Le Manatu o le Tusi Paia

O le ā le Sini o Mātua?

O LĒ fea o mea nei e te manaʻo e ola ai lau tama talavou?

A. O se tasi e tutusa lelei ma oe.

E. O se tagata e fouvale o loo taumafai malosi e faasagatau iā te oe.

I. O se tagata matua e maufaatuatuaina e faia filifiliga atamai.

O nisi mātua o ē e filifilia le I, e latou te amioaʻi e peiseaʻī e mananaʻo foʻi i le A. E faamalosia e nisi o mātua a latou fanau talavou ina ia ola e tusa ai ma a la tapulaa, e ala i le taʻu atu iā i latou o le ituaiga o galuega e ao ona latou filifilia. O le ā le iʻuga? O le taimi lava e maua ai e le fanau sina saʻolotoga, ona latou faia loa lea o le mea e ese mai i le manaʻo o le matua. I le isi itu, o le toʻatele o mātua e mananaʻo i le A, e masani lava ona selesele mai iʻuga o le manatu E.

Le Māfuaaga e lē Taulau ai le Pulepuletutū

E te manaʻo i lau tama talavou ina ia avea ma tagata maufaatuatuaina e faia ni filifiliga atamai. Ae e faapefea ona e ausia lenā sini? E pau le mea mautinoa: E lē lelei le pulepuletutū. Seʻi mātau māfuaaga nei e lua.

1. E lē faale-Tusi Paia le pulepuletutū. Na foafoaina e Ieova le Atua le tagata ma tuu i ai le saʻolotoga e filifili ai. Ua ia faatagaina tagata e filifili pe e ola i se olaga lelei pe e leaga. O se faaaʻoaʻoga, ina ua matuā ita leaga Kaino i lona uso o Apelu, sa fetalai atu Ieova iā te ia: “Pe afai e suia ou ala ma faia le mea lelei, po ou te lē taliaina ea oe? Ae afai e lē suia ou ala ma faia le mea lelei, o loo faatalitali mai le agasala i le faitotoʻa, e uaʻi atu foʻi lona manaʻo iā te oe; ae pe e te pule ea i ai?”—Kenese 4:7.

Ia mātau, ina ua avatu e Ieova le faatonuga manino iā Kaino, e na te leʻi faamalosia o ia ina ia usitaʻia. Sa tatau ona filifili Kaino ina ia pulea lona ita pe e leai. O le ā le lesona? Pe afai e leʻi pulepuletutū Ieova ma faamalosia ana foafoaga ina ia usitaʻi iā te ia, e lē tatau foʻi la ona e faia faapea i lau tama talavou. *

2. E masani ona leaga iʻuga o le pulepuletutū. Seʻi manatu i se tagata faatau oloa o loo taumafai e uunaʻia oe e faatau ana oloa. O le tele lava e taumafai ai o ia e uunaʻia oe e faatau ana oloa, o le maumauaʻi foʻi lenā o lou tetee atu. E tusa lava po o loo e manaʻomia ana oloa, ae atonu e te lē fiafia i ona uiga o loo faaali mai, ma o le a e alu ese ai loa.

E tai faapena le mea e tupu pe afai e te taumafai e faamalosia lau tama ina ia ola e tusa ma au tapulaa, o ou talitonuga, ma ou sini. Po o le a malie ea o ia e faia faapena? Ailoga! O le mea moni, o le auala o loo e talanoa atu ai e ono ese iʻuga e oo i ai, ma o le a amata ai ona lē fiafia lau tama talavou i au tapulaa. O le tulaga masani, o le pulepuletutū o mātua e iʻu ai i le fouvale o le fanau. O le ā la e mafai ona e faia?

Nai lo o le taumafai e pulepuletutū i le olaga o lau tama talavou, o le faailoa atu iā te ia o au tapulaa e pei ona e faia a o laʻitiiti o ia, e mafai ona fesoasoani iā te ia ina ia iloa ai le atamai o le faia o le mea saʻo. O se faaaʻoaʻoga, pe afai o oe o se Kerisiano, ia faailoa i lau tama, afai e ola e tusa ma taʻiala a le Atua, o le a matuā faamalieina o ia a o faagasolo lona olaga.—Isaia 48:17, 18.

