Auala 5​—Ia Uunaʻia Oe ma Lou Aiga

“O i latou uma e iai le utaga mamao e taʻitasi ma gaoioi ma le poto.” (Faataoto 13:16) O lou iloaina o faamatalaga faigofie e uiga i le soifua mālōlōina, e faaaupega ma uunaʻia malosi ai oe e faia suiga manaʻomia, mo lou lava soifua mālōlōina lelei faapea lou aiga.

Ia aʻoaʻoina pea. I le tele o atunuu, ua saunia e faalapotopotoga i le lautele ma tumaʻoti, polokalame faaleaʻoaʻoga ma tusi i le tele o mataupu tau i le soifua mālōlōina. Ia faaaogā na mea, ma aʻoaʻo oe lava i auala faigofie e faaleleia ma ʻalofia ai le lamatia o lou soifua mālōlōina. Ia fetālaʻi le mafaufau ma lotomalie e fai ni suiga faigofie.

O masaniga lelei ua e aʻoaʻoina ma fai, e aogā tele i lau fanau ma a latou fanau pe a mavae atu i latou. Pe a fai e mātua se faaaʻoaʻoga lelei e faatatau i meaʻai paleni, tumamā, moe, faamalositino, ma le puipuia o faamaʻi, o le a aogā i a latou fanau.​—Faataoto 22:6.

O ā isi mea e manaʻomia? E lē gata e naunau le tagata mo lona lava lelei, ae e iai isi mea e manaʻomia e tausia ma faatumauina ai le soifua mālōlōina lelei. E ono faigatā ona taofia ni masaniga leaga ua leva ona fai, ma o le faia foʻi o ni suiga faigofie, e masani ona manaʻomia ai se uunaʻiga malosi. E oo foʻi i le fefefe i maʻi tugā ma le oti, e lē o uunaʻia ai lava nisi e fai mea ua latou iloa e lelei mo i latou. O le ā la e uunaʻia ai i latou? I le pei o i tatou uma, e ao ona latou manatua se faamoemoe po o se fuafuaga e sili ona tāua i le olaga.

E tatau ona soifua mālōlōina ma malolosi paaga, ina ia fesoasoani pea le tasi i le isi. E tatau ona naunau mātua e lagolago ma aʻoaʻo pea a latou fanau. E tatau i fanau ua matutua ona tausia o latou tauaiga ua matutua. Ia iai foʻi se faanaunauga lelei ia avea ma faamanuiaga i tagata, i lo o le avea ma avega mamafa. O nei mea uma e faia i le alofa ma le manatu mamafa i isi.

O se uunaʻiga malosi, e māfua mai i le lotofaafetai ma le tuutoina i Lē na faia i tatou. O ē e talitonu i le Atua, e naunau e puipui lana meaalofa matagofie o le ola. (Salamo 36:9) Pe afai e tatou te mālōlōina lelei, e atili ai ona uunaʻia i tatou e auauna i le Atua. O le māfuaaga sili lenā, e uunaʻia ai se tasi e tausia lelei lona soifua mālōlōina.

[Ata i le itulau 8]

Olioli i aogā o se soifua mālōlōina lelei