E Faatalitalia Nisi Mafuiʻe Tetele

UA MAFAI nei e saienitisi ona fua le faitau selau o mafuiʻe tetele, ona ua iai mea fua mafuiʻe. O mafuiʻe e lūlū i vaipanoa e mamao ese ma aai, e faalēano i ai le ʻau faasalalau pe lipotia mai. Ae afai e lavea se aai tele i se mafuiʻe, e tele ola ua maʻimau ai ma mea e faaleagaina. O le aofaʻi o i latou e maliliu ai faapea ma mea e faaleagaina, e faalagolago i le telē o le aai ma sauniuniga na faia.

Iā Ianuari 12, 2010, na aafia ai Haiti i se mafuiʻe e sili ona leaga pe a fua i le toʻatele o ē na maliliu ai ma mea na faaleagaina. Ae e lē na o le pau ai lenā o le mafuiʻe telē o lea tausaga. O loo mulimuli mai ni faamatalaga o ni mafuiʻe na lūlū i le amataga o le 2010, e tutusa le malolosi pe sili atu foʻi, i le mafuiʻe lea na aafia ai le laumua o Haiti.

Ianuari 3: 7.1 le Malosi o le Mafuiʻe, i le Atu Solomona

Ona o le telē o lenei mafuiʻe, na manatu ai nisi e sili atu i le 7.1 lona malosi, ma na tupu ai se galulolo e “6 i le 10 futu (2-3 mita) le maualuluga o galu.” Na taʻua e Loti Yates, o sē e faatautaia galuega laveaʻi mo mala, a o tilotilo ifo i le vaalele, na vaaia le “lilofia o mea uma i le suāsami.” Na fai mai o ia, i le nuu o Bainara i le motu o Rendova, e 16 fale na tafiesea faapea ma le tele o nisi fale na faaleagaina.

A o leʻi lūlū le mafuiʻe tele, na muamua se isi tamaʻi mafuiʻe e 6.6 le malosi. E toʻatele na sosola i nofoaga maualuluga ona o le fefefe. O ē na sosola na faasaoina mai le galulolo lea na māfua i le mafuiʻe tele lea na toe lūlū i le lua itula mulimuli ane.

 Fepuari 26: 7.0 le Malosi o le Mafuiʻe, Motu o Ryukyu, Iapani

O le 5:31 i le vaveao na lūlū ai le mafuiʻe. O lona ogatotonu e 50 maila (80 km) mai i le aai o Naha i Okinawa, o se motu o Ryukyu i Iapani. Na faasalalau lapataʻiga o le galulolo ae mulimuli ane toe faalēaogāina. Na fai mai se fafine ua silia ma le 90 tausaga o nofo i Okinawa, talu ona ola, o le mafuiʻe sili lea ona malosi ua vaai i ai.

Fepuari 27: 8.8 le Malosi o le Mafuiʻe, Sili, Amerika i Saute

O le mafuiʻe lona lima lea le malosi talu mai le 1900. I le 1960 i lea lava atunuu, na lūlū ai le mafuiʻe e pito i sili ona malosi, e 9.4. Ona o lenā mafuiʻe faatasi ai ma le mafuiʻe e 7.7 le malosi lea na matuā faaleagaina ai le laumua o Sili i le 1985, na faamalosia ai le atunuu ina ia fau fale e mafai ona tatalia mafuiʻe malolosi.

O lea, e lē tele ni fale na faaleagaina i lea mafuiʻe i Santiago, le laumua o Sili ma isi aai. Ae e faitau afe tagata na lavevea ai ma faaleagaina ai a latou meatotino. E tusa ma le 500 i latou na maliliu ai, ma toetoe o le ʻafa o lenā numera na maliliu ona o le galulolo na aafia ai le talafatai o Sili.

Aperila 4: 7.2 le Malosi o le Mafuiʻe, Baja Kalifonia, i Mekisikō

O le ogatotonu o le mafuiʻe e 11 maila (18 km) mai i Guadalupe Victoria i Mekisikō. O se vaipanoa e mamao ese ma e tau leai nisi e nonofo ai. Ae na matuā lagonaina lenei mafuiʻe i nisi aai ma taulaga i Mekisikō, ma le itu i saute o le Iunaite Setete.

Me 9: 7.2 le Malosi o le Mafuiʻe, Sumatra i Mātū, Initonesia

O le aoauli na lūlū ai lenei mafuiʻe i le ilititai o le sami, e tusa ma le 135 maila (217 km) mai i Banda Aceh, le aai e pito i mātū o Initonesia. Na sosola ese le toʻatele o tagata mai i o latou fale ma e umi se taimi faatoʻā toe foʻi ona o le fefefe. E tusa ai ma lipoti, e leai se isi na maliu ai.

Faatalitalia Nisi Mafuiʻe

E tusa ai ma le talafaasolopito o mafuiʻe malolosi ua aafia ai lo tatou lalolagi, e talafeagai ai la ona tatou faatalitalia nisi mafuiʻe i le lumanaʻi. Ua taʻu saʻo mai i se lipoti a se faalapotopotoga Amerika e suʻesuʻe i le eleele: “O le a faaauau pea ona lūlū mafuiʻe tetele i le lumanaʻi, e pei lava o le taimi ua mavae.”

O le mea e ao ona mātauina e tusa ma le faamatalaga a se tasi nusipepa: “O mafuiʻe faatoʻa uma atu . . . e lē mafai e tagata ona foʻia, ae ua taʻu mai ai le mea e gata ai lo tatou malosi. E lē faapea ai o le a leai sa tatou gaoioiga e fai . . . , ae e tatou te faatalitalia pea mala tetele faalenatura, lea e lē mafai ona tatou taofia.”

O na mafuiʻe, ua manatua ai e tagata suʻesuʻe i le Tusi Paia valoaga e uiga i mafuiʻe, o se vala lea o le faailoga o aso e gata ai o lenei faiga o mea a le lalolagi.​—Mataio 24:3, 7; Mareko 13:8; Luka 21:11.

[Faafanua i le itulau 18, 19]

O nisi o mafuiʻe e 7.0 le malolosi pe sili atu, mai iā Ianuari e oo iā Me

Mekisikō

Haiti

Sili

Iapani

Initonesia

Atu Solomona