Ia faataatia se faaaʻoaʻoga a o e faia faapea. Ia avea oe ma le ituaiga o tagata lea e te manaʻo e faaaʻoaʻo iai lau tama talavou. (1 Korinito 11:1) Ia faailoa manino atu tapulaa o loo e manaʻo e  ola ai. (Faataoto 4:11) Pe afai e alofa lau tama i le Atua ma ana taʻiala, o le a ia faia la ni filifiliga atamai e tusa lava pe e te lē o iai faatasi ma ia.—Salamo 119:97; Filipi 2:12.

Aʻoaʻo o Ia i ni Tomai Aogā

E pei ona taʻua i le itulau e 2 o lenei mekasini, atonu o le a vave ona oo mai le aso e matua aʻe ai lau tama ma “tuua ai . . .lona tamā ma lona tinā.” (Kenese 2:24) I le avea ma matua, e te manaʻo e faamautinoa ua iai i lau tama tomai e manaʻomia, ina ia taulau ai o ia pe a avea ma tagata matua tutoʻatasi. Ia mātau nisi o tomai e mafai ona e fesoasoani i lau tama e atiaʻe i le taimi lenei a o lua mafuta.

Tomai i le Faia o Feʻau. Pe e mafai e lau tama talavou ona saunia se meaʻai, fai le tagamea ma le auli, teu lona potu ma faavasega lelei mea, po o le tausia o le tulaga lelei o le taavale? O le atiina aʻe o na tomai o le a mafai ai e lou atalii po o lou afafine ona tausia se aiga i se aso o i luma. Ua faapea mai le aposetolo o Paulo: “Ua aʻoaʻoina aʻu, e tusa lava po o ā tulaga e oo iā te aʻu, ae ia lotomalie i mea ua ou maua.”—Filipi 4:11.

Tomai e Feagai ai ma Isi. (Iakopo 3:17) Pe e lelei le auala e feagai ai lau tama talavou ma isi? Pe e mafai ona ia faatoʻafilemu ni finauga i se auala agalelei ma filemu? Pe na e aʻoaʻoina o ia ina ia feagai ma isi tagata i se auala faaaloalo, ma foʻia se feeseeseaʻiga i se auala filemu? (Efeso 4:29, 31, 32) Ua faapea mai le Tusi Paia: “Ia āva i ituaiga uma o tagata.”—1 Peteru 2:17.

Faasoasoaina o Tupe. (Luka 14:28) Pe e mafai ona e fesoasoani i lau tama talavou e aʻoaʻoina se matātā, o le auala e faasoasoa ai tupe, ma ʻalofia le aitalafu? Pe na e toleniina o ia ina ia faaaogā ana tupe auā mea e manaʻomia, ae ʻalofia le faatau o mea e lē manaʻomia moni, ma ia lotomalie i mea ua maua? (Faataoto 22:7) Na tusi Paulo: “Afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie [ai].”—1 Timoteo 6:8.

O talavou e aʻoaʻoina ina ia ola e tusa ai ma tapulaa amiotonu ma ua iai ni tomai aogā, ua lava saunia i latou mo le olaga faatagatamatua. Ua ausia e o latou matua lo latou sini!—Faataoto 23:24.

[Faaopoopoga i lalo]

PO O E TAUMĀNATU EA I NISI TAIMI?

● Ona o oe o se matua, o le ā lou sini o loo iai?—Eperu 5:14.

● O ā tiute tauave o lau tama talavou pe a oo ina avea ma tagata matua? —Iosua 24:15.

[Ata i le itulau 22]

O lē fea o mea nei e te manaʻo e ola ai lau tama talavou?

O se tasi e tutusa lelei ma oe . . .

O se tagata e fouvale. . .

O se tagata matua e maufaatuatuaina