Māfuaaga ua Liliu ai Nisi i Faiga Sauā

NA FESILIGIA Joseba, o lē e nofo i Sepania, i le māfuaaga na auai ai i se vaega o tagata e maelega vālea i le faaauiluma o faigātaua. Na faapea mai o ia: “Na matuā lē mafai ona matou tatalia faiga lē tonu ma pulega sauā na matou fesagaʻia. I le aai tele o Bilbao lea ou te nofo ai, e masani ona ō mai leoleo, fasi tagata ma puʻea faapagota i latou.”

Na faapea atili mai Joseba: “Na puʻe aʻu faapagota i se tasi o taeao ina ua faaali atu soʻu manatu i auala na faileagaina ai e leoleo tagata. O loʻu ita tele, na ou manaʻo ai e faia se gaoioiga—po o le faia o faiga sauā pe leai foʻi—ina ia faaleleia ai lea tulaga.”

Sauāga ma le Tauimasui

Nai lo o le taʻutonuina o sauāga, ua faailoa mai i le Tusi Paia, “o sauāga e mafai ona amio ai e pei o se vale le tagata atamai,” i se tulaga e gaoioi ai e aunoa ma le mafaufau lelei. (Failauga 7:7) E matuā feita le toʻatele pe afai e sauāina ma le lē tonu i latou ona o lo latou ituaiga, o a latou tapuaʻiga, ma lo latou atunuu.

O se faataʻitaʻiga, ua faapea mai Hafeni lea na taʻua i le mataupu ua mavae: “O le tele o ō matou fanua, na aveesea faamalosi. E fetauaʻi meaola ina ia tumau le mea e nonofo ai, o lea, na foliga mai o se mea masani mo i matou le tau mo a matou aiā tatau ma fanua.” I le faamatalaga a se tagata faapāpomu pule i le ola a o leʻi oti, na faapea mai ai o ia: “Seʻiloga lava e taofia le faapā o pomu, fasiotia tagata e ala i kasa oona, faafalepuipuiina ma le faileagaina o o matou tagata, ona faatoʻā matou taofia lea o nei fetauaʻiga.”

Uunaʻiga a Lotu

E ui sa masani ona uunaʻia e faigāmalo ē e maelega vālea i le faaauiluma o faigātaua, ae i aso nei, ua avea lotu ma vaega autū e uunaʻia nei vaega. Na maua e se taʻitaʻi o le lalolagi se feʻau (fax) a lē na avea ma fofoga fetalai o se tasi o na vaega, e faapea: “E matou te lē valelea pe mananaʻo i le pule. O loo matou faia le auaunaga i le Atua, ma o le māfuaaga lea e matou te maumaututū ai i o matou talitonuga.”

Na tusi Daniel Benjamin ma Steven Simon i la la tusi The Age of Sacred Terror, e uiga i uunaʻiga a  lotu e faapea: “I lenei lalolagi ua tele ina liulotu tagata, ua talitonu tagata o lotu autū ma lotu lāiti e fou mai e faapea, e tatau ona avea faiga sauā ma se vaega o o latou talitonuga.” Ina ua uma ona lipotia e se tagata suʻesuʻe le tele o mea na ia taʻua, “o ni faiga faatupu faalavelave mataʻina i le lalolagi aoao,” ona ia faapea mai lea: “E autasi uma ē o loo faapogaia faiga faatupu faalavelave i le manatu, o a latou gaoioiga o loo faafiafiaina ai le Atua ma o se faatonuga mai iā te ia.”

Ae o ē e maelega vālea i lotu, ua latou matuā maumaututū i o latou lava manatu, lea e lē o ōgatusa ma talitonuga ma aʻoaʻoga a lotu o loo latou auai i ai.

Tumau Pea i Loto

Na matuā faileagaina Joseba, lea na taʻua i le amataga ina ua puʻea faapagota o ia. Na ia taʻua: “O faiga sauā na oo iā te aʻu, na ou talitonu ai e saʻo loʻu lē fiafia o loo iai. E talafeagai pe afai ou te oti ina ia mafai ona iai ni suiga.”

E masani lava, o mea o loo aʻoaʻoina i totonu o nei vaega ua atili ai ona tele māfuaaga e auai ai nei tagata i faiga sauā. Ua faapea mai Hafeni: “A o iai i nofoaga o sulufaʻiga, sa iai ni faapotopotoga o tagata na aʻoaʻoina i matou e faapea, o loo faaauau pea ona faia e tagata papaʻe ni auala ina ia mafai ai ona pulepuletutū i tagata uli.” O le ā le iʻuga?

Ua faapea atili mai o ia: “Na ou lagona le faateteleina o loʻu ʻinoʻino i tagata papaʻe ma ou te leʻi talitonuina i latou. Mulimuli ane, sa lē mafai ona ou onosaia ma na ou manatu ai e tatau i lo matou augātupulaga ona faia se gaoioiga.”

O le mea e faateʻia ai, ona e ui ina mauaa lagona ʻinoʻino na iai iā Joseba ma Hafeni, ae na suia uma na lagona. O le ā le mea na suia ai o la loto ma mafaufau? O le a faamatala i le mataupu o sosoo mai.

[Faamtalaga faaopoopo i le itulau 6]

“O faiga sauā na oo iā te aʻu, na ou talitonu ai e saʻo loʻu lē fiafia o loo iai. E talafeagai pe afai ou te oti ina ia mafai ona iai ni suiga.”—Joseba