Ua Faailoa Atu le Suafa o le Atua!

● Pe a e savalivali i le Motu o Orleans e lata i le aai o Quebec i Kanata, ona e iloa ai lea o le mapolotu o i latou na uluaʻi nofoia le aai. E tele falesā laiti mai anamua, o loo iai i autafa o le auala o loo faataamilo i le aai, ma e tofu le nuu ma lona falesā.

I le taulaga o Saint-Pierre, o loo tū ai le falesā sili ona leva i Quebec, na fauina i le 1717. Ua avea nei ma fale mataaga ma e iai se vala e sili ona mataʻina ai. I luga aʻe o le aletale o le falesā, o loo iai mataʻitusi Eperu e fā o le suafa o Ieova.

I aso nei, e seāseā ona faalogo ua taʻua le suafa o le Atua i se lotu Katoliko, pe vaai foʻi i ai. O se tusi na faasalalau e le Vatikana i le 2008, na taʻua ai le poloaʻiga a le pope e faatatau i le suafa o le Atua e faapea, “ia aua neʻi faaaogāina pe taʻua” i sauniga, po o pesega ma tatalo a le lotu. Peitaʻi ua faamanino mai i le Tusi Paia, e finagalo Ieova le Atua, ia ‘faailoa atu lona suafa i le lalolagi uma.’—Esoto 9:16.

E talitonu Molimau a Ieova, e sili ona tāua le faafiafia o le Atua i lo o le tau ina faailoa o lona suafa i se falesā. E silia ma le 1.5 piliona itula e latou te faaalu i tausaga taʻitasi e aʻoaʻo ai tagata e faatatau i le suafa o le Atua ma ana fuafuaga. Ua latou toe faafoʻi le mamalu o le suafa o Ieova, i le tulaga e tatau ona iai. E faa-7,000 ona iai le suafa o Ieova i la latou lomiga O le Tusi Paia—O le Faaliliuga a le Lalolagi Fou, e tusa ai ma uluaʻi gagana. E oo mai i le taimi nei, e silia ma le 165,000,000 kopi o le Faaliliuga a le Lalolagi Fou ua lomia atoa po o sona vaega, i gagana e 83. O lea la, o le fesili tāua e faatatau i le faaaogāina o le suafa o Ieova, Aiseā e lē faaaogāina ai?

[Ata i le itulau 28]

Le Faaliliuga a le Lalolagi Fou, o loo iai le suafa o Ieova e 7,000 taimi, ma ua lomia atoa po o sona vaega i gagana e 83