“Na Pau Lava le Mea na ou Manaʻo i ai o Laʻu Meli”

NA TAʻUA e Aneterea, o se tagata paʻepaʻe na fanau i Aferika i Saute, ma o loo nofo i Namibia e faapea: “E lē mafai ona galo iā te aʻu lenā taeao o le Aso Gafua i le falemeli. Na faatumulia i tagata. Na ou vaaia se ato e foliga mai e leai se isi e ana. Na maua laʻu meli ma ou alu ese loa. Pe ā ma le tolu minute talu ona alu ese laʻu taavale, ae ou lagonaina loa se mea ua pasae leotele. Na ou iloa mulimuli ane, o se pomu na pā e lē mamao ese mai i le mea na ou tū ai i totonu o le falemeli.”

Na faapea mai Aneterea: “Na pau lava le mea na ou manaʻo i ai o laʻu meli. Ae na matuā faateʻia aʻu i le iloaina mulimuli ane, o ē na maliliu ai o tagata e lē sala ma ou te masani i nisi o i latou. E ui lava na tupu lenā mea i le 25 tausaga ua mavae, ae ou te lagona pea le fefe pe a toe mafaufau i ai. E iai taimi, ou te toe manatua ai le toʻatele o tagata na feoti ma manunuʻa, ma ou iloa ai na semanū ou te oti ai foʻi i inā.”

O se Faafitauli i le Lalolagi Aoao

Atonu e te leʻi oo i se tulaga faapena, ae e mautinoa ua e faalogo o loo tutupu i le lalolagi atoa. O loo faatupulaʻia pea tagata o ē faia faiga sauā, lea e masani ona taʻua o faiga faatupu faalavelave, ina ia faataunuu a latou fuafuaga.—Tagaʻi i le pusa “O Ai Tagata Faatupu Faalavelave?” i le itulau o sosoo mai.

Na iloa e se tagata e suʻesuʻe ma tusitusia tala i nusipepa e faapea, i le 1997 “e na o le fā atunuu na masani ona tutupu ai faiga faatupu faalavelave pule i le ola.” Ae i le 2008, na toe tusi lava lenei tagata suʻesuʻe e faapea, “e silia ma le tolu sefulu atunuu i konitineta taʻitasi, vaganā ai Ausetalia ma le Anetatika, na aafia i iʻuga leaga o faiga faatupu faalavelave pule i le ola.” Na ia taʻua i le  faaiʻuga o lana lipoti, o na faiga faatupu faalavelave “o loo lagolagoina e le tele o faalapotopotoga o loo fasiotia le tele o tagata i tausaga taʻitasi.”—The Globalization of Martyrdom.

Seʻi toe manatu i le faalavelave na taʻua i le amataga. O le vaega na tataoina le pomu, na manatu iā i latou lava o tagata tau mo le saʻolotoga. Na faia a latou taumafaiga ina ia tutoʻatasi mai le faigāmalo lea na pulea lo latou atunuu i lenā taimi. Peitaʻi, o le ā e uunaʻia ai tagata e faia nei mea ina ia taunuu a latou fuafuaga? Seʻi mātau le faaaʻoaʻoga a Hafeni.

Na fanau Hafeni i Zambia, ma na ola aʻe i totonu o nofoaga mo tagata sulufaʻi i atunuu tuaoi. Na faapea mai o ia: “Sa ou ita tele i sauāga ma faiga lē tonu na faia i loʻu aiga ma isi.” O lea, na avea ai o ia ma se tasi o ē e maelega vālea i le faaauiluma o faigātaua, ma le manatu e taofia ai faiga lē tonu. O le vaega foʻi lenā sa iai ona mātua.

Pe a toe mafaufau i na taimi, na faapea atili mai Hafeni: “O le mea e pito sili ona faanoanoa ai, o aafiaga taufaalogona o le ola aʻe i totonu o se nofoaga mo le ʻausulufaʻi. Na aveesea fanau mai i o latou tinā, tamā, ma o latou uso ma tuafāfine. Na ō tamaiti matutua i le taua, ma o le toʻatele e leʻi toe foʻi mai. Ou te leʻi vaai lava i loʻu tamā, e oo foʻi i sona ata. E pau lava le mea na ou iloa, na fasiotia o ia i na fetauaʻiga. E oo mai i aso nei, o loo tumau pea ona iai faalogona tigā iā te aʻu.”

E manino lava, e lavelave nei mataupu. O le iai o se malamalamaga i na mataupu, o le a aogā iā te oe e iloa ai le mea e manaʻomia ina ia taofia ai faiga sauā.

[Pusa/Ata i le itulau 4]

O AI TAGATA FAATUPU FAALAVELAVE?

Na faamatala e Mark Juergensmeyer, o se tagata suʻesuʻe, e faapea: “O faiga sauā, e lē seʻiloga e faatino e se tasi ia faiga faatupu faalavelave, ae e uiga atu foʻi i le mafaufau e tonu na sauāga. E tele ina faalagolago le faamatalaina o le upu ʻtagata faatupu faalavelave,’ i le auala e vaai ai le tagata lava ia i le tulaga o mea: pe afai e manatu se tagata e filemu le lalolagi, ona foliga mai lea o so o se faiga sauā lava, o faiga faatupu faalavelave ia. Ae pe afai e manatu o loo fetauaʻi le lalolagi, ona foliga mai lea e talafeagai so o se faiga sauā.”

O lea, pe a faaaogā le upu “tagata faatupu faalavelave,” e masani ona iai aafiaga faapolotiki. O le toʻatele o vaega e manatu iā i latou o tagata tau mo le saʻolotoga, ae e lē o ni tagata faatupu faalavelave. E tusa ai ma le faamatalaga a se tasi tusitala, o faiga faatupu faalavelave e aofia ai (1) faiga sauā agaʻi i tagata lautele ma le (2) faaaogāina o faiga sauā ina ia faamataʻu ai tagata. O lea la, o ē e maelega valea i le faaauiluma o faigātaua—e tusa po o se vaega o ni tagata fouvale, po o se pulega faalemalo—e masani ona latou faaaogāina metotia faatupu faalavelave.