Iloilo e se Lōia Talitonuga o Molimau a Ieova

UA FAAPEA mai Les Civin, o se lōia, ma o le faatonu o se ofisa o lōia i Aferika i Saute: “E lē tele soʻu iloa e uiga i Molimau a Ieova.” Aiseā na ia iloiloina ai talitonuga o Molimau a Ieova? O le ā sana faaiʻuga e uiga i na talitonuga? O lana faamatalaga lenei i le Ala Mai!

O le ā le lotu na e tupuga mai ai?

O aʻu, ou te tupuga mai i tagata Iutaia, ae i le amatamataga o tausaga o le 1970, na ma faaipoipo ai ma Carol, o se teine e Lotu Egelani. E lē fiafia o ia i lotu, ma e ma te leʻi auai foʻi la i se lotu. Ae ina ua valu tausaga o la ma tama tama o Aneterea, na manatu ai Carol, e tatau ona ave o ia i se lotu. Na fai mai se faifeʻau o le Lotu Iutaia, afai e liliu Carol i le Lotu Iutaia, e otometi ona avea Aneterea ma Iutaia, ma faauuina i le 13 o ona tausaga o se sui o le lotu. O lea, na amata ai loa ona ma auai i vasega mo ē ua liulotu e faia i le sunako i vaiaso uma.

Na faapefea ona tou feiloaʻi ma Molimau a Ieova?

Pe a ō mai Molimau i lo matou fale, e vave lava ona ou faamutaina le talanoaga. Ou te fai i ai: “O aʻu o le Iutaia, ma ou te lē talitonu i le Feagaiga Fou.” Na fai mai Carol e iai sana uō Molimau a Ieova e iloa lelei le Tusi Paia, ma fautua mai foʻi e tatau ona ma suʻesuʻeina le Tusi Paia. O lea, na ou ioe toaʻi atu ai e matou te suʻesuʻe ma Molimau a Ieova.

O le ā la sou manatu ina ua e suʻesuʻe i le Tusi Paia?

Sa ou manatu faamaualuga i loʻu talitonuga, o aʻu e tupuga mai i se nuu ua filifilia, ma faapea ifo, ‘O ā la ni mea e mafai ona aʻoaʻo mai e nei tagata iā te aʻu?’ Ina ua ma talanoa ma se Molimau, na ou fai i ai: “O aʻu o se Iutaia. E iai laʻu lotu, ma ou te oti lava i laʻu lotu. E lē toe suia foʻi loʻu mafaufau.” Sa malamalama o ia i loʻu manatu. O lea, na ma auai i lesona a tagata ua liliu i le Lotu Iutaia i pō o Aso Faraile ma Aso Gafua, ae i taeao o Aso Sa e matou te suʻesuʻe ai ma Molimau (pe a lē mafai ona ou ʻalofia). E lē totogia a latou suʻesuʻega, e lē pei o lesona e faia i le sunako.

Sa ou faaaogā laʻu Tusi Paia faa-Iutaia ona sa ou manatu, e faaaogā e Molimau se  faaliliuga e fetaui ma o latou lava manatu. Ae na faateʻia aʻu ona o le tutusa o manatu o nei Tusi Paia. O lea, ua atili ai ona ou taumafai e faamaonia, e lē malamalama Molimau i mea o loo latou aʻoaʻoina.

Ina ua māeʻa ona ma auai i ni lesona a le Lotu Iutaia, na fai mai Carol, e lē malamalama le faifeʻau i le Tusi Paia, ma e lē toe alu i vasega a le Lotu Iutaia, ona e talitonu o ia o Iesu o le Keriso. O loʻu lē fiafia na ou manatu ai loa e tatala la ma faaipoipoga. Ae ina ua teʻa loʻu ita, na ou faia ai loa se isi fuafuaga, e faaaogā loʻu malamalama i le tulafono e faamaonia ai iā Carol le sesē ma le valea o lenā lotu.

Pe na e taulau?

Na aumai e le faifeʻau o le Lotu Iutaia iā te aʻu se tusi na tusia e faamaonia ai le sesē o valoaga e faatatau i le Mesia. E 18 masina o ma suʻesuʻe ma Carol i lea tusi. Ae sa matou suʻesuʻe foʻi ma Molimau i vaiaso taʻitasi. Peitaʻi, a o ma iloiloina manatu o lenā tusi, na atili ai loʻu lē mautonu. Ona e ese manatu o loo iai, a o valoaga o loo i le Tusi Paia e faatatau i le Mesia, e na o Iesu Keriso o loo faasino uma i ai. Peitaʻi na ou maua le malamalamaga saʻo ina ua ma suʻesuʻe i le Tanielu 9:24-27, lea e taʻua ai o le a aliaʻi mai le Mesia i le tausaga e 29 T.A. * Na tuu mai e le Molimau se Tusi Paia (Interlinear), e pito i luga le faa-Eperu ae e i lalo ifo le faa-Peretania. Sa ou siakiina faaupuga ma fua i le faasologa o taimi, ma ou fai atu loa: “E moni, o lea e faasino le valoaga i le 29 T.A. O le ā la le sootaga o lenā mea ma Iesu?”

Na faapea mai le Molimau: “O le tausaga lenā na papatiso ai Iesu.”

Na ou matuā maofa, i le saʻo aʻiaʻi ma le fesootaʻi lelei o valoaga o le Tusi Paia!

O ā la uiga na faaalia e au uō ina ua sui ou manatu?

Sa matuā popole nisi ma fai mai, e mafai ona faafeiloaʻi i maʻua i tagata e latou te faamaonia mai, ua faasesēina i maʻua e Molimau a Ieova. Peitaʻi, o lea ua faavae nei o ma talitonuga i suʻesuʻega ma iloiloga moni.

O le ā le pogai na e filifili ai e avea ma Molimau?

Na muamua avea Carol ma Molimau, ae mulimuli ane ma ō faatasi i sauniga. * Sa ou maofa i uiga faaleuō ma le fealofani o Molimau, e ui ina eseese lanu. Ou te leʻi vaaia lava se mea faapenei i laʻu lotu. O lea, ina ua mavae le tolu tausaga o oʻu suʻesuʻe, na ou papatiso ai loa.

O le ā sou lagona i lau filifiliga e avea ma Molimau?

O se faaeaga loʻu faapea atu, “O aʻu o se Molimau a Ieova.” Ae a ou manatunatu i loʻu faasagatau i le upu moni, ua ou lagona ai, e lē tatau ona ou maua lea faaeaga mai iā Ieova. Ou te lē salamō i laʻu filifiliga ua fai.

O ā ni faaeaga ua e olioli ai?

E tele. Muamua lava, e pele iā te aʻu le faaeaga o le avea ma toeaina, po o se leoleo mamoe ma o se faiaʻoga i la matou faapotopotoga. Ua mafai ai foʻi ona ou fesoasoani i le Matagaluega Tau Tulafono i le lālā o Molimau a Ieova i Aferika i Saute. Ae sili ai, o le iloa lea o Ieova ma lona Alo, ma ua ou malamalama foʻi i le tāua o le taimi ua tatou ola ai, ma mea mataʻina ua tutupu o loo gatete ai le lalolagi.

[Faaopoopoga i lalo]

[Ata i le itulau 11]

Na ou matuā maofa i le saʻo aʻiaʻi ma le fesootaʻi lelei o valoaga o le Tusi Paia!