Le Manatu o le Tusi Paia

O Ai Temoni?

I LE tele o talitonuga a lotu, latou te manatu i aitu, sauʻai, saualii ma temoni, a lē o ni agaga lelei po o ni agaga leaga, po o mea uma na. Ae ua faapea mai isi o se talitonuga faanuupō po o se mea e fafau aʻe i le mafaufau. O le ā le aʻoaʻoga a le Tusi Paia?

O loo aʻoaʻo i le Tusi Paia o Lē na faia mea uma o se Agaga, ma o ana uluaʻi foafoaga o ni agaga foʻi. (Ioane 4:24; Eperu 1:13, 14) Ua faamatalaina foʻi i le Tusi Paia agaga leaga, lea e taʻua i nisi taimi o temoni. (1 Korinito 10:20, 21; Iakopo 2:19) Ae e lē o aʻoaʻo mai na faia e le Atua temoni. O ai la i latou, ma na faapefea ona iai?

“Agelu na Agasala”

Ina ua faia e le Atua foafoaga agaga, na ia tuu i ai le saʻolotoga e filifili ai i le lelei po o le leaga. Ae pagā lea, ina ua uma ona faia le tagata, na filifili ai se vaega o agelu i le leaga e ala i le fouvale i le Atua.

O le uluaʻi foafoaga agaga na sili ona fouvale, na avea ma Satani. Na fetalai Iesu Keriso: “E leʻi tumau lava o ia i le upu moni.” (Ioane 8:44) Aiseā na fulitua ai Satani i le Atua? Na manaʻonaʻo o ia i le tapuaʻiga lea e na o le Atua e tatau i ai. O lea na faia ai loa e ia o ia lava ma atua ma avea ai ma Satani, o lona uiga o lē e tetee. Mulimuli ane a o leʻi oo mai le Lolo i aso o Noa, na faatasi ai isi agelu ma Satani. Na latou tuua o latou tulaga i le lagi, ae liutino i tagata ma nonofo ai i le lalolagi. (Kenese 6:1-4; Iakopo 1:13-15) Ina ua oo mai le Lolo, na tuua ai e “agelu na agasala” o latou tino tagata, ae toe foʻi i o latou tino agaga. (2 Peteru 2:4; Kenese 7:17-24) Mulimuli ane, na taʻua ai i latou o temoni.—Teuteronome 32:17; Mareko 1:34.

Ona o lo latou lē usiusitaʻi, ua matuā ese ai le tulaga ua latou iai nai lo le taimi a o leʻi fouvale. Ua faapea mai le Iuta e 6: “O agelu foʻi o ē e leʻi taofi i lo latou tulaga na iai muamua, a ua tuua le mea na latou nonofo ai, ua taofia [e le Atua] i noataga e faavavau i le pogisa mo le faamasinoga i le aso tele.” Ioe, e leʻi faatagaina e le Atua temoni e toe maua lo latou tulaga mamalu sa iai i le lagi, ae ua taofia i latou i le “lua e matuā pogisa” faafaatusa, e aunoa ma se malamalamaga faaleagaga.

“Ua Faasesēina le Lalolagi Atoa”

E ui lava e lē toe mafai ona liutino tagata temoni, ae o loo telē pea la latou taaʻiga i mafaufau ma olaga o tagata. O le mea moni “ua faasesēina le lalolagi atoa” e Satani ma ana temoni. (Faaaliga 12:9; 16:14) E faapefea? O le tele o taimi e ala mai i “aʻoaʻoga a temoni.” (1 Timoteo 4:1) O nei aʻoaʻoga pepelo ua tele ina faia e lotu, ua faasesēina ai le faitau miliona o tagata i upu moni o le Tusi Paia. (2 Korinito 4:4) Sei manatu i ni faaaʻoaʻoga.

● O le aʻoaʻoga o loo ola pea ē ua maliliu. O loo faasesēina tagata e temoni e ala i faaaliga, o leo ma isi togafiti, ina ia talitonu ai e mafai ona latou talanoa atu i ē ua maliliu. O lea la, ua faamalosia e lenei togafiti poto le talitonuga pepelo e faapea, e ola pea le agaga pe a oti le tagata. Peitaʻi, ua taʻu manino mai i le Tusi Paia: “A o ē ua oti, latou te lē iloa se mea.” (Failauga 9:5, 6) Talu ai ua  latou “ō ifo i le mea taaligoligoa,” ua lē mafai ai ona latou viiviia le Atua.—Salamo 115:17. *

● Manatu māmā i amioga leaga. Ua taʻua i le 1 Ioane 5:19: “O le lalolagi atoa o loo nofo toʻilalo i le pule a lē o loo leaga.” E ala mai i faasalalauga ma isi auala, ua faaaogā ai e Satani ma ana temoni lo latou pule, e faatalitonu ai tagata e lē leaga le faamalieina o o latou tuʻinanauga leaga. (Efeso 2:1-3) O lea ua sasao faaafi ai amioga leaga eseese, e aofia ai ma feusuaʻiga matagā. Ua lē fefefe tagata i le faia o nei amioga ma ua manatu ai, e lē o toe aogā pe e faasāsā naʻuā foʻi taʻiala a le Tusi Paia.

● Ua taatele faiga faataulāitu. Na fetaui le aposetolo o Paulo ma se auauna teine o lē sa uluitino e “se temoni e vavalo,” lea na mafai ai ona “maua e ona matai le tele o oloa e ala i lona faia o nei valovaloga.” (Galuega 16:16) E leʻi faalogo Paulo i le teine auā na ia iloa e mai i se temoni lona mana. Na te leʻi fia faatigā foʻi i le finagalo o le Atua, o lē e inosia faiga faataulāitu e aofia ai mea e pei o oe ma lou fetu ma valovaloga.—Teuteronome 18:10-12.

Ia Puipui Oe Mai i Temoni

E faapefea ona puipuia oe mai i agaga leaga? Ua tali mai le Tusi Paia: “Ia outou gauaʻi atu i le Atua ae ia tetee atu i le Tiapolo, ona sola ese ai lea o ia mai iā te outou.” (Iakopo 4:7) Tatou te usitaʻia lenā faatonuga pe a ola e tusa ai ma aʻoaʻoga a le Tusi Paia, o le tusi e tasi ua faaalia manino mai ai Satani, o temoni ma a latou “togafiti.” (Efeso 6:11; 2 Korinito 2:11) Ua taʻua foʻi i le Tusi Paia, ua toe o se aga ona faaumatia lea o agaga leaga faatasi ai ma ē e tetee i le Atua. (Roma 16:20) Ua faapea mai le Faataoto 2:21: “O ē e amio saʻo e latou te mau i le lalolagi, ma o ē e lē ponā e faatotoeina i le lalolagi.”

[Faaopoopoga i lalo]

PO O E TAUMĀNATU EA I NISI TAIMI?

● Pe na faia e le Atua temoni? —2 Peteru 2:4.

● Pe mafai ona e talanoa atu i ē ua maliliu?—Failauga 9:5, 6.

● E faapefea ona puipuia oe mai i temoni?—Iakopo 4:7.

[Ata i le itulau 31]

E eseese auala e taaʻina e temoni tagata