Talavou—Sauniuni ai e Avea ma Tagata Matua

SEʻI faapea ua e faimalaga mai i se motu vevela o le teropika agaʻi atu i se atunuu mālūlū i le Atika. O le taimi lava e te alu ese ai mai i le vaalele, o le a e iloa ai le matuā mālūlū o le tau. Pe e mafai ona e faamasani i ai? Ioe, ae e manaʻomia ona e faia ni nai fetuutuunaʻiga.

E tai faapena se tulaga e te ono fesagaʻia a o agaʻi ina avea lau tama ma talavou. I se taimi puupuu, e foliga mai ua suia le tulaga o le tau. O le tama lea na lē manaʻo e alu ese ma ou autafa ua fiafia nei e faatasi atu i ana uō. O le teine lea sa naunau e taʻu atu iā te oe mea sa tutupu i le aso, ua tau lē tali mai i au fesili.

Ua e fesili atu: “Na ā mai le aʻoga?”

E pau le tali na fai mai: “Manaia.”

E lē toe fai mai se isi tala.

Ua e toe fesili atu: “O le ā le mea o loo e mafaufau i ai?”

E pau le tali na fai mai: “Leai se mea.”

Ua atili ai ona lē tali mai.

O le ā le mea ua tupu? E leʻi leva talu ai nei, sa naunau lau tama e taʻu atu iā te oe e toetoe o mea uma, a o lea ua foliga mai e na te lē o toe taʻuina atu le tele o mea, ma o nisi taimi e na te faamatala i isi mea e na te lē o faamatalaina atu iā te oe. E te ono lagona, e pau le mea e te faia o le vaavaai atu lea i lau tama talavou o tuputupu aʻe, ae e lē mafai ona e fesoasoani iā te ia.

Pe e faigatā ona e māfana atu i lau fanau talavou? E leai. E mafai ona e māfana atu i lau fanau i taimi a o talavou. Muamua, e manaʻomia ona e malamalama i mea o loo tutupu a o faagasolo na taimi faigatā o le olaga.

Mai i le Tamaitiiti e Avea ma Tagata Matua

E manatu tagata suʻesuʻe, e oo ane i le lima tausaga o le tamaitiiti ua toetoe lava atoa lona faiʻai. Ua latou talitonu nei, pe a mavae lenā tausaga, e suia laʻitiiti le telē o le faiʻai ae e lē suia le auala e gaoioi ai. Pe a amata