Sauniuni mo Faafitauli

“Na ou filifili e tuu laʻu ulaula ona o le soifua mālōlōina o la ma pepe fou. Ona ou faapipii lea o se faailoilo i lo ma fale, ‘E Sā le Ulaula.’ Ae e na o le tasi le itula, a ua toe oso mai e pei o se sunami loʻu manaʻo i se tapaa, ma tutu loa.”—Yoshimitsu, i Iapani.

E PEI ona faaalia i le tulaga o Yoshimitsu, e iai faafitauli o le taumafai e tuu le ulaula. E lē gata i lea, ua faaalia i suʻesuʻega, e toetoe lava o le 90 pasene o i latou na tuu le ulaula, ua toe ulaula. O lea, afai o loo e taumafai e tuu, e te mafaia pe a e sauniuni mo faafitauli. O ā faafitauli e masani ona tulaʻi mai?

Le manaʻo i le nikotini: E sili ona malosi lou toe fia ulaula i le tolu o aso talu ona tuu lau ulaula, ma faatoʻā faaitiitia pe a mavae vaiaso e lua. Ua fai mai se tagata na ulaula muamua, “e fesuisuiaʻi le malosi o le manaʻo” i lenā taimi. E oo lava i tausaga mulimuli ane, e faafuaseʻi ona toe oso mai. Aua e te vavevave, ae faatali mo sina lima minute, e toe mou atu ai le manaʻo.

O isi aafiaga o le tuu o le ulaula: I le taimi muamua, e lagona le fia moe ma ua lē uaʻi lelei i se mea, ma ua amata ona e puta. E lagona foʻi le tigā o le tino, mageso, afu, tale, lē lava le onosaʻi ma maitaita, ma mafatia ai. Ae o le tele o na lagona, e mou atu pe a mavae le fā i le ono vaiaso.

E iai mea aogā e mafai ona e faia i lea taimi faigatā. O se faaaʻoaʻoga:

● Ia lava le moe.

● Toʻaga e inu vai ma sua o fualaau ʻaina. ʻAi meaʻai paleni.

● Faagaoioi le tino.

● Mānava tele i totonu ma faaata i lou mafaufau le ʻea mamā o loo faatumu ai ou māmā.

Faafitauli: E faatatau i gaoioiga ma lagona e toe oso ai lou fia ulaula. O se faataʻitaʻiga, atonu e masani ona ula sau sikaleti pe a e inu. Afai o e manaʻo e tuu lau ulaula, aua le inu faaumiumi. E sau se aso e mafai ai ona inu faaumiumi, ae tuu muamua lau ulaula.

Peitaʻi, e fai lava ma e lagona le fia ula, e ui e lē o toe iai se nikotini i lou tino. Na faapea mai Torben lea na taʻua muamua, “Ua sefulu iva tausaga talu ona tuu laʻu ulaula, ae oso mai lava le fia ulaula pe a ou mālōlō e inu laʻu kofe.” O lea, e iai le taimi e mou atu ai lagona o le fia ulaula, e masani ona oso aʻe pe a inu lau kofe pe faia isi mea.

Ae e ese ai la le ʻava malosi. A o e taumafai e tuu le ulaula, e manaʻomia foʻi ona e faamamao mai i le ʻava malosi ma ʻalofia nofoaga o loo faatau ai, ona e toʻatele tagata e toe fetagofi i le tapaa, pe a inu. Aiseā?

● E tusa pe itiiti le ʻava malosi e inu, ae e oso ai le manaʻo i le nikotini.

 ● O le inu faatasi ma isi tagata, e vave lava ona toe tago ai i le tapaa.

● O le ʻava, e faasesēina ai mafaufauga lelei, ma lē pulea ai oe lava. Ua saʻo ai le Tusi Paia: ‘O le uaina, e aveesea ai uunaʻiga lelei.’—Hosea 4:11.

Aumea: Ia filifili lelei aumea. O se faataʻitaʻiga, ia ʻalofia le faatasitasi ma tagata ulaula, po o i latou e faaosooso oe e ulaula. Ia taumamao foʻi mai tagata e taumafai e faalēaogā au taumafaiga e tuu le tapaa, pe ula iā te oe.

Faalogona: Ua faaalia i se suʻesuʻega na faia, na ala ona toe ulaula le lua vaetolu o i latou na tuu le ulaula, ona ua lagona le omia pe ita. Pe a e toe fia ulaula, inu sina vai pe lamu sau pulu, pe alu foʻi e savali. Taumafai e mafaufau i mea lelei, i le tatalo i le Atua ma faitau le Tusi Paia.—Salamo 19:14.

ʻAlofia le Faia o Faamolemolega

● E na o le tasi lava si aʻu miti.

Le Mea Moni: O le miti e tasi, e mafai ona faamalie ai le 50 pasene o neula o le faiʻai i le nikotini, mo le tolu itula, ma iʻu ai foʻi ina toe ulaula.

 ● E fesoasoani le ulaula i loʻu mafatia.

Le Mea Moni: Ua faaalia i suʻesuʻega, e māfua le mafatia ona o le nikotini o le tapaa. O ni lagona ua mapu mai i le mafatia, atonu e pogai mai i se taimi puupuu na toe ulaula ai ma toe maua ai e le tino le nikotini.

● E faigatā ona tuu.

