Ua Fesili Mai Talavou

Aiseā e Popole ai Fua i Loʻu Soifua Mālōlōina?

Tuu se faailoga ✔ i autafa o se sini o e fia ausia.

◯ Faalusi pauna

◯ Ia faaleleia ou foliga

◯ Ia maua le malosi

◯ Ia mataalia

◯ Faaitiitia le popole

◯ Pulea le ita

◯ Ia fiafia

E IAI mea i le olaga e lē mafai e oe le talavou ona faia i ai sau filifiliga: o ou mātua, o ou tei, ma le mea e te nofo ai. Ae e ese ai lou soifua mālōlōina. E faalagolago lou malosi i lou fausaga, ma lau filifiliga i le auala e te ola ai. *

Atonu e te faapea mai, ‘Aua le popole fua o lea ou te laʻitiiti.’ Pe e moni lenā manatu? Seʻi toe tagaʻi foʻi i le lisi o sini o loo i luga. E fia ni sini na e filifilia? O le ki tāua i le ausia o na sini, o le soifua mālōlōina lelei.

O le mea moni, atonu e pei ou lagona o lagona o Amber * e 17 tausaga na faapea mai, “E lē mafai ona ou ʻai i taimi uma i le falaoa enaena, ma meaʻai e leai se gaʻo ma se suka!” Ae aua le popole, e lē manaʻomia ona tuu mea suamalie pe tamoʻe i vaiaso uma. E na o ni nai suiga lava e te faia, ona e malosi ai lea ma e aulelei ai. Seʻi o tatou vaai i taumafaiga a isi talavou.

ʻAi Meaʻai Tatau ma Aulelei Ai!

Ua fautuaina i le Tusi Paia le pulea lelei o a tatou masaniga. Ua fai mai le Faataoto 23:20, ‘Aua le soona ʻai tele.’ E lē faigofie ona mulimuli i lenā fautuaga.

● “E pei aʻu o isi talavou, ou te fia ʻai i taimi uma. Fai mai oʻu mātua, e lē iloa po o fea e ʻai i ai aʻu meaʻai!”—Anetelū, 15 tausaga.

● “E foliga mai e lē o afāina i le taimi nei, ona e lē o aafia aʻu i mea ʻai ia ou te ʻai ai.”—Danielle, 19 tausaga.

Pe e manaʻomia ona pulea lau ʻai? O tala ia a nisi talavou i meaʻai e aogā iā i latou.

 A maʻona loa tuu. Ua fai mai Iulia e 19 tausaga, “Sa masani ona ou mātau le tele o aʻu mea e ʻai i le aso, ae i le taimi nei, ou te maʻona loa, tuu.”

ʻAi meaʻai e aogā i le tino. Ua fai mai Pita e 21 ona tausaga, “Ina ua tipi laʻu inu faguinu, e sefulu oʻu pauna na paʻū i le masina!”

Sui se masaniga leaga. Ua fai mai Erin e 19 tausaga, “Ou te taumafai ua lava le asu faatasi o laʻu meaʻai.”

Le Auala e Taulau Ai: Aua le fai ma misi au ʻaiga! E mole ai lou manava ma e soona ʻai ai.

Faagaoioi Lou Tino ma Malosi Ai!

Ua taʻua i le Tusi Paia: ‘E aogā le faamalositino.’ (1 Timoteo 4:8) Peitaʻi, e lē toʻatele ni talavou e fiafia i le faamalositino.

● “A o ou iai i aʻoga maualuga, o le toʻatele ia o talavou e leʻi pasi le faamalositino. Ae tutusa lava le faigofie o le faamalositino, ma le faigofie o le ʻai o le ʻaiga o le aoauli!”—Risati, 21 tausaga.

● “Ua manatu nisi, ‘E maʻimau fua le taimi e fetamoʻeaʻi ai i le vevela o le lā, ae e faigofie lava ona fai se taaloga vitiō ona pei lava lea o la e fai au faamalositino.’”—Ruta, 22 tausaga.

Pe e te lagona le lē lavā pe a taʻu le upu “faamalositino”? Ia, e tolu aogā o lou toʻaga e faamalositino.

Aogā 1. E faamalosia ai le faiga i lou tino e puipuia ai faamaʻi. Ua fai mai Rasela e 19 tausaga. “E masani ona fai mai loʻu tamā, ‘E te iloa lava le leaga o lou paiē e faagaoioi lou tino, pe a e maʻi.’”

Aogā 2. E faamatuu mai ai e le faiʻai vailaau e te lagona ai le toʻa. Fai mai Emily e 16 tausaga, “E aogā, pe a tele mea ou te popole ai. E faafouina ai loʻu tino ma loʻu mafaufau.”

Aogā 3. E atili ai ona e fiafia. Fai mai Ruta e 22 tausaga, “O loʻu fiafia ia i le natura, ma o laʻu faamalositino e aofia ai le savali, aau, faasee i le aisa, ma le tiʻetiʻe uila.”

Le Auala e Taulau Ai: A itiiti mai, ia faatolu i le vaiaso ona fai au faamalositino mo le 20 minute, i le faia o se mea e te fiafia i ai.

