E Faapefea Ona Ou Ausia O‘u Sini?
Ua Fesili Mai Talavou
E Faapefea Ona Ou Ausia Oʻu Sini?
O LĒ fea o mea nei e te manaʻo ia e mauaina?
● Lagona o le mautinoa
● Ia tele ni uō
● Olaga fiafia
O le mea moni, e mafai ona e mauaina uma na mea e tolu! E faapefea? E ala i le faatutū o ni ou sini ma ausia. Seʻi mafaufau i mea nei.
Lagona o le mautinoa Pe a e faatutūina sini faigofie ma ausia, e mautinoa o le a e ausia foʻi sini faigatā. E te lagona ai foʻi le mautinoa a o feagai ma faafitauli o aso taʻitasi, e pei o le tetee atu i omiga mai i isi. O le a mātauina e isi lou lototele, ma o le a latou faaaloalogia ai oe ma lē toe faalavelave mai. O lea, latou te ono viiviia ai oe.—Faatusatusa i le Mataio 5:14-16.
Ia tele ni uō E manaia foʻi le faatasitasi ma ē ua faataatitia ni o latou sini, ma ua lotomalilie e galulue ina ia ausia. Pe a fiafia mai tagata iā te oe ona o ou sini, o le a latou lagolagoina oe ia ausia na sini.—Failauga 4:9, 10.
Olaga fiafia O le mea saʻo lava ia, e leai se fiafia e maua i le na o le nofonofo ma faatalitali seʻi tupu se mea lelei i lou olaga. Ae e te lagona le fiafia, pe a e ausia sini na faatutūina. E lētioa faapea mai Paulo, o se Kerisiano o le uluaʻi senituri: “E lē o faalētonu laʻu tamoʻe.” (1 Korinito 9:26) Ia manatua foʻi, pe a e ausia se sini faigatā, e te matuā fiafia!
Po ua e sauni? Ua lelei. ʻOti ese le itulau i le itu taumatau, gaulua ma fai mea o loo tusia ai. *
Ua iai isi mataupu i le faa-Peretania o le faasologa “Ua Fesili Mai Talavou” e maua i le Initaneti i le www.watchtower.org/ype
[Faaopoopoga i lalo]
^ pala. 11 E aogā nei fautuaga mo sini faigofie, lea e mafai ona ausia i ni nai vaiaso po o ni masina, ae e aogā foʻi mo sini faigatā.
MEA E MAFAUFAU I AI
● Pe e leaga le taumafai e ausia sini e tele i le taimi e tasi?—Filipi 1:10.
● Pe e uiga atu le faataatitia o sini, i le faatulaga o mea uma e te faia i minute taʻitasi?—Filipi 4:5.
[Pusa/Ata i le itulau 15, 16]
1) Auala e ausia ai ou sini Faataoto 4:25, 26
IA ILOA
“Aua e te fefe e faatutū ni sini faigatā. Pe afai na ausia e isi na sini, e te mafaia foʻi la.”—Roben.
1. Mafaufau i sini e mafai ona e ausia. Ave ifo se fasi pepa, ona tusi lea i lalo o sini uma e te mafaufau i ai. Vaai pe mafai ona e tusia ni sini a lē itiiti ifo e 10 pe 20.
2. Iloilo ou sini. O lē fea sini e sili ona e fiafia i ai? O le ā le sini e sili ona faigatā? O lē fea sini o le a e matuā mitamita pe a ausia? Ia manatua, o sini e sili ona lelei, o sini ia e tāua tele iā te oe.
3. Faamuamua sini e tāua. Ia filifili muamua ni sini e mafai ona e vave ausia. Ona filifili lea o ni sini e fai si umi ona faatoʻā ausia lea (atonu e vaiaso po o ni masina faatoʻā ausia). Ia faatulaga lelei na sini i le faasologa e te manaʻo e ausia ai.
Faataʻitaʻiga
Faigāuō Ia maua se uō e eseese lo ma matutua. Toe amata se faigāuō sa iai muamua.
Soifua mālōlōina Faamalositino mo le 90 minute i vaiaso taʻitasi. Ia valu itula o le pō e moe ai.
Aʻoga Faaleleia oʻu togi i le matematika. Ia fai le mea saʻo pe a faaosoosoina e kopi i se suʻega.
