Aiseā ua Tosina ai Tagata i Faiga Faataulāitu?

O LE tali i lenā fesili, e tele ina faalagolago i le mea o loo nofo ai le tagata, faapea ona talitonuga faalotu ma aganuu na ola aʻe ai. I lou vaipanoa, aiseā ua tosina ai tagata i faiga faataulāitu? Atonu ua tosina i latou i se tasi o māfuaaga nei.

● Fia iloa O le uiga masani o tagata, o le fia iloa, ma o faiga faataulāitu, e tele i misitelio, o lea e latou te fia iloa ai na mea. Ua fia iloa e nisi tagata pe e iai se mana e lē vaaia o loo faapogaia faiga faataulāitu. O isi e mananaʻo e faataʻitaʻi se laupapa e fesootaʻi ma mea faataulāitu, pe faitau i le mataupu, o oe ma lou fetu, ina ia iloa ai pe tupu moni le mea o loo fai mai ai. A o isi, e auai i se faatasiga e fesootaʻi ai ma tagata ua feoti, pe talanoa atu i sē e valoia le lumanaʻi.

● Faafiafiaga I tausaga talu ai nei, na mātauina ai le faateleina o mea faafiafia, e pei o tusi, ata tifaga ma taaloga i komepiuta, e faavae i faiga faataulāitu ma uputuu a lotu faapaupau anamua. O nisi o nei mea faafiafia, o loo aofia ai faiga sauā ma feusuaʻiga.

● Popole e uiga i le lumanaʻi Ua valoia i le Tusi Paia: “O aso e gata ai e oo mai ai aso e sili ona faigatā.” (2 Timoteo 3:1) Ua tatou iai tonu i aso faigatā, ma e toʻatele tagata o loo saʻili mo se taʻitaʻiga, e ala i le talanoa atu i ē e faia faiga faataulāitu, e pei o ē e saʻiliʻili i fetu, ē e manatu e mafai ona fesootaʻi ma ē ua maliliu, ē e faitauina alofilima o tagata, ma ē e valoia le lumanaʻi. Na taʻua e sē e valoia le lumanaʻi: “O faiga faataulāitu, o se tasi lea o pisinisi e lē mafai ona aafia pe a faalētonu le tamaoaiga. E lē masani ona ō mai tagata iā te oe, pe afai o loo fiafia.” Na taʻua e se tagata i Kanata, o sē e manatu e mafai ona talanoa ma ē ua maliliu: “Talu ai nei, na vili mai ai iā te aʻu ni tagata faipisinisi, i telefoni o a latou ofisa po o a latou telefoni feaveaʻi, ae musumusu mai.” Na ia taʻua atili: “I le taimi muamua, sa masani ona masalosalo nei tagata, ma e lē fiafia e talanoa atu i sē e valoia le lumanaʻi.”

● Maʻi o le tino I nisi atunuu, e masani ona mumusu ē ua mamaʻi tigāina e toe ō i fomaʻi, ae ua ō i taulasea o ē e faia faiga faataulāitu. E ono faapea ua māfua ona mamaʻi, ona o se mala po o se faalauatau. Ina ia aveese le faalauatau, e saʻili atu uō po o tauaiga o lē ua maʻi i se faataulāitu, o sē e manaʻo e totogi atu se tupe telē.

● Manaʻo ia puipuia ma maua se laki I nisi vaipanoa o Aferika, e totogi ai e tagata o le nuu se “perofeta” mai i se lotu e malolosi a latou faatosinaga, ina ia tutuli ese agaga leaga mai i le nuu. O nisi o a latou tū faalotu, e aofia ai le inuina o vailaau oona ma “vai paia.” Ae i isi vaipanoa, e ō atu tagata i ē e saʻili i agaga, ina ia maua se laki mo se fale fou po o se tuugamau.

● Puipuiga o tamaiti I Papua Niu Kini, e lē manaʻo se tinā e alu i fafo i le pō ma sana pepe faatoʻā fanau. Aiseā? E popole neʻi afāina le pepe i agaga leaga. I Uganda, ina ia puipuia pepe mai i agaga leaga, e masani ona nonoa e tinā ni manoa i tapulima po o tapuvae o a latou pepe, ma o nisi taimi e tuu iai ni lopa ma atigi figota i na manoa.

 ● Le maliu o sē e pele O Sir Arthur Conan Doyle, o le tusitala mai i Peretania, na feoti lona atalii, lona uso, le tuagane laʻitiiti o lana avā, ma le tama tama a lona tuafafine laʻitiiti, i le Taua Muamua a le Lalolagi. Ona o le mafatia ma le fia maua o se fesoasoani, na ō ai Doyle ma lana avā i ni faatasiga e fesootaʻi ai ma tagata ua feoti, i le faamoemoe e talanoa atu ai i le la tama ua maliu. I aso foʻi nei, e toʻatele ua ō atu i ē e saʻili i agaga, ina ia taumafai e talanoa atu ai i ē e pele iā i latou ua maliliu. I nisi atunuu, e aʻoaʻo e lotu faaleaganuu ma lotu ua faapea mai o Kerisiano e faapea, ua māfua le oti ona o se mea leaga na faia e agaga leaga. Ua faia e nisi lotu ni tū faalotu ma faamalosia tagata o le aiga o loo feola, e totogi na sauniga, ina ia lē feoti ai isi tagata o le nuu.

● Fefefe i ē ua maliliu Ua matuā aafia tagata i talitonuga e uiga i le oti ma ē ua maliliu. O lea, ua faia ai i le tele o atunuu tū faalotu, e aofia ai le faatigāina e le tagata o ia lava, ina ia faafiafia ai ē ua maliliu, pe faamaonia ai e alolofa iā i latou. O nisi tagata i motu o le Pasefika, ua faamalosia fafine ma tamāloloa ua feoti o latou taʻitoʻalua, e oofu i ofu uli ma faavauvau mo ni masina, ma loka i o latou fale ina ia lē mafai ai ona latou aai i meaʻai sa fiafia i ai lē ua maliu. O ē e faia lenei tū, e ono iʻu ina lotovaivai pe mamaʻi ona o le fia aai, ma oti ai.

E manino mai, e tele mea o loo faatosina ai tagata i faiga faataulāitu. E tāua tele la ona tatou malamalama i le pogai moni o aʻoaʻoga e uiga i faiga faataulāitu! O lea la, seʻi o tatou iloiloina le Tusi Paia, e na o lea le tusi o loo faamatala mai ai mea uma e aofia ai i faiga faataulāitu.