Tala a Isi Tagata

Falani “O Molimau a Ieova, o ni tagatānuu e faaaloalo i tulafono a le malo. . . . E lē o ni tagata faatupu faalavelave. E faigaluega ma totogi lafoga, e faia so latou sao i le atiina aʻe o le tamaoaiga o le atunuu ma foaʻi meaalofa i faalapotopotoga mo ē puapuagatia. O se mea manaia le vaai atu o miomiō faatasi ma le filemu tagata o lanu ma talaaga eseese. . . . Ana Molimau a Ieova tagata uma, semanū ua leai ni galuega a i matou leoleo.”—Sooupu o le ofisa o leoleo i Falani.

Ukraine “E aʻoaʻo e Molimau a Ieova a latou fanau i taʻiala tau amio a le Tusi Paia. E aʻoaʻo ina ia ʻalofia amioga, gaoioiga ma uiga e manatu i ai tagata e lē afāina, ae e afāina ai i latou faapea ma isi. O lea, e latou te lapataʻia fanau i le mataʻutia o le faaaogā o fualaau faasāina, ulaula, ma le inu tele o le ʻava malosi. Ua latou iloa le tāua o le faamaoni ma le galue mamafa. . . . E aʻoaʻo e Molimau a Ieova a latou fanau ia amiolelei, faaaloalo i ē e pule faapea ma isi tagata, atoa ma a latou meatotino, ma ia usiusitaʻi i le tulafono.”—Le tusi, The History of Religion in Ukraine, na toe teuteu e le polofesa o Petro Yarotskyi.

Italia “Na fifilemu le aofia e tolu sefulu afe i le malae taalo o le Olympic Stadium . . . E lē faaotaota pe pisapisaō. O le vaaiga lenā i le Olympic Stadium ananafi. . . E leʻi vaaia ni amioga lē taupulea po o se isi o ulaula, po o ni atigi apa inu o taatitia solo. Ae o loo tatala Tusi Paia a tagata ma fai faamaumauga, ma o loo fifilemu uma tamaiti.”—L’Unità, lipoti e uiga i le tauaofiaga a Molimau a Ieova i Roma.

Peretania “Na faapea mai le tiakono fesoasoani o Cheltenham i Egelani, e manaʻomia e le [Lotu Egelani] ni tagata maelega e ō e talaʻi, e pei o Molimau a Ieova.”—The Gazette, matagaluega a Gloucester.

 Holani O nisi e nonofo latalata i le Maota mo Sauniga a Molimau a Ieova i le aai o Leeuwarden, sa tusi atu i Molimau e faapea: “E avatu le faamālō ona o lo outou taʻimua i le faamanaiaina o lo tatou vaipanoa o Noorderweg. E manaia o outou laʻei ma amiolelei i taimi uma. E amiolelei a outou fanau, e lē pakaina taavale i mea e lē faatagaina i le tulafono, e lē lafoaʻia ni otaota i le auala, ma e mamā pea ma matagofie le fanua atoa o loo iai le Maota mo Sauniga. Talosia ia avea pea outou ma o matou tuaoi, auā e matou te fiafia tele iā te outou.”

Mekisikō Na faapea mai Elio Masferrer, o se polofesa e faia suʻesuʻega i le Aʻoga o le Talafaasolopito o le Tagata ma Aganuu, e fesoasoani Molimau a Ieova i tagata o “mafatia i faafitauli i aiga, e pei o le toso teine, faileagaina, pulea e le ʻava malosi ma fualaau faasāina.” Fai mai o ia, o aʻoaʻoga a Molimau a Ieova, “ua aveesea ai mai i tagata faalogona ua lē toe aogā” ma ua mafai ai ona “ola e aunoa ma ni faafitauli matuiā, ona ua latou faia le finagalo o le Atua.”—Nusipepa o le Excélsior.

Pasili Na lipotia mai i se nusipepa e faapea: “E ese le manaia o le faalapotopotoga a Molimau a Ieova. E mamā i taimi uma nofoaga e latou te faapotopoto ai, ma e maopoopo ona puleaina mea uma . . . Pe a uma a latou faatasiga, e sili atu ona mamā le nofoaga sa faaaogā nai lo o le tulaga sa iai muamua. A o faagasolo lauga, e matuā fifilemu tagata uma. E leai se fetuleiaʻi. E amiolelei i taimi uma. . . . O se lotu e pulea lelei. E latou te iloa lelei le uiga o le tapuaʻi atu i le Atua.”—Comércio da Franca.

E talitonu maumauaʻi Molimau a Ieova, e sili le silafia o Lē na faia mea i taʻiala e tatau ona ola ai tagata. (Isaia 48:17, 18) O lea, e viia ai Ieova pe a taʻuleleia i tatou e tagata. Na fetalai Iesu: “Ia faapea ona susulu atu lo outou malamalama i luma o tagata, ina ia latou iloa a outou galuega lelei, ma vivii atu ai i lo outou Tamā o i le lagi.”—Mataio 5:16.

[Faamatalaga faaopoopo i le itulau 4]

“E aʻoaʻo e Molimau a Ieova a latou fanau ia amiolelei . . . ma ia usiusitaʻi i le tulafono”

[Faamatalaga faaopoopo i le itulau 5]

‘O loo miomiō faatasi ma le filemu tagata o lanu ma talaaga eseese’