Ia Iloa Māfuaaga o Lagona o le Tuua Toʻatasi

O LAGONA o le tuua toʻatasi, e lē tutusa ma le nofonofo toʻatasi. E tusa ai ma se lomifefiloi, o lagona o le tuua toʻatasi “e masani ona e moomoo ia iai nisi e tou te faifaimea faatasi.” Ae ua taʻua ai foʻi, o le nofonofo toʻatasi, o “se tasi ua vavaeese mai isi . . . ona e manaʻo ai.”

O lea la, o le nofonofo toʻatasi o se mea e manaʻomia i nisi o taimi, pe a tatalo ma mafaufau loloto, e pei ona sa faia e Iesu Keriso. (Mataio 14:13; Luka 4:42; 5:16; 6:12) Peitaʻi, o faalogona o le tuua toʻatasi, o se lagona tigā. O le ā le pogai o le lagona o le tuua toʻatasi?

● Lagona le Tuua Toʻatasi i Aai Tumutumu

I aai tetele, e faitau afe pe faitau miliona tagata e nonofo ai. Ae e ui i lea, e iai pea lagona o le tuua toʻatasi. O le pisi tele o olaga i aai tetele, ua lē masani ai le toʻatele o tagata i o latou tuaoi, ma iʻu ai ina lē talitonuina ma lagona ai le lē malupuipuia, ma ua faateleina ai lagona o le tuua toʻatasi.

● Faileagaina o Tagata Faigaluega

O auala o loo faagaoioia ai pisinisi tetele ma falegaosimea, ua oo ai i le toʻatele o tagata faigaluega lagona o le tuua toʻatasi ma le lē agavaa. Ua oo ai foʻi iā i latou le mafatia ma le popole.

O le fesiitaʻi solo o tagata faigaluega i kamupani tetele, ua latou lagona ai le lē saogalemu ma le tuua toʻatasi. Ua taʻua e le nusipepa o le International Herald Tribune, o le toʻatele o tagata faigaluega e pule i ola i nisi kamupani i Falani, ua māfua ona ua “faamalosia e faia galuega e latou te lē gafatia, talu ai suiga i le tamaoaiga.”

● Fesootaʻi ae Lē Fevaaiaʻi

Na faapea mai Tetsuro Saito, o se polofesa Iapani: “O le a faaitiitia talanoaga masani talu ai telefoni feaveaʻi ma isi masini  faaonapōnei.” Na lipotia mai i le nusipepa Ausetalia o le Sunday Telegraph: “O faiga faatekinolosi . . . ua lē fevaaiaʻi ai tagata. Ua . . . imeli po ua avatu feʻau tusitusia e le tasi i le isi ae lē talanoa faafesagaʻi.”

Ua faitio mai Rasela e 21 tausaga mai Falani i le māfuaaga o lona lagona o le tuua toʻatasi: “Ua leai se taumafaiga a tagata e talanoa fevaaiaʻi, ona ua manatu ua lava feʻau tusitusia, imeli, ma fesootaʻiga i komepiuta. Ae ua atili ai ona ou lagona le tuua toʻatasi.”

● Sui Nofoaga e Nonofo Ai

O tulaga leaga o le tamaoaiga ua ala ai ona fesuisuiaʻi mea e nonofo ai tagata ina ia maua pea galuega. O le faia faapea, ua tuua ai tuaoi, uō, aʻoga ma aiga, ma lagona ai, ua pei o se laau ua sii ma toe totō i se isi mea, ae tuu aʻa i le mea sa iai muamua.

E manatua e Falanisisi le aso na taunuu atu ai i Falani mai Ghana. Na fai mai o ia, “O le lē malamalama i le gagana, leai ni uō, ma le mālūlū o le tau na atili ai ona ou lagona le tuua toʻatasi.”

E manatua e Peta lona taunuu atu i Egelani e nofo ai, ma fai mai o ia: “E ese le faigatā iā te aʻu ona faamasani i le aganuu a le atunuu. Ua iai tagata ou te masani ai, ae e leai ni aʻu uō moni po o ni aiga ou te talanoa ma taʻu i ai oʻu faalogona.”

● Maliu o Sē e Pele

O le maliu o se paaga e tuua ai le tagata o loo ola ma faalogona matuā gaogao. Aemaise lava pe afai na umi se taimi na ia tausia ai lana paaga a o maʻi.

Na faamatala e Fernande, o se fafine mai i Falani ua oti lana tane, “O le mea e sili ona faigatā, ua leai si aʻu uō pele e faasoa atu i ai oʻu lagona, o si aʻu tane.” Ua taʻua e Eni lona misia o lana tane, “aemaise lava pe a iai ni filifiliga tāua e fai e faatatau i le soifua mālōlōina po o nisi mataupu.”

● Tatala le Faaipoipoga, Teteʻa, Nofofua e Leʻi Faatalitalia

O le tatala o le faaipoipoga ma le teteʻa, e māfua ai lagona o le tuua toʻatasi ma le lē taulau, ma e sili ona aafia ai fanau. Ua talitonu nisi o tagata suʻesuʻe, o fanau a ulugalii ua teteʻa, e aafiagofie i lagona o le tuua toʻatasi pe a matutua.

O i latou e leʻi faaipoipo ona e lē o maua se paaga talafeagai, e masani ona iai lagona o le tuua toʻatasi. E faateteleina na faalogona pe a faia e nisi ni faamatalaga soona lafo e pei o le, “O le ā le mea ua lē faia ai sou toʻalua?”

E iai foʻi i se matua nofo toʻatasi lagona o le tuua toʻatasi. I le avea o ia ma matua, e fiafia, ae e iai foʻi ma faafitauli. Ae e na o ia e taumafai e foʻia na faafitauli.

● Lagona Tuua Toʻatasi i Ē Matutua ma Talavou

E masani ona oo i tagata ua matutua lagona o le tuua toʻatasi, e ui e lē o tuulafoaʻia e o latou aiga. Atonu o loo asiasi pea i ai o latou tauaiga ma uō, ae faapefea taimi e lē o asia ai e se isi?

E masani foʻi ona iai i talavou lagona tuua toʻatasi. Ua fai ma masani le faafiafia o i latou lava i le matamata TV, taaloga vitiō, ma faaalu se taimi umi i le komepiuta.

Pe e iai se vaifofō o lenei masaniga ua faateteleina? O le ā e fesoasoani iā te oe pe a lagona le tuua toʻatasi?

[Faamatalaga faaopoopo i le itulau 22]

“O le lē malamalama i le gagana, leai ni uō, ma le mālūlū o le tau, na atili ai ona ou lagona le tuua toʻatasi”