Le Manatu o le Tusi Paia

Le Māfuaaga e Tāua ai Tala e Tatou te Faia

Ina ua māeʻa sana talanoaga faaaloalo ma se tinā matua, na taʻua ai e le palemia le tinā o sē e finauvale, ma na ia otegia lana ʻaufaigaluega mo le lē taofia o lenā tinā mai le faalavelave atu iā te ia. Na aunoa ma le iloa e le palemia o loo ola pea le masini faaleotele leo, ma na matuā faateʻia tagata o le atunuu na lagona ifo lana faamatalaga e uiga i le tinā. Na matuā faaleagaina lona talaaga, ma i le valu aso mulimuli ane, na faiaʻina ai o ia i le palota ma lē toe avea ai o se palemia.

E LEAI se tagata e mafai ona pulea atoatoa lona laulaufaiva. (Iakopo 3:2) Peitaʻi ua faailoa mai i le mea na tupu o loo taʻua i luga, le tāua o tala e tatou te faia. O lou talaaga, o lau galuega, o le lelei po o le lē lelei foʻi o lau faiā ma isi, e faalagolago uma i le auala e te tautala ai.

Ae pe e te iloa e iai se aafiaga e sili atu o tala o loo e faia? Ua faamatala mai i le Tusi Paia, o tala e te faia, e iloa ai le ituaiga moni o tagata e iai oe. Na faapea mai Iesu: “O le tele o mea i le loto e tautala mai ai le gutu.” (Mataio 12:34) O lea la, e tāua le toe iloilo lelei o le auala o loo e tautala ai, talu ai e faailoa mai e au upu le ituaiga o tagata e iai oe, e aofia ai ou uiga, manatunatuga, ma faalogona. Pe e mafai ona fesoasoani mai le Tusi Paia? Ia mātau manatu o loo mulimuli mai.

Le Auala e Faaleleia Ai Lau Tautala

O upu e amata mai o ni manatunatuga. Ina ia faaleleia lau tautala, e manaʻomia ona faaleleia le auala e te manatunatu ai. Mātau le auala e mafai ai e le faatatauina o taʻiala o le Afioga a le Atua, ona taaʻina ai ou manatunatuga lea e iʻu ina taaʻina ai le auala e te tautala ai.

Faatumu lou loto i mea lelei. Ua faamatalaina i le Tusi Paia na mea e ala i le faapea mai: “O mea uma ua moni, o mea uma ua matuā tāua, o mea uma ua tonu, o mea uma ua mamā, o mea uma e faatupu ai le lotofiafia, o mea uma ua taʻuleleia, o amioga lelei uma lava ma mea e viia ai se tasi, ia faaauau ona manatunatu i nei mea.”—Filipi 4:8.

O le faatatauina o lenā fautuaga poto, o le a fesoasoani iā te oe ina ia aveesea ni manatunatuga e lē fetaui. Manatua e faatumuina o tatou manatunatuga i mea e tatou te vāai ma faitau i ai. Ina ia ʻalofia manatunatuga lē lelei, e ao ona ʻalofia taaʻiga lē lelei. E uiga atu i le ʻalofia o faafiafiaga sauā ma matagā. (Salamo 11:5; Efeso 5:3, 4) Nai lo lea, ia taulaʻi atu lou mafaufau i manatu e mamā ma tāua, ma e mafai ona fesoasoani le Tusi Paia ina ia e faia faapea. O se faataʻitaʻiga, faitau le Faataoto 4:20-27; Efeso 4:20-32; ma le Iakopo 3:2-12. Mātau pe faapefea i le faatatauina o taʻiala o loo i nei mau ona faaleleia ai le auala e te tautala ai. *

Ia mafaufau lelei a o leʻi tautala atu. Ua faapea mai le Faataoto 12:18: “O le tagata e tautala lē mafaufau, ua pei o le tutuʻi o le pelu, a o le laulaufaiva o ē e atamamai, e mālōlō ai.” Pe afai o au upu e ʻtutuʻi,’ pe e faatigā ai faalogona o isi, e lelei la ona e taumafai e mafaufau muamua a o leʻi tautala atu. Ia utagia le fautuaga o loo i le Faataoto 15:28: “O le loto o lē e amiotonu e mafaufau loloto ina ia tali atu, a o gutu o ē e amioleaga e puna mai ai mea leaga.”

