Le Manatu o le Tusi Paia

O le ā le Uiga o le Liliu Atu o le Isi Alafau?

I LANA lauga taʻutaʻua i Luga o le Mauga, na fetalai ai Iesu Keriso: “Aua le tetee atu i le tagata amioleaga; ae a pō mai e se tasi lou alafau taumatau, ia liliu atu i ai le isi.”—Mataio 5:39.

O le ā le uiga o lana fetalaiga? Po o ia fautuaina Kerisiano e aua neʻi tetee atu? Po o lona uiga e lē tatau i Kerisiano ona toe tali atu pe tagi atu i le tulafono?

Le Uiga o le Fetalaiga a Iesu

E tatou te malamalama i fetalaiga a Iesu pe a tatou iloa le aano, ma i latou na ia fetalai atu i ai. Na fetalai Iesu i mea ua uma ona iloa e lana ʻaufaalogologo mai le Tusi Paia. Na ia faapea atu: “Ua outou faalogo ua faapea mai le upu, ‘O le mata e sui ai le mata, ma le nifo e sui ai le nifo.’”—Mataio 5:38.

O faamatalaga a Iesu, o loo maua i le Esoto 21:24 ma le Levitiko 24:20. E tusa ai ma le Tulafono a le Atua, o le faasalaga o le “mata e sui ai le mata” o loo taʻua i na mau, sa talafeagai ona faatinoina pe a uma ona faamasinoina le tagata e ositaulaga ma faamasino, o ē na iloiloina le mea na tupu, ma le matuiā o lana agasala.—Teuteronome 19:15-21.

I lenā taimi, na faafenumiaʻi ai e tagata Iutaia le faatatauina o lenei tulafono. Na faapea mai Adam Clarke, o se faitofā o le Tusi Paia i le senituri lona 19: “E foliga mai na faia e tagata Iutaia lenei tulafono [o le mata e sui ai le mata, ma le nifo e sui ai le nifo] ina ia taʻutonuina ai se gaoioiga o le taui ma sui. Peitaʻi, e masani lava ona matuiā  lenā taui ma sui i lo o le mea leaga na fai mai.” Ae e lē o faatagaina e le Tusi Paia le taui atu o le leaga i le leaga.

I le Lauga a Iesu i luga o le Mauga e uiga i le ‘liliu atu o le isi alafau,’ ua atagia mai ai le agaga moni o le Tulafono a le Atua iā Isaraelu. E leʻi uiga Iesu e faapea, pe a pō mai lou alafau, ona toe liliu atu lea i ai o le isi. I taimi o le Tusi Paia, o se pō, e leʻi fuafuaina e faamanuʻa ai se tagata, ae ina ia faaita ai o ia.

E mautinoa la, o le uiga o le fetalaiga a Iesu, afai e taumafai se tagata e faaita pe faatigā iā te oe, e lē tatau ona e toe tali atu i ai. Ae e tatau ona e taumafai e ʻalofia le faia o ni gaoioiga e iʻu ai i le taui atu o le leaga i le leaga.—Roma 12:17.

E tai tutusa lava fetalaiga a Iesu ma upu a le tupu o Solomona: “Aua e te faapea ane: ‘E pei ona ia faia iā te aʻu, e faapea lava ona ou faia iā te ia. Ou te taui atu i tagata taʻitoʻatasi e tusa ma lana gaoioiga.’” (Faataoto 24:29) O le liliu atu e se soo o Iesu o le isi alafau, o lona uiga e lē manaʻo o ia e fai se fetauiga.—Kalatia 5:26.

Ae Faapefea le Puipuiga o Oe?

Peitaʻi, e lē faapea o le liliu atu o le isi alafau o le a lē faia ai e se Kerisiano se gaoioiga e puipuia ai o ia mai faiga sauā. E leʻi faapea mai Iesu e lē tatau ona puipuia i tatou, ae ia faia i se auala e lē toe taui atu ai le leaga i le leaga. O se faiga atamai le sola ese pe a mafai, e ʻalofia ai se fetauaʻiga, ae e tatau lava ona faia se gaoioiga e puipuia ai i tatou, ma logo leoleo mo se fesoasoani.

Sa faatatauina lelei e soo o Iesu nei taʻiala e puipuia ai a latou aiā tatau. O se faataʻitaʻiga, na faaaogā e le aposetolo o Paulo le tulafono e puipuia ai lana aiā tatau e faatino ai le poloaʻiga a Iesu i ona soo e talaʻi. (Mataio 28:19, 20) A o talaʻi atu i le aai o Filipi, na puʻe faapagota ai Paulo ma Sila e taʻitaʻi o le aai, ma molia i le solia o le tulafono.

Ona sasaina ai lea o i laʻua i luma o le lautele ma lafo i le falepuipui e aunoa ma se faamasinoga. Ina ua maua e Paulo le avanoa, ona ia faaaogā lea o lana aiā o se tagatānuu o Roma. Ina ua iloa e taʻitaʻi, ona fefefe ai lea o i latou ma talosaga atu iā Paulo ma Sila, ina ia ō ese mai le aai e aunoa ma se vevesi. O lea, na faataatia ai e Paulo se faataʻitaʻiga i lona ‘tū atu mo le tala lelei ma faamautū ai faaletulafono.’—Galuega 16:19-24, 35-40; Filipi 1:7.

Ua pei Molimau a Ieova o Paulo, i le tutū malosi i luma o faamasinoga e puipuia a latou aiā tatau e auauna ai pea i le Atua. E moni lenei mea e oo lava i atunuu o loo saʻoloto ai tapuaʻiga. E tatau i Molimau a Ieova ona puipuia i latou a o ola i se lalolagi e tumu i soligatulafono ma le lē saogalemu. E faaaogā le tulafono e puipuia ai i latou.

Ona o ni Kerisiano, ua talafeagai ai ona faamautū e Molimau a Ieova la latou aiā faaletulafono, e ui ina latou iloa, e lē taulau nisi o nei taumafaiga. O lea, latou te tuu atu nei mataupu i le Atua ma le mautinoa, e so o se faaiʻuga e na te tuuina mai, e atagia ai lona faamasinotonu. (Mataio 26:51-53; Iuta 9) E manatua e Kerisiano moni, o le tauimasui e a Ieova lea.—Roma 12:17-19.

PO O E TAUMĀNATU EA I NISI TAIMI?

● O ā gaoioiga e tatau ona ʻalofia e Kerisiano?—Roma 12:17.

● Pe e faasāina e le Tusi Paia le tagi atu i le tulafono mo se puipuiga? —Filipi 1:7.

● O le ā le tele o le faamoemoeina e Iesu o lona Tamā?—Mataio 26:51-53.