A Lava Lau Moe, e Lelei ai Au Mea e Fai!

Ua faapea mai le Tusi Paia: “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.” (Failauga 4:6) A lē lava lau moe, e lē lelei au mea e fai!

 ● “A lē lava laʻu moe, e lē lelei saʻu mea e fai, ma e faigatā ona uaʻi lelei i se mea!”—Rasela, 19.

● “E oo ane i le aoauli, ua ou fia moe lava, ma e talanoa mai lava tagata a ua ou moe!”—Kristine, 19.

Po o lava lau moe? O mea nei ua fai e isi talavou.

Ia vave ona moe. Ua fai mai Katerina e 18 tausaga, “Ou te taumafai e vave ona moe i le pō.”

Tipi le talanoa umi. Ua fai mai Risati e 21 tausaga, “O nisi taimi e vili pe text mai aʻu uō i le leva o le pō, ae ua ou iloa faamuta le talanoaga ae ou moe.”

Ia tausisi i le taimi e moe ai. Ua fai mai Jennifer e 20 tausaga, “O lea ua ou taumafai e tausisi i le taimi ou te moe ma ala ai, i aso taʻitasi.”

Le Auala e Taulau Ai: Taumafai ia maua le valu i le sefulu itula e te moe ai i pō taʻitasi.

O ā mea o na mea e tolu, e manaʻomia ona faaleleia i lou olaga?

◯ meaʻai ◯ faamalositino ◯ moe

Tusi i lalo se sini e aogā i au taumafaiga i na vala.

․․․․․

E tele aogā e te maua i le faia o nai laasaga faigofie e tausia ai oe lava. Ia manatua, a e maua le soifua mālōlōina, o le a e malosi ma aulelei ai, ma lelei ai au mea e fai. Ona e ese ai mai isi mea o le olaga, e iai lau vaega e faia i le faaleleia o lou soifua mālōlōina. Ua fai mai Erin e 19 tausaga, “O lou soifua mālōlōina, e faalagolago iā te oe.”

Ua iai nisi mataupu i le faa-Peretania o le faasologa “Ua Fesili Mai Talavou” e maua i le Initaneti i le www.watchtower.org/ype

[Faaopoopoga i lalo]

MEA E MAFAUFAU I AI

● E faapefea ona e maua le fiafia pe a lelei lou soifua mālōlōina?

● E faapefea ona e faaalia le mafaufau lelei e tusa ma lou soifua mālōlōina?—Filipi 4:5.

[Pusa/Ata i le itulau 21]

TALA A ISI TALAVOU

“E pei le tino o le tagata o le tino o se taavale, e tatau i lē e ana ona tausia lelei. O le mea lenā ou te fiafia ai e fai faamalositino.”

“E lelei le iai o se paga e lua te faamalositino faatasi ona e faigatā ona e lē tausia lau upu.”

“Ou te fiafia i lagona e oo mai pe a ou faamalositino. Ae e sili ona ou fiafia iā te aʻu lava, pe a faaleleia ai ma oʻu foliga vaaia!”

[Ata]

Etano

Briana

Emily

[Pusa i le itulau 22]

“NA SUIA AʻU MASANIGA NA OLA AI”

“E oo ane i le ono o oʻu tausaga ua amata ona ou puta. Sa faasolo foʻi ina ou ʻai i va o ʻaiga, ma oo ai ina faalausosoo! Ae ou te leʻi fiafia e faagaoioi loʻu tino. E leʻi umi ae ua ova loʻu mamafa e ui o lea ou te talavou, o se mea ou te leʻi manaʻo i ai. Ou te leʻi fiafia i loʻu puta ma lagona na oo mai ai! Sa ou taumafai i nisi taimi e faalusi oʻu pauna i le tipi o laʻu ʻai, ae na iʻu lava ina ou toe puta. O lea, ina ua 15 oʻu tausaga, na ou filifili ai loa e fai saʻu taumafaiga maʻoti. Na ou manaʻo ia faalusi oʻu pauna, ma faia loa i se auala e aogā i loʻu olaga atoa. Na ou faatauina se tusi o loo faamatala mai ai taumafa tatau ma faamalositino talafeagai, ma faaaogā loa manatu na ou maua mai ai. Sa ou manatu, e tusa lava pe faalētonu aʻu taumafaiga nisi taimi, ae ou te taumafai pea. Ma na aogā aʻu taumafaiga. E tusa ma le 60 oʻu pauna (25 kg) na lusi i le tausaga. Ua lua nei tausaga e lē o suia loʻu mamafa. E leʻi iai soʻu manatu e taulau aʻu taumafaiga! Ae ou te iloa na mafai ona ou taulau, ona e lē gata ina tipi laʻu ʻai, ae ua suia foʻi aʻu masaniga sa iai. Ina ua ou malamalama e faapea, o suiga o le a ou faia e aafia ai vala uma o loʻu olaga, sa ou fiafia ai loa e faia suiga talafeagai sa tatau ona ou faia.”—Katerina, 18 tausaga.

[Ata i le itulau 22]

Ua pei lou soifua mālōlōina o se taavale, a lē tausia lelei, e iʻu ina faalētonu