Aiseā Ua Tele Ai Puapuaga?

O TAʻITAʻI lotu o ē faapea mai e latou te iloa le tali i le fesili o loo i luga, e masani ona latou aʻoaʻoina, o puapuaga o le faasalaga lea mai i le Atua. O se faaaʻoaʻoga, i ni nai aso talu ona mavae le mafuiʻe i Haiti, na faapea atu ai se faifeʻau i lana ʻaulotu, o lea mala o se feʻau mai i le Atua. O isi e lē o mautinoa i lenā manatu. Ua taʻua e se polofesa i mataupu faalelotu mai i Amerika, o le toʻatele o tagata e manatu ai faapea: “O le māfuaaga e faapogaia ai e le Atua mala, o se mea lilo e tatou te lē fesiligia. E pau lava la tatou matafaioi o le faaalia lea o le faatuatua.”

Pe e moni ea o le Atua o loo “faapogaia” puapuaga o tagata? E matuā leai se mea faapena o taʻua i le Tusi Paia! E leʻi aofia ai puapuaga i le fuafuaga a Ieova le Atua mo tagata. Peitaʻi, na fouvale le uluaʻi ulugalii i le pule a le Atua, i le filifili lea o a laʻua lava faatulagaga o le lelei ma le leaga. Na la fulitua i le Atua ma mafatia ai i iʻuga leaga. O lea ua tatou aafia ai i aso nei i iʻuga o la laʻua filifiliga leaga. Ae e leʻi faapogaia lava e le Atua puapuaga o tagata. Ua taʻua i le Tusi Paia: “Pe a faaosoosoina se tasi, aua neʻi manatu: ʻUa faaosoosoina aʻu e le Atua.’ E lē mafai ona faaosoosoina le Atua i mea leaga. E lē faaosooso atu foʻi o ia i se tasi.” (Iakopo 1:13) E mafai ona aafia so o se tagata i mafatiaga, e oo foʻi i ē alofagia e le Atua. Seʻi manatu i faaaʻoaʻoga nei:

● Na maua le perofeta o Elisaia i se maʻi tigāina e leai se vaifofō.—2 Tupu 13:14.

● Na tusi le aposetolo o Paulo, na faaauau pea ona ia ʻfia ʻai ma fia inu, ma tau leai ni ofu, ma tatuʻiina, ma leai se fale e nofo ai.’—1 Korinito 4:11.

● Sa maʻi ma “mafatia” le Kerisiano o Epaferoti.—Filipi 2:25, 26.

E leai se mea o tatou faitau ai e faapea na faasalaina e le Atua nei tamāloloa e toʻatolu ona o a latou agasala. Peitaʻi, ua faailoa mai e le Tusi Paia, e lē tuuaʻia le Atua mo puapuaga. O loo taʻua ai foʻi māfuaaga autū e tolu e masani ona faapogaia ai puapuaga.

 Filifiliga a le Tagata Lava Ia

“O le mea e lūlūina e le tagata, o le mea lava lea e na te seleseleina mai.” (Kalatia 6:7) E mautinoa lava, o se tagata e filifili e ulaula, aveave ma le lē faaeteete, pe faamaʻimau ana tupe, e ao ona ia lavātia nisi o iʻuga leaga e oo i ai ona o ana filifiliga.

E ono oo foʻi iā i tatou puapuaga ona o filifiliga manatu faapito a se isi tagata. O le mea moni, ua faia e tagata mea e sili ona leaga, e mai lava i sauāga na faia e le ʻau Nasi e oo i le faaleagaina o fanau. O le faaaogā sesē o le saʻolotoga e filifili ai, ua faia ai e nisi filifiliga e oo ai puapuaga i isi.

O Mea e Tutupu Faafuaseʻi

I le uluaʻi senituri T.A., na paʻū ai se ʻolo telē i Ierusalema, lea na feoti ai tagata e 18. I le faasino atu i na tagata, na fetalai Iesu: “Pe tou te manatu ua sili atu ona agasala i latou, . . . nai lo o isi tagata uma o nonofo i Ierusalema? O le mea moni, e leai.” (Luka 13:4, 5) Na silafia e Iesu e leʻi faasalaina e le Atua na tagata na feoti. Peitaʻi, na ia iloa mai i le mea na taʻua muamua i le Afioga a le Atua: “E tutupu faafuaseʻi mea iā i latou uma i le taimi e leʻi faatalitalia.” (Failauga 9:11) E tele faalavelave ua tutupu ona o le sesē o le nofoaga e iai le tagata i le taimi sesē, po o le sesē o tagata. O se faataʻitaʻiga, ua faaalia i lipoti e sili atu ona tele puapuaga e oo i tagata pe afai e latou te lē amanaʻia lapataʻiga, ma ō atu i fale e lē lavātia tau matuā leaga ma mafuiʻe matuā malolosi. I tulaga faapena, e toʻatele tagata e aafia ai i mea e tutupu faafuaseʻi ma faapogaia ai le tele o puapuaga.

“[O] le Pule o Lenei Lalolagi”

Ua faapea mai le Tusi Paia: “O le lalolagi atoa o loo nofo toʻilalo i le pule a lē o loo leaga.” (Ioane 12:31; 1 Ioane 5:19) O “lē o loo leaga” o Satani le Tiapolo, o se foafoaga agaga malosi ua faamatalaina o “le pule a le taʻitaʻi o le ʻea.” Ua uunaʻia e Satani “le agaga lea o loo galue i fanau e lē usiusitaʻi.” (Efeso 2:2) O nisi o solitulafono, e pei o le fasiotia o se vaega atoatoa o tagata ma le faaleagaina o fanau, ua matuā sili ona mataʻutia, lea ua faigatā ai mo le toʻatele ona talitonu e mafaia e se tagata ona faia nei mea e na o ia e aunoa ma taaʻiga a Satani.

Faamata la ua uiga atu ai e lē o manatu mai le Atua i o tatou puapuaga? Pe e mafai, ma po o le a ia faia ea se mea ina ia faamuta ai?