Faaalia le Atamai i a Tatou Upu

ʻMAʻIMAU E, pe ana mafai ona toe faafoʻi mai aʻu tala!’ Po ua e faia se tala faapena? Ioe, e lē faigofie ona pulea o tatou laulaufaiva. E toetoe lava o manu uma e mafai ona pulea e le tagata, ae ua faapea mai le Tusi Paia, “e lē mafai e se tagata ona pulea lona laulaufaiva.” (Iakopo 3:7, 8) Po o lona uiga la, o le a lē faia sa tatou taumafaiga e pulea o tatou laulaufaiva? E tatau ona tatou taumafai e pulea! Ia iloilo ni taʻiala a le Tusi Paia e aogā e pulea ai lenei vaega o le tino e ui ina laʻitiiti, ae mataʻutia.

● “O le tele o upu e lē asa ai ma se mea sesē, a o lē na te pulea ona laugutu e gaoioi o ia ma le faautauta.” (Faataoto 10:19) O le tautala soo, e tatou te ono faia ai se tala sesē ma upu faatigā. E faatusaina i se afi le laulaufaiva e lē pulea i le faitala, ma le faia o tala taufaaleaga. (Iakopo 3:5, 6) O lea, a o leʻi tautala e tatau ona tatou mafaufau i āuga o a tatou faamatalaga, ina ia ʻpulea ai o tatou laugutu.’ O le mea lea e iloa ai lo tatou faautauta, ma faatuatuaina ai i tatou e isi.

● “Ia faalogologo lelei, . . . ae aua le vave ona tautala, ma aua foʻi le vave ona ita.” (Iakopo 1:19) E fiafia isi pe a tatou faalogologo lelei a o talanoa mai, auā e faaalia ai e tatou te amanaʻia ma faaaloalo iā i latou. Ae faapefea pe a fai e se isi se tala e faaita ai oe? Ia ʻaua le vave ona ita’ ma ʻalofia le tali atu i le ita. O ai na iloa, atonu e ese se māfuaaga o ita ai, ma e toe faatoese atu ona o ana upu faatigā. Pe e faigatā ona aua neʻi “vave ona ita”? Tatalo i le Atua ina ia e maua pea le toʻa. E faafofoga mai o ia i talosaga mai i le loto.​—Luka 11:13.

● “[O] le laulaufaiva agamalu e gau ai se ivi.” (Faataoto 25:15) E ese mai manatu masani, o le agamalu o se uiga e malosi. O se faataʻitaʻiga, o le tali filemu, e mafai ona manumalo ai i teteega faigatā e māfua mai i le ita po o le faailoga tagata. O le mea moni, e lē faigofie le faaalia o le agamalu, aemaise pe a faaalia mai uiga lē migao. O lea, ia mafaufau i aogā o le faia o mea o loo fai mai ai le Tusi Paia, faapea ma iʻuga o le lē faia.

Ioe, o taʻiala a le Tusi Paia, o “le atamai [lea] mai i lugā.” (Iakopo 3:17) Pe afai e tatou te tautatala ma le atamai, o le a faamamaluina, faafiafiaina ma atiaʻe ai isi i a tatou upu “e pei o apu auro i totonu o mea siliva ua togitogiina,” e talafeagai i taimi uma.​—Faataoto 25:11.