Tuusaʻoloto e Upu Moni o le Tusi Paia

NA FETALAI atu Iesu i se vaega o lana ʻaufaalogologo: “E iloa e outou le upu moni, e tuusaʻoloto foʻi outou e le upu moni.” (Ioane 8:32) Ua faaalia i faaaʻoaʻoga o loo mulimuli mai, o lenā saʻolotoga e aofia ai le saʻoloto mai i temoni, tagata pepelo ma taufaasesē o loo i tua o faiga faataulāitu.​—Ioane 8:44.

O nei faaaʻoaʻoga ua faamatilatila mai ai le mana o upu moni o le Tusi Paia e tuusaʻoloto ai tagata. Ioe, e na o le upu moni e tuusaʻoloto ai tagata. O lea la, ia iloilo e oe lava le Tusi Paia. O le a e fiafia i mea e te aʻoaʻoina mai ai.

[Ata i le itulau 18]

O loo faaāta mai e tagata i ata, i latou na taʻua

● O Susana, o se ositaulaga fafine i lana lotu i Pasili. Sa manaʻo e faaaogā lona mana faataulāitu e fesoasoani ai i ē matitiva. Sa fiafia foʻi e “talanoa ma lona tinā ua maliu.” Ae i se tasi taimi, na talosaga atu ai lona “tinā” iā te ia e pule i lona ola, ina ia la faatasi ai i le nofoaga o agaga. Na matuā mafatia Susana i lenei mea, ma oo ai ina fai ana miti leaga. Ona amata lea ona suʻesuʻe e Susana ma lana tane le Tusi Paia ma Molimau a Ieova. Sa faigatā ona la “tetee atu i le Tiapolo,” ae mulimuli ane na ʻsola ese o ia.’ (Iakopo 4:7) Ua la maua nei le filemu, ma ua lē toe faia ni miti leaga a Susana. Na tusi o ia, “E tele mea ou te faafetai ai iā Ieova, a o le mea sili, ona ua Ia aveesea i maʻua mai i le pogisa faaleagaga.”

[Ata i le itulau 18]

● O Timoteo, e nofo i Aferika i Sisifo, e logonoa toe gūgū. * Ona sa lē mafai e fomaʻi ona togafitia o ia, na alu ai i ē e faia faamālōlōga, ae e leʻi aogā. Na tusi o ia, “Na tigā loʻu loto ona o le taufaasesē.” Ona suʻesuʻe lea o Timoteo ma Molimau a Ieova i le Tusi Paia, ma na latou faamatala atu iā te ia le fuafuaga a le Atua e aveese maʻi ma tulaga lē lelei uma. Na taʻua e Timoteo, “Ou te faatali ma le naunau i le lalolagi fou a le Atua, ʻo le a faalogo ai taliga o ē e tutuli, e alaga fiafia foʻi le laulaufaiva o lē ua gūgū.’” (Isaia 35:1-6) I le taimi nei, o loo fiafia o ia e faaaogā le masini e faaali ai DVD, e faailoa atu ai upu moni o le Tusi Paia i ē e logonoa, ma fesoasoani ai iā i latou ia maua le saʻolotoga moni.

 [Ata i le itulau 19]

● O Evelina mai i Estonia, sa matuā aafia i faiga faataulāitu. Talu ai na faamālōlō e Iesu tagata, na manaʻo ai foʻi Evelina e faia faapea. Sa sili ona fia fesoasoani i lona tinā sa maʻi tigāina. Ina ia iloa māfuaaga ma togafitiga o maʻi tigāina, sa ia aʻoaʻoina le auala e faaaogā ai fua faatautau. Mulimuli ane na ia suʻesuʻeina le Tusi Paia. O le iʻuga, na ia taʻua, “Na ou iloa na faasesēina aʻu. O lea na ou susunu ai aʻu tusi ma fua faatautau sa faaaogā i faiga faataulāitu.” I aso nei, o loo ia aʻoaʻo atu i isi upu moni o le Tusi Paia e tuusaʻoloto ai.

[Ata i le itulau 19]

● Sa ola aʻe Maria i se motu i Papua Niu Kini, ma e fefefe tagata o lea motu i ē ua feoti. Pe a oti se tagata o le nuu o Maria, e moe o ia i lalo o le moega o se isi tagata, talu ai e fefe ina neʻi faaleagaina o ia e le agaga o le tagata ua oti, pe a na o ia. Ona ia aʻoaʻoina lea mai i le Tusi Paia, o ē ua maliliu o loo momoe i tuugamau, e faatalitali ai e toetutū mai i le ola i le Parataiso i le lalolagi. (Luka 23:43; Ioane 11:11-14) O le iʻuga ua lē toe fefe o ia i ē ua maliliu.

[Ata i le itulau 19]

● Na ola aʻe Alisa i se aiga Molimau a Ieova i le Iunaite Setete, ma sa fiafia o ia i tusi ma ata tifaga faataulāitu. Ona amata lea ona ia mafaufau loloto i upu moni o le Tusi Paia sa ia aʻoaʻoina. I le iloaina o loo taumafai e ʻʻai i le laoai a Ieova ma le laoai a temoni,’ ona suia ai lea o ona ala, ma ua ia maua nei se lotofuatiaifo mamā i luma o le Atua.​—1 Korinito 10:21.

[Faaopoopoga i lalo]