Le Manatu o le Tusi Paia

E Faapefea Ona Faasoa Lelei Aʻu Tupe?

“Ua faaitiitia loʻu totogi, a ua faateleina pili. Ou te lē moe i le pō i le mafaufau, po o le a faapefea ona tausi loʻu aiga.”—Simi.

“Ua ou lē iloa lava po o le ā le mea o le a fai.”—Sieli.

O FAAMATALAGA na e masani ona tatou faalogo i ai pe a faalētonu le tamaoaiga. Na faapea mai le faatonu o le Ofisa o le Leipa Faavaomalo, o Juan Somavia: “E lē na o Amerika ua aafia ai i le faalētonu o le tamaoaiga, a o le lalolagi atoa.”

O le faafuaseʻi ona leai o ni galuega ma leai ni tupe mo mea e manaʻomia e le aiga, e lagona ai le popole ma le leai o se faamoemoe. Na iai se taimi na oo ai foʻi lenā lagona iā Tavita. Na tatalo o ia: “Ua tele lava mafatiaga o loʻu loto. Ia e aveeseina aʻu mai i mea ou te tigā ai.” (Salamo 25:17) O le ā le tala a le Tusi Paia e uiga i o tatou aso, ma pe e mafai ona tatou maua ai le filemu ma le saogalemu?

Le Poto e Aogā i Aso Faigatā

Na valoia e le Tusi Paia e faapea, o le a faailogaina “aso e gata ai” o lenei lalolagi, i “tigā o puapuaga” ma “aso e sili ona faigatā.” (2 Timoteo 3:1; Mataio 24:8) Ua moni nei upu! Ae o loo iai pea lo tatou faamoemoe, ona ua foaʻi mai e le Atua le poto e ala i le Tusi Paia, ina ia mafai ai ona tatou fesagaʻia faalētonu o le tamaoaiga.

O se faataʻitaʻiga ua fesoasoani mai le Tusi Paia ia maua le vaaiga saʻo i tupe. Ua taʻua i le Failauga 7:12: “Ua fai le atamai ma puipuiga, ua fai foʻi tupe ma puipuiga; a o le aogā o le poto atoa ai ma le atamai, e faaolaina ai i latou ua mauaina.” E maua se puipuiga e ala i tupe, ae e na o le atamai o le Atua o loo i le Tusi Paia, e mafai ona maua ai le saogalemu moni i taimi uma. Manatu i faaaʻoaʻoga nei.

Feagai ma Faigatā Tau Tamaoaiga

Galue malosi. “E manaʻonaʻo le tagata paiē ae e leai se mea iā te ia. Peitaʻi o i latou e galulue malosi e tino lelei i latou.” (Faataoto 13:4) O le ā se lesona? Ia iloa oe o se tagata e faamaoni, ma galue mamafa. E tāua tele i pule o galuega, tagata e faigaluega lelei, ma e ono vave ona talia i galuega ma e lē vave foʻi ona vāea.—Efeso 4:28.

Mafaufau muamua a o leʻi faatauina se mea. Na fetalai Iesu: “O ai foʻi se tasi o outou  e manaʻo e fau se ʻolo, e lē muamua ea ona nofo i lalo ma faitau tupe o le a faaalu, ina ia iloa ai po ua lava mea e faauma ai?” (Luka 14:28) O loo faatatau upu a Iesu, i le mafaufau muamua pe mafai ona avea se tasi ma ona soo, ae e mautinoa, e aogā foʻi i le itu faaletino. O lea, ia fai sau lisi o mea e manaʻomia moni, ma le tupe e alu ai.

Aua le maʻimaua tupe i masaniga leaga. O mea e pei o le taalo i taaloga faitupe, ulaula, ma le faaaogā sesē o fualaau faasāina ma le inu tele, e leaga i le silafaga a le Atua.—Faataoto 23:20, 21; Isaia 65:11; 2 Korinito 7:1.

ʻAlofia le “manaʻo tele i tupe.” (Eperu 13:5) O ē e mananaʻo tele i tupe, e oo i ai faanoanoaga, ma iʻu ina “tuia ai i latou e i latou lava i le tele o tigā.” (1 Timoteo 6:9, 10) E lē gata i lea, e pologa ai ona ua lē mafai ona faamalieina le manaʻo i tupe.—Failauga 5:10.

Ia maua le lotomalie. “Auā tatou te leʻi aumaia lava se mea i le lalolagi, ma e lē mafai foʻi ona tatou aveese ai o se mea. O lea, afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.” (1 Timoteo 6:7, 8) O i latou e lotomalie i nai mea ua maua, e mafai ona ʻalofia le soona popole pe a lē lelei le tamaoaiga. O lea, ia e lotomalie e ola e tusa ma mea ua e maua.—Tagaʻi i le pusa i le itu taumatau.

E tatou te lē iloa le mea e tupu a taeao. Ua taʻua i le Failauga 9:11: ‘E tutupu faafuaseʻi mea iā i tatou uma i le taimi e leʻi faatalitalia.’ O lea la, o ē atamamai, e “lē faamoemoe i ʻoa e lē tumau, ae i le Atua,” o lē ua folafola mai i ona tagata faamaoni: “Ou te lē tuua lava oe, ma ou te lē tuulafoaʻia lava oe.”—1 Timoteo 6:17; Eperu 13:5.

PO O E TAUMĀNATU EA I NISI TAIMI?

● O le ā le tala a le Tusi Paia e uiga i o tatou aso?—2 Timoteo 3:1-5.

● O fea e maua ai taʻiala maufaatuatuaina i aso nei?—Salamo 19:7.

● E faapefea ona ou saunia se lumanaʻi saogalemu mo loʻu aiga?—Failauga 7:12.

[Pusa/Ata i le itulau 11]

AUALA E SEFE AI TUPE

Faatauga: Fai se lisi. Aua le faatauina mea e lē o iai i le lisi. Faatusatusa tau o mea, po o lē fea e sili. Faaaogā kuponi ma tupe toe faafoʻi mai. Faatau mea e manaʻomia i taimi e fai ai paʻū. Faatau sii atoa pe a mafai.

Pili a le aiga: Ia vave ona totogi pili ma maua ai le paʻū. Aua le faamasani i meaʻai ma meainu mai i faleʻaiga, ma ia fuafua le taumafa ma le inu ʻava. Tapē le moli ma isi mea e alu i le uila pe a lē faaaogāina. A fau sou fale, faaaogā mea tali vevela ma tali mālūlū i taualuga ma vā o puipui. Faaaogā mea e lē ʻai uila. Ia fuafua le fale i le toʻatele o le aiga.

Taavale: Afai e manaʻomia sau taavale, faatau se taavale e lē ʻai penisini ma lē leaga soo. E lē seʻi iloga o se taavale fou. Ia fai feʻau uma e faaaogā ai le taavale i le taimi e tasi, ma fuafua ia tasi le taavale e faaaogā. A lē o lenā, faaaogā pasi, savali, pe alu i se pasika po o se uila. A ō e tafafao, aua le ō mamao.

Telefoni ma faafiafiaga: Pe e te manaʻomia le telefoni i le fale ma le telefoni feaveaʻi? Afai e iai telefoni feaveaʻi a lau fanau, aua le soona faaaogāina, pe atonu foʻi e lē manaʻomia. Afai e tele ni ala ata faapitoa i le TV o totogi, ae ā pe a faaitiitia ma faaitiitia ai foʻi ma le pili? * Ō i le faletusi e aumai ai tusi faitau, ae aua le faatauina.

[Faaopoopoga i lalo]