“E Aogā i Ē e Logonoa le Suʻesuʻe o le Tusi Paia”

O LE ulutala lenā o se mataupu na lomia i se mekasini mo ē logonoa i le Malo o Czech. Na viiviia ai e Zdeněk Straka, o lē na tusia le mataupu, Molimau a Ieova i a latou taumafaiga e fesoasoani i ē e logonoa e ala i le aʻoina o la latou gagana.

Aiseā na tusia ai Straka lenei mataupu? I le taumāfanafana o le 2006, na auai o ia i le tauaofiaga a Molimau a Ieova i le aai o Prague, ma sa faaliliuina ai le polokalame mo tagata logonoa e toʻa 70 na auai. I tausaga taʻitasi, e faia ai tauaofiaga a Molimau a Ieova i le lalolagi aoao ina ia aʻoaʻoina ai le ʻauuso ma maua ai faatasiga faaleagaga. E aofia ai foʻi ma le ʻauuso logonoa. I se tausaga ua tuanaʻi, e 96 tauaofiaga na faia faapitoa  mo ē logonoa i le lalolagi aoao, ae e 95 tauaofiaga na faaliliuina ai le polokalame mo i latou.

I le taimi na faia ai le tauaofiaga i Prague, e tusa ma le 30 tagata logonoa na suʻesuʻe i le Tusi Paia faatasi ma le faapotopotoga a ē logonoa i lenā aai. E maua e i latou e suʻesuʻe i le Tusi Paia aogā, e pei ona faaalia i le mea na tupu o loo sosoo mai.

E silia ma le 60 maila (100 km) e malaga ai Makita i vaiaso taʻitasi e suʻesuʻe ma se fafine logonoa mai i Mongolia. E lē tutusa gagana logonoa a Czech ma Mongolia, ma e tele taumafaiga e faia e Makita ina ia malamalama ai lana tagata aʻoga i le suʻesuʻega. Ae ua aogā na taumafaiga. Ina ua toe maʻitaga le suʻesuʻega a Makita i lana tama lona lua, sa manaʻo o ia e faapaʻū, ae na toe sui lona mafaufau. Na fai mai Makita, “Ina ua ou fesili i ai i le māfuaaga ua toe sui ai lona mafaufau na fai mai o ia, ‘E lē fiafia Ieova i le faapaʻū tama.’ Ua ou fiafia ona ua malamalama o ia i le silafaga a Atua e faatatau i le ola!” *

E toʻatele tagata logonoa i le lalolagi aoao ua iloa le poto saʻo e uiga i le Atua, e ala i le suʻesuʻe o le Tusi Paia. Ua atili fiafia ai i le olaga ona ua latou faalatalata atu i le Atua, ma faaleleia ai o latou olaga.—Isaia 48:17, 18.

[Faaopoopoga i lalo]

[Pusa i le itulau 24, 25]

E TE SILAFIA?

● Ua faia e Molimau a Ieova DVD i gagana e 43 a tagata logonoa. E maua kopi o na polokalame mai i le Initaneti i le www.pr418.com.

● Ina ia maua lomiga mo ē e logonoa, e 59 vaega o le ʻaufaaliliu i gagana logonoa, ua faamaopoopoina e Molimau a Ieova i le lalolagi aoao.

● E sili atu ma le 1,200 faapotopotoga a tagata logonoa Molimau a Ieova i le lalolagi aoao.

[Ata i le itulau 24]

(Tagaʻi i le lomiga mo le ata atoa)

www.pr418.com