O ā Mea e Talitonu i ai Molimau a Ieova?

E lē o lilo talitonuga o Molimau a Ieova, auā ua faailoa atu i le faitau selau o gagana ua maua ai a latou lomiga. O loo otooto atu i lalo nisi o o latou talitonuga.

1. Le Tusi Paia

E talitonu Molimau, “o Tusitusiga Paia uma e mai le agaga o le Atua.” (2 Timoteo 3:16) Na tusia e Jason D. BeDuhn, o se polofesa lagolago i suʻesuʻega faalelotu e faapea: “E [faavae e Molimau a Ieova] o latou talitonuga uma i le Tusi Paia, ma e suʻesuʻe māeʻaeʻa i ai a o leʻi faia se faaiʻuga.” E faaōgatasi o latou talitonuga ma le Tusi Paia ae e lē faafetaui i mea e talafeagai ma o latou manatu. Ua latou iloa foʻi, e lē faauigaina faaletino manatu uma i le Tusi Paia. O se faaaʻoaʻoga, o aso e fitu o le foafoaga, e faafaatusa, ma e faasino atu i ni vaitaimi uumi.—Kenese 1:31; 2:4.

2. Lē na Foafoaina Mea

Ua faia e le Atua moni se suafa mo ia lava—o Ieova (po o Yahweh i le Jerusalem Bible a le Katoliko Roma, ma ua talia e nisi tagata popoto i aso nei)—e faaesea ai o ia mai i atua sesē. * (Salamo 83:18) I uluaʻi tusitusiga o le Tusi Paia, e tusa ma le 7,000 taimi o loo aliaʻi mai ai le suafa o Ieova i le gagana Eperu. Na faamatilatila e Iesu le tāua o lenā suafa i lana tatalo faaaʻoaʻo e faapea: “Ia paia lou suafa.” (Mataio 6:9, O le Tusi Paia Samoa—Lomiga o le 1884) Ua tatau ai la ona tāpā e le Atua le tapuaʻi atu tau lava o ia. O lea, e lē faaaogāina e Molimau faatusa po o faatagata i la latou tapuaʻiga.—1 Ioane 5:21.

3. Iesu Keriso

O ia o le Faaola, “o le Alo o le Atua,” ma “o le ulumatua o foafoaga uma.” (Ioane 1:34; Kolose 1:15; Galuega 5:31) Na faia o ia e le Atua, ma e lē o se vaega o se Tolutasi. Na fetalai Iesu: “E sili le Tamā iā te aʻu.” (Ioane 14:28) Sa soifua Iesu i le lagi a o leʻi afio mai i le lalolagi, ae ina ua mavae lona maliu faataulagaina ma lona toetū mai, ona toe  afio atu lea i le lagi. “E leai se tasi e alu atu i le Tamā, pe a lē ui [atu iā Iesu].”—Ioane 14:6.

4. Malo o le Atua

O se malo moni i le lagi. O Iesu Keriso le Tupu o lea malo, ma le 144,000 e pule faatasi ma ia, o ē ua “faatauina mai i le lalolagi.” (Faaaliga 5:9, 10; 14:1, 3, 4; Tanielu 2:44; 7:13, 14) O le a pule mai i le lalolagi ua faamamāina mai mea leaga uma, ma aināina e le faitau miliona o tagata e matataʻu i le Atua.—Faataoto 2:21, 22.

5. Le lalolagi

Ua taʻua i le Failauga 1:4 e faapea: “O le lalolagi e tumau lea e faavavau.” Pe a uma ona faaumatia o ē amioleaga, ona faaleleia lea o le lalolagi e avea ma parataiso ma ʻainā e tagata amiotonu e oo i le faavavau. (Salamo 37:10, 11, 29) O le a faataunuuina ai upu o le tatalo a Iesu: “Ia faia lou finagalo i le lalolagi e pei ona faia i le lagi.”—Mataio 6:10.

6. Valoaga o le Tusi Paia

“E lē mafai ona tala pepelo” le Atua. (Tito 1:2) O lea, e taunuu mea uma e na te valoia, e aofia ai valoaga e faatatau i le iʻuga o le lalolagi. (Isaia 55:11; Mataio 24:3-14) O ai o le a faasaoina i le faaumatiaga o loo fotuaʻi mai? Ua faapea mai le 1 Ioane 2:17: “O lē e fai le finagalo o le Atua e tumau e faavavau.”

7. Faipule silisili

Na fetalai Iesu: “Ia totogi atu mea a Kaisara iā Kaisara, a o mea a le Atua ia avatu i le Atua.” (Mareko 12:17) O le mea moni, e usiusitaʻi Molimau a Ieova i tulafono a atunuu, pe a lē feteenaʻi ma tulafono a le Atua.—Galuega 5:29; Roma 13:1-3.

8. Talaʻiga

Na valoia e Iesu e faapea, o le a folafolaina atu “lenei tala lelei o le malo” i le atulaulau uma, a o leʻi oo mai le iʻuga o lenei lalolagi. (Mataio 24:14) E manatu Molimau a Ieova, o se faaeaga le auai i lenei galuega faasaoola. O le mea moni, pe faalogo tagata pe leai, o lana lava filifiliga lenā. Ua faapea mai le Tusi Paia: “So o se tasi e manaʻo i ai, ia ave fua le vai o le ola.”—Faaaliga 22:17.

9. Papatisoga

E papatiso e Molimau a Ieova na o ē na suʻesuʻe māeʻaeʻa i le Tusi Paia, ma ua mananaʻo e auauna i le Atua ma avea ma ana Molimau. (Eperu 12:1) E faailogaina lo latou tuuina atu e ala i le faatofuina i le vai.—Mataio 3:13, 16; 28:19.

10. Faaeseesega o faifeʻau ma le ʻaulotu

Na fetalai atu Iesu i ona soo: “O le ʻauuso uma outou.” (Mataio 23:8) E leʻi faaeseeseina e uluaʻi Kerisiano, e aofia ai ma tusitala o le Tusi Paia, se vasega o faifeʻau. O loo mulimuli Molimau a Ieova i lea faatulagaga faale-Tusi Paia.

[Faaopoopoga i lalo]

[Faamatalaga faaopoopo i le itulau 8]

“E sili le Tamā iā te aʻu.”—Ioane 14:28

[Faamatalaga faaopoopo i le itulau 9]

“O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”—Mataio 24:14