Po o Avea Ou Laugutu ma “Ipu Tāua”?

● Na tusi le tupu o Solomona: “Ua iai auro, ua iai foʻi le tele o maa tāua; a o laugutu e iai le poto, o ipu tāua ia.” (Faataoto 20:15) Ua leva ona iloa le tāua tele o le auro, ma sa faapena foʻi le faatāuaina o maa tāua i aso o Solomona. Peitaʻi, e mafai ona sili atu le tāua o o tatou laugutu nai lo o na mea. E faapefea? E lē faapea ona e manaia i le vaai i le itu faaletino, ae ona o upu o loo tautala mai ai.

O laugutu e sili ona tāua e faaalia ai uiga mataalofa, agalelei, ma le alofa. O “laugutu e iai le poto,” e latou te tautatala i upu moni e uiga i le Atua e pei ona faamauina i le Tusi Paia. Ua faatumulia lenei tusi mai anamuā i le atamai ma upu moni e uiga i Lē na faia mea uma, atoa ai ma fautuaga sili ona lelei mo le olaga.—Ioane 17:17.

O le mea e faanoanoa ai, e toʻatele tagata ua faaaogā sesē o latou laugutu e faia ai tala sesē e uiga i le Atua. O se faataʻitaʻiga, ua tuuaʻia e nisi o Ia mo faiga lē tonu ma puapuaga i le lalolagi, lea e tele ina māfua mai i mea e faia e tagata. Ona o lenā tulaga, ua faapea mai ai le Faataoto 19:3: “Ua faaleagaina e nisi tagata i latou lava ona o a latou lava gaoioiga valea ma ua tuuaʻia ai le Alii.”—Today’s English Version.

Ua manatu māmā isi i le tāua o le faaaogāina o laugutu e ala i le faia o faamatalaga lē moni, tala tutui, ma tala taufaaleaga. I se gagana faafaatusa, ua faapea mai le Faataoto 26:23: “E pei o siliva o loo iila ai le taʻegaipu omea, e faapena laugutu ua alofa tele ae e leaga le loto.” E pei o le ʻsiliva iila’ o loo ufitia ai le taʻegaipu omea, e faapena foʻi “laugutu ua alofa tele,” lea e tautala ma le faamaoni ma i se auala alofa, a o le mea moni o loo ufitia se ʻloto e leaga.’—Faataoto 26:24-26.

O le mea moni, o na amioga leaga e lē mafai ona natia mai i le Atua. E silafia e ia lo tatou tagata moni! E tusa ai ma lenā tulaga na fetalai Iesu Keriso: “Ia faamamā muamua totonu o le ipu ma le tanoa, ona faatoʻā mafai lea ona faamamā ma tua.” (Mataio 23:26) Maʻeu le moni o na upu! E lē gata i lea, o le a iai se aafiaga i le auala e tatou te tautatala ai, pe a mamā o tatou loto, ma faatumulia i upu moni mai le Afioga a le Atua. O le ā le iʻuga? O le a avea o tatou laugutu ma “ipu tāua,” aemaise lava i le silafaga a le Atua.

[Ata i le itulau 20]

O laugutu o ē e atamamai “o ipu tāua ia”