 Ia taumafai e faia lenei mea. I le masina o loo sosoo mai, ia maumauaʻi e aua neʻi fai atu le tala e muamua lava oso aʻe i lou mafaufau, aemaise lava pe a e ita. Nai lo lea, ia mafaufau i mau o le Tusi Paia o loo taʻua i lenei mataupu, ma ia faia ni taumafaiga fitā ina ia tautala ma le atamai, alofa ma ia toʻafimālie. (Faataoto 15:1-4, 23) Ae e lē na o le pau lenā.

Tatalo mo le fesoasoani a le Atua. Na tatalo se tusitala o le Tusi Paia: “Ia mālie iā te oe upu a loʻu gutu ma manatunatuga o loʻu loto Ieova e.” (Salamo 19:14) Ia faailoa atu iā Ieova lou faanaunauga ina ia e tautala atu i se auala e mafai ona faafiafiaina ai o ia ma maua ai ni faauōga ma isi. Ua faapea mai le Faataoto 18:20, 21: “O le a e fiafia pe a e tautala i se auala lelei. O le ola ma le oti e faalagolago i upu e tatou te tautatala ai!”—Contemporary English Version.

Ia faaaogā le Afioga a le Atua e pei o se fāʻata. Ua pei le Tusi Paia o se fāʻata lea e mafai ona e iloilo totoʻa ai oe lava. (Iakopo 1:23-25) O se faataʻitaʻiga, a o e manatunatu i taʻiala e tolu o le Tusi Paia o loo mulimuli mai, ia fesili ifo iā te oe lava, ʻE faapeʻī le auala o loo oʻu tautala ai, ma loʻu talaaga e tusa ai ma laʻu tautala?’

“O le tali filemu e liliueseina ai le ita, a o le upu faatigā e tupu ai le ita.” (Faataoto 15:1) Pe e te tautala i se auala agamalu ma filemu?

“Ia aua neʻi alu atu se upuleaga mai i o outou gutu, a ia fai atu ni upu lelei e atiaʻe ai i taimi e tatau ai, ina ia aogā i ē o faalogologo i ai.” (Efeso 4:29) Po o faalaeiauina isi i le auala e te tautala ai?

“Ia lē aunoa ona outou tautatala atu i upu e logolelei, ia faamāi i le masima, ina ia outou iloa le auala e tali atu ai i tagata taʻitoʻatasi.” (Kolose 4:6) Po ua e taumafai, aemaise lava i taimi faigatā, ina ia logolelei au faamatalaga ma faigofie ai i isi ona faalogo mai?

Pe a e vaai i le fāʻata ma faaleleia mea o loo faalētonu, o le a mafai ai ona avea oe ma sē e aulelei i le vaaiga a isi ma e lagona ai le fiafia. E faapena foʻi aogā e te maua pe a faaleleia le auala e te tautala ai, e ala i le vaai i le fāʻata o le Afioga a le Atua.

[Faaopoopoga i lalo]

PO O E TAUMĀNATU EA I NISI TAIMI?

● O ā mea o loo faaalia i tala e te faia?—Luka 6:45.

● O le ā le auala e tatau ona e tautala atu ai i isi?—Efeso 4:29; Kolose 4:6.

● O ā mea e mafai ona e faia ina ia faaleleia ai tala e te faia?—Salamo 19:14; Filipi 4:8.

[Ata i le itulau 11]

O tala e tatou te faia, e mafai ona aafia ai lo tatou talaaga ma faiā ma isi