga a Paulo e faatatau i “Tusitusiga Paia uma,” e lē taumatea na aofia ai le Feagaiga Tuai atoa, lea na iai tulafono i taulaga ma gafa o aiga.

E iai aogā o vaega na o le Tusi Paia iā i tatou, e ui ua silia i le 1,900 tausaga talu ona tusiaina. Muamua lava, semanū e tatou te lē mauaina le Tusi Paia, pe ana faapea e lē faamautinoa e le Atua e tusia ma faasaoina e le nuu na ia filifilia. (Roma 3:1, 2) I ona pō o Isaraelu anamua, e lē gata na avea le Tulafono a Mose ma tusitusiga paia mo tupulaga i le lumanaʻi, ae na avea foʻi ma tulafono faavae a lenā nuu. O vaega auʻiliʻili o le Tulafono lea e foliga mai ua lē toe aogā i o tatou aso, na tāua tele i le faamaopoopoina ma le faasaoina o le nuu o Isaraelu anamua. Na tāua foʻi tala o gafa o loo faamaumauina i le Tusi Paia ina ia iloa ai le Mesia, lea na valoia o le a tupuga mai i le gafa o le tupu o Tavita.—2 Samuelu 7:12, 13; Luka 1:32; 3:23-31.

E ui lava ua lē o toe ola Kerisiano i lalo o le Tulafono a Mose, ae e tatau ona latou faatuatua i le Mesia na valoia mai, o Iesu Keriso. O gafa anamua o loo maua pea i le Tusi Paia, ua faamaonia ai o Iesu “o le atalii o Tavita” lea na folafolaina mai. O faamatalaga e faatatau i taulaga, e faaloloto ai lo tatou talisapaia o le taulaga sili ona tāua a Iesu, ma tatou faatuatua ai i le tāua o lenā taulaga.—Eperu 9:11, 12.

Na tusi Paulo i le faapotopotoga Kerisiano i le uluaʻi senituri i Roma, e faapea: “O mea uma na tusia i aso ua mavae, na tusia e faatonu ai i tatou, ina ia tatou maua le faamoemoe e ala i lo tatou tumau, ma le faamāfanafana mai o Tusitusiga Paia.” (Roma 15:4) Ua faamanatu mai e lenei mau iā i tatou, na tusia le Tusi Paia ina ia aogā iā i tatou, ma e iai foʻi isi aogā. Ua silia i le 3,500 tausaga o faatonutonu, taʻitaʻia, ma faasaʻoina e le Tusi Paia tagata o le Atua i le toafa i Sinai, le Nuu Folafolaina, a o faaaunuua i Papelonia, i le pulega a Roma, e oo mai lava i aso nei i le lalolagi aoao. E leai lava se isi tusi ua faataunuuina lenā mea. E pei o aa o le laau o le moli, atonu e faafaigatā i le taimi muamua ona tatou iloa le tāua o nisi o vaega o le Tusi Paia. Atonu e manaʻomia ona tatou saʻiliʻili atili ina ia iloa ai lona tāua, ma e matuā tauia lava a tatou taumafaiga!

PO O E TAUMĀNATU EA I NISI TAIMI?

● O le ā le umi talu ona iloa e Timoteo “tusitusiga paia”?—2 Timoteo 3:15.

● O ā vaega o le Tusi Paia e mai i le agaga o le Atua ma e aogā?—2 Timoteo 3:16.

● E faapefea ona tatou maua aogā mai i “mea uma na tusia i aso ua mavae”?—Roma 15:4.

[Ata i le itulau 25]

O faamatalaga a le Tusi Paia e faaloloto ai lo tatou talisapaia o le taulaga a Iesu