Lagona o le Tuua Toʻatasi i se Lalolagi ua Tele ai Fesootaʻiga

E LEAI lava se isi taimi e pei o le taimi lenei i le tele ma le faigofie o auala e fesootaʻi ai, e pei o telefoni feaveaʻi, feʻau tusitusia, imeli ma talanoaga i le komepiuta. E ui ina tele auala o fesootaʻiga, ae e toʻatele tagata matutua ma talavou ua matuā lagona le tuua toʻatasi. Aiseā?

O loo faamatala manino mai i le tusi e uiga i le lagona tuua toʻatasi, Loneliness—Human Nature and the Need for Social Connection e tagata suʻesuʻe o John T. Cacioppo ma William Patrick lea mataupu. Na la taʻua e faapea, “o le tele o le faaaogāina o le Initaneti, ua tele ai ina faaesea tagata mai isi ma tupu ai le lotomafatia, ona ua lē mafai ona fevaaiaʻi.”

O le pisi ma le vevesi tele o le olaga ua faigatā ai ona maua ni mafutaga lelei ma isi. Ona o laumata fiafia ma lagona alofa e vaaia i se tagata, e lē o iloa atu i se telefoni po o se komepiuta.

E tupu lenā tulaga i fale faigaluega faapea ma totonu o aiga. I le tele o aiga ua na ona ō mai i le fale ma toe ō e aunoa ma le aai pe talanoa faatasi. O se talavou ua iai se komepiuta e tau lē talanoa ma lona aiga. O le mea e ofo ai, e ui lava ina tele masini e fesootaʻi ai, ae e lagona lava e talavou le tuua toʻatasi.

I aso nei, o ulugalii faaipoipo e lē fesootaʻi pe fetalanoaaʻi, e latou te lagona foʻi le tuua toʻatasi. O le mea e sili ona faigatā, o le nonofo faatasi ma le paaga faaipoipo ae o loo iai se lagona tuua toʻatasi.

Atonu o loo tauivi se matua nofo toʻatasi ma lagona o le tuua toʻatasi. Talu ai le tele o auala o fesootaʻiga ua iai, ua lē maua ai se mafutaga ma fanau, ma faateleina ai na lagona. O le toʻatele foʻi o i latou e nofo toʻatasi, o loo moomoo mo se paaga faaipoipo, ae e lē o taulau na moomooga.

Ua avea lagona tuua toʻatasi o se faafitauli e māfua ai le pulea e le ʻava malosi, ʻaitele, faaaogā sesē o fualaau, feusuaʻiga lē mamā, ma le pule i le ola. O lea, e tāua le iloa o māfuaaga ua lagona ai le tuua toʻatasi, ona o le a fesoasoani i le foʻiaina o lea faafitauli.