Le Mea Moni: O le lotovaivai, e mou atu ai se uunaʻiga lelei. Ua taʻua i le Tusi Paia: “Po ua e lotovaivai ea i le aso o le puapuaga? O le a itiiti lou malosi.” (Faata. 24:10) O lea, ia ʻalofia le mafaufau e faapea e te lē mafaia. E so o se tasi e manaʻo moni e tuu le ulaula, e mafai ona taulau pe a faatatau taʻiala aogā o loo iai i lenei mekasini.

● E lē faigofie āuga pe a tuu.

Le Mea Moni: E moni e lē faigofie āuga pe a tuu le ulaula, ae e iʻu lava ina teʻa pe a mavae ni nai vaiaso. O lea, aua le fiu. Afai e toe oso aʻe le fia ulaula i ni masina po o ni tausaga mulimuli ane, ia e onosaʻi, e lē umi ae toe mou atu.

● O aʻu e maʻi loʻu mafaufau.

Le Mea Moni: Afai o togafitia oe i le maʻi o le mafaufau, talosaga i lau fomaʻi e fesoasoani atu e tuu lau ulaula. O le a fiafia o ia e lagolagoina oe, i le fetuunaʻi o ou togafitiga e fua i aafiaga o lau filifiliga i lou maʻi, ma au vai o loo inu.

● A ou toe ulaula, e pei ua ou lē mafaia se mea.

Le Mea Moni: Pe a e toe ulaula, e pei ona faia e le toʻatele o loo taumafai e tuu, e lē faapea ai ua e lē mafaia se mea. Ia toe taumafai. O lou lē taumafai, e iloa ai ua e lē mafaia se mea. O lea, ia taumafai pea. E iʻu lava ina e mafaia!

Manatu i le mea na tupu iā Romualdo. E 26 tausaga o ulaula, a ua silia ma le 30 tausaga talu ona tuu. Na tusi mai o ia, “Ua ou lē mātaulia le tele o taimi na ou taumafai ai e tuu le ulaula. O taimi uma ou te toe ulaula ai, e peiseaʻī ua ou lē mafaia se mea. Ae peitaʻi, o le taimi lava na mautū ai laʻu filifiliga ina ia lelei la ma faiā ma Ieova le Atua ma tatalo atu pea mo lana fesoasoani, na mafai ai loa ona tuu laʻu ulaula.”

O le a tatou talanoaina i le mataupu mulimuli o lenei faasologa, ni nai fautuaga aogā ina ia mafai ai ona tuu lau ulaula ma e fiafia ai.

[Pusa/Ata i le itulau 7]

E OTI AI

E tele auala e faaaogā ai le tapaa. E iai mea e fai mai i le tapaa o loo faatau atu i faleoloa o vai faalenatura. Ae o le tala mai i le Faalapotopotoga o le Soifua Mālōlōina i le Lalolagi, e “so o se tapaa lava, e oti ai.” O maʻi e māfua mai i le tapaa, e pei o le kanesa ma le maʻi fatu, e oti ai le tagata. E aafia foʻi pepe e leʻi fananau mai pe afai e ulaula o latou tinā. O ā mea e fai i le tapaa?

Sikaleti tāʻai: O nei sikaleti, e taatele i atunuu o Asia. E tele atu le nikotini ma vailaau oona e maua i sikaleti tāʻai, i lo o isi sikaleti.

Sikā: O sikā, o tapaa ua afīfī i le lau tapaa, po o pepa e fai i le lau tapaa. E tusa lava pe e lē tutuina le sikā ae na ona tuu i le gutu, e faigofie ona mitiia e le tino le nikotini, i lo o le sikaleti.

Paipa: E lē sefe le ulaina o se paipa i lo o se sikaleti, auā e maua ai foʻi i kanesa eseese ma isi faamaʻi.

Paipa e tuu i ai le vai e ula ai le tapaa: E faaaogā mea nei e faaui atu ai le ausa o le tapaa i le vai, ona mimiti lea. Peitaʻi, o na faiga, e lē taofia ai le sao atu o vailaau oona, e māfua ai le kanesa i le māmā.

Kretek: O sikaleti e fai mai i fua o le atasi (myrtle). E tusa ma le 60 pasene o le tapaa ma le 40 pasene fua o atasi e faia ai. E sili atu le tā, nikotini, ma le kaponi monosaita e maua ai, i lo o sikaleti masani.

Isi ituaiga o tapaa: E aofia ai tapaa e lamu, tapaa e sogisogi ai, ma le gutkha, o se tapaa e maua i Saute i Sasaʻe o Asia. E mitiia e le tino nikotini mai i nei tapaa e ala i le gutu. Ae e mataʻutia uma lava le tapaa.

[Pusa/Ata i le itulau 8]

FESOASOANI I SE ISI E TUU

● Aua le faitio. E lelei le faamālō ma avatu se taui o ana taumafaiga ae aua le ote. E sili lou fai atu, “Ou te iloa e te mafaia pe a e toe taumafai,” i lo o le fai atu, “E te lē mafaia se mea!”

● Ia onosaʻi. Aua e te amanaʻia le maitaita o le tagata o loo taumafai e tuu lana tapaa. Ia fai atu upu alofa, “Ou te iloa e lē faigofie, ae faamālō i lou taumafai.” Ae aua e te fai atu, “E sili ai iā te aʻu pe a e toe ulaula!”

● Ia avea oe ma uō moni. Ua taʻua i le Tusi Paia: “O le uō moni e alofa i taimi uma, ma o ia o se uso ua fanau mo taimi o puapuaga.” (Faataoto 17:17) Ia onosaʻi ma ia alofa “i taimi uma” i lē o loo taumafai e tuu le tapaa, e tusa lava po o a ona uiga faaalia.