Tala a Mātua

O tausaga o le talavou e aumai ai ni luʻi fou i le toʻatele o mātua. E faapefea ona e fesoasoani i lau tamaitiiti ina ia taulau i lenei vala o le olaga—lea e oo ina lē mautonu ai o ia, e pei foʻi ona oo iā te oe? Seʻi mātau faamatalaga a nisi o mātua mai atunuu eseese.

SUIGA

“A o laʻitiiti o ia, sa talia e loʻu atalii aʻu fautuaga e aunoa ma lona fesiligia. Ae ina ua sefulu ma ona tupu ona tausaga, e foliga mai ua lē maufaatuatuaina e ia laʻu pule. Ua fesiligia e ia e lē gata i upu ou te fai atu ai, a o le pogai foʻi e fai atu ai.”—Falani, Kanata.

“E lē o toe talanoa mai laʻu tama tama e pei ona masani ai. E seʻiloga ou te fesili atu i ai po o le ā se mea o loo mafaufau i ai, nai lo o le faamatala mai e ia lava o ona manatu. E lē o toe faigofie ona tali mai i fesili e fai atu. E ui e tali mai, ae e umi se taimi o faatali.”—Falanisisi, Ausetalia.

“E tāua tele le onosaʻi. I nisi taimi, atonu tatou te faitio ai i a tatou fanau, ae o le vaifofō e sili ona lelei, o le faifailemū ma talatalanoa ma i latou!”—Felicia, Iunaite Setete.

FESOOTAʻIGA

“I nisi taimi e tetee mai ai laʻu tama teine talavou iā te aʻu, ma e manatu o ia o lea ou te saʻiliʻili masei iā te ia. E tatau ona ou faamanatu i ai ou te alofa iā te ia, ma o lea e ma te ʻau faatasi, ma ou te manaʻo e taulau o ia!”—Lisa, Iunaite Setete.

“A o lāiti laʻu fanau, sa faamatala mai o latou faalogona iā te aʻu. Sa faigofie ona faaali mai o latou lagona. Ae i le taimi lenei, ou te taumafai ia malamalama ma faailoa atu ou te faaaloalo i a i latou taʻitoʻatasi. Ua na o le pau lenā o le auala e mafai ona faamatala mai ai o latou faalogona iā te aʻu.”—Nan-hi, Korea.

“E lē lava le na ona faasā o talavou mai i le faia o nisi o mea. E tatau ona tatou fefulifulisaʻi ma talatalanoa ma i latou, ina ia pāʻia o latou loto. Ina ia maua se avanoa mo lenā mea, e manaʻomia ona nofosauni e faalogologo i mea e latou te fai mai ai, e tusa lava pe e aofia ai ma mea e tatou te lē o fia faalogo i ai.”—Talita, Pasili.

“Afai ou te manaʻo e faasaʻo laʻu tama teine, ou te taumafai e fai pe a na o i maʻua, ae e lē i luma o isi tagata.”—Edna, Nigeria.

“I nisi taimi, pe a ma talanoa ma laʻu tama tama, e tosina ese loʻu mafaufau ona o isi mea i le aiga, ma ou lē uaʻi atoatoa ai iā te ia. Ua ia iloa lenā mea, ma ou te manatu o se tasi lenā o māfuaaga e lē talanoa mai ai o ia iā te aʻu. E tatau ona ou taumafai e uaʻi totoʻa atu iā te ia a o ma talanoa, ina ia mafai ona faaali mai pea ona lagona.”—Miriama, Mekisikō.

TUTOʻATASI

“E masani ona ou lē fiafia e tuu atu i laʻu fanau talavou se saʻolotoga e tutoʻatasi ai, ma ua avea lea ma pogai o feteenaʻiga. E matou te talanoa i le mataupu. Ou te faamatala atu i ai le pogai ou te popole ai, pe a uma ona latou faamatala mai le māfuaaga e mananaʻo ai i se saʻolotoga. Sa mafai ona matou maua se autasi, ma maua se saʻolotoga e tusa ai ma tapulaa talafeagai na ou faataatitia.”—Edwin, Ghana.

“Sa manaʻo laʻu tama tama i se pasika. Sa ou matuā lē fiafia ma ou otegia ai o ia, ma faailoa atu i ai itu uma e lē talafeagai ai ona faatau se pasika, e aunoa ma le tuu i ai o se avanoa e faamatala mai ai ona lagona. O le mea lenā na matuā ita ai o ia ma finau mai e manaʻo lava i sana pasika! O lea na ou taumafai ai e suia se auala. Na ou faalaeiau loʻu atalii ina ia fesilisili i itu uma, e aofia ai mea e lamatia ai, le tupe faaalu, e manaʻomia ona faia sona laisene ma e tatau foʻi ona toe faafou. Na ou fai foʻi i ai e saʻili se fautuaga mai i Kerisiano taʻumatuaina i le faapotopotoga. Na ou iloa ai, nai lo o le faatigā, e sili atu ona faalaeiau laʻu tama e talanoa mai i mea e manaʻo i ai. O le auala lenā na mafai ai ona ou pāʻia lona loto.”—Hye-young, Korea.

“E ma te faataatitia tapulaa, ae e faasolosolo mālie ona tuu atu le saʻolotoga, pe a faaauau ona latou usiusitaʻi. O lo ma faanaunauga ia latou maua le saʻolotoga, ae e ma te lē taofia iʻuga e oo i ai pe afai e latou te lē usiusitaʻi.”—Dorothée, Falani.