Itu faaleagaga Faitau le Tusi Paia mo le 15 minute i aso uma. Taʻu atu i se tamaitiiti o le vasega oʻu talitonuga i lenei vaiaso.
2) Ia Fuafua“E lelei sini, ae e te manaʻomia foʻi se fuafuaga ina ia ausia ai. Auā a leai, e lē taitai ona e ausia na sini.”—Derrick.
I sini taʻitasi uma e te filifilia, ia fai mea nei:
1. Tusi i lalo lou sini.
2. Faatulaga le aso e ausia ai. Auā afai e lē faia faapea, o le a lē taitai ona ausia lenā sini.
3. Fuafua mea e aofia ai.
4. Iloa faafitauli. Ona mafaufau lea i le auala e foʻia ai na faafitauli.
5. Saini. Ia taʻutino o le a e faia le mea sili e te mafaia ina ia ausia ai lenei sini. Saini loa ma tusi le aso na saini ai.
Aʻoaʻo le gagana Iapani mo laʻu malaga i Iapani Iulai 1
Mea e fai
1. Ia maua se tusi o le gagana Iapani.
2. Aʻoaʻo ni upu fou se 10 i vaiaso taʻitasi.
3. Faalogologo atu i isi tagata a o tautatala i le gagana Iapani.
4. Fesili atu i se isi e faasaʻo mai laʻu kalama ma le faaleoina o upu.
Faafitauli
E leai se tasi i loʻu vaipanoa e tautala i le gagana Iapani
Le auala ou te foʻia ai
Puʻe ni lipine o le auala e tautala ai i le gagana Iapani, mai i le Initaneti i le www.pr418.com.
․․․․․ ․․․․․
Saini Aso
3) Ia Faatino! Ioane 13:17
“E masani lava ona toe tuu e nisi o latou sini ia fai i se isi taimi, o lea, ia taumafai pea e ausia.”—Erika.
Amata loa. Ia fesili ifo, ‘O le ā e fesoasoani i le ausiaina o loʻu sini?’ E ui lava e leʻi fuafuaina mea uma o le a e faia, ae ia aua neʻi taofia ai oe mai le amataina. E pei ona taʻua i le Tusi Paia: “O lē e matamata i le matagi e lē lūlū fatu o ia; o lē foʻi e vaavaai i ao e lē selesele lava o ia.” (Failauga 11:4) Ia amata loa i le asō ona tuliloaina lou sini.
Toe iloilo i aso taʻitasi ou sini. Ia mafaufau i le māfuaaga e tāua ai ou sini taʻitasi. Ina ia iloa le lelei o au taumafaiga, ia faailoga pe faamau le aso na e ausia ai mea taʻitasi na tusia i lalo.
Ia fetuutuunaʻi. E tusa lava pe lelei au fuafuaga, e ao lava ona faia ni suiga a o faagasolo taimi. E leai se leaga o i ai. A lē mafai ona e tausisi i lau faasologa, aua e te popole. Ia galue pea ina ia ausia le sini autū.
Seʻi mafaufau. Seʻi faapea nei ua e ausia lou sini. Ua e lagona le fiafia ona ua taulau au taumafaiga. Toe manatu i mea taʻitasi na e faia ina ia ausia ai lenei sini. Ia mafaufau i le auala na e faia ai na mea, ma le lagona o le faamalieina ua e ausia lou sini. Ia faia loa!
[Ata]
Ua pei sini o se ata o se fale, lea e ao ona galue mamafa ina ia tino mai!
[Pusa/Ata i le itulau 15]
4) TALA A ISI TALAVOU
“E faigofie lava ona lotovaivai pe a leai se mea e tepa taulaʻi i ai. Ae pe a faataatitia ni sini ma ausia, o le a e lagona le lotofiafia.”—Reed.
“Aua e te tuuaʻia fua oe pe a lē ausia le sini i le auala sa e mafaufau i ai po o le taimi na e manaʻo i ai. E lē aogā le manatu faapena. Ia taumafai pea.”—Cori.
“Talatalanoa atu i ē na ausia sini ia e te manaʻo foʻi e ausia. E latou te avatu ni fautuaga aogā e faalaeiauina ai oe. Ia taʻu atu foʻi ou sini i lou aiga, ina ia mafai ai ona latou lagolagosua iā te oe.”—Julia.
[Ata i le itulau 14]
(Tagaʻi i le lomiga mo le ata atoa)
ʻOti
Gaulua