“E ma te lē tuumāmāina a ma tapulaa. E ma te naunau e tuu atu le saʻolotoga pe afai e usitaʻi la ma fanau. O se faataʻitaʻiga, e i ai taimi ou te faatagaina ai i latou e tafafao umi. Ae e iai iʻuga pe afai e latou te lē foʻi mai i le taimi ua faatulagaina.”—Il-hyun, Korea.

“Pe afai e usiusitaʻi ma maufaatuatuaina se tagata faigaluega, o le faatuatuaina foʻi lenā o ia e lona pule. E faapena foʻi loʻu atalii, ua iloa e ia, o le maufaatuatuaina ma le usiusitaʻi i a ma tapulaa o le a ia maua ai le saʻolotoga. Ua iloa e loʻu atalii, e pei lava ona faasalaina se tagata faigaluega ona o le lē faataunuuina o ona tiute tauave, e faapena foʻi ona ia lē maua le saʻolotoga pe afai e lē lelei ona faatino ona tiute.”—Rimoni, Mekisikō.

 [Ata i le itulau 30]

“Ia aʻoaʻo le tama e tusa ma le ala saʻo; a oo ina toeaina lava e lē liliuese ai o ia.”—Faataoto 22:6

 [Ata i le itulau 31]

TALAAGA O LE AIGA

“O se Tiute Tauave Matagofie le Tausia aʻe o ni Fanau Talavou”

Iosefa: O laʻu fanau teine matutua e toʻalua o ni talavou, ma ou te iloa le tāua tele o le faalogo ma le amanaʻia o o la manatu. O le iloaina o oʻu lava vaivaiga ma le faaalia o le faaaloalo a o talanoa atu i laʻu fanau, e fesoasoani ai iā i matou e fefaaaliaʻi manatu. Ou te manatu foʻi o se tiute tauave matagofie le tausiaina o ni fanau talavou, ma ou te lotofaafetai mo le taʻitaʻiga ua matou maua mai i le Afioga a le Atua, le Tusi Paia.

Lisa: Ua ou mātauina, ina ua avea la ma tama teine matua ma talavou, sa manaʻo ou te faaaluina le tele o le taimi faatasi ma ia. Ou te manatua le tele o taimi ou te faalogologo atu ai, talanoa, ma faalaeiau o ia. Sa ma faamautinoa atu ma laʻu tane i la ma fanau, e mafai ona latou talanoa mai i so o mea ma o le a ma faaaloalogia o latou faalogona. Na ou taumafai e faatatau le fautuaga o loo i le Iakopo 1:19, lea e taʻua ai le “faalogologo lelei, . . . ae aua le vave ona tautala.”

Vitoria: O laʻu uō sili lava loʻu tinā. E leai se isi tagata na ou iloa e sili atu ona alofa ma agalelei e pei o ia, ma o ona uiga foʻi na e faaalia i isi. E “alofa faamaoni” o ia i so o se tasi ma e leai se tasi e faaluaina o ia.

Olivia: O loʻu tamā o sē e agalelei ma aaofoaʻi. E nofosauni o ia e fesoasoani i isi e tusa lava pe e lē o lava le faasoa a lo matou aiga. E iai taimi e maumauaʻi ai o ia, ae e na te iloa lelei foʻi le auala e matou te maua ai se taimi e fiafia ai. O ia o se faaaʻoaʻoga lelei mo se tamā, ma ou te lotofaafetai ua ou maua se tamā e pei o ia!

“E Leai se Taimi e Matou te lē Fiafia Ai!”

Sonny: Pe afai e iai se faafitauli o laʻu fanau teine, e matou te nonofo i lalo o se aiga ma talanoa ai. E faailoa atu o matou faalogona moni, ma e faavae a matou filifiliga i mataupu silisili o le Tusi Paia. E ma te taumafai ma Ynez e faamautinoa ua faauō la ma fanau i tagata lelei ma matutua faaleagaga. E avea a ma uō ma a la uō, e avea foʻi a la uō ma a ma uō.

Ynez: E faaauau ona matou mataalia, ma faifaimea faatasi o se aiga. I le avea ma Molimau a Ieova, e matou te pisi i le galuega talaʻi, faia o le suʻesuʻega faale-Tusi Paia a le tagata lava ia po o le aiga atoa, ma faia galuega tauofo e aofia ai fesoasoani mo mala faalenatura, ma le fausia o Maota mo Sauniga. E faatulaga foʻi se taimi mo faigāmālōlōga. E leai se taimi e matou te lē fiafia ai!

Kellsie: O loʻu tamā o se tagata e faalogologo lelei, ma e muamua lava ona talanoa mai i le aiga atoa a o leʻi faia sana faaiʻuga tāua. E avanoa loʻu tinā i so o se taimi ou te manaʻomia ai lana fesoasoani, pe e na o le talatalanoa foʻi.

Samantha: O le auala e tausia ai aʻu e loʻu tinā, ou te lagona ai lava o aʻu o se tagata e faapitoa, alofagia, ma e tāua, e tusa pe e na te lē o iloaina. E faalogo mai o ia ma e manatu mamafa mai foʻi. E leai se mea e sili iā te aʻu nai lo o la ma faauōga.

[Ata i le itulau 31]

O le ʻauaiga o Camera: Iosefa, Lisa, Vitoria, Olivia, ma Isapela

O le ʻauaiga o Zapata: Kellsie, Ynez, Sonny, ma Samantha

[Ata i le itulau 30]

E ono tuu atu e mātua sina saʻolotoga e tutoʻatasi ai, ae e latou te faataatitia foʻi tapulaa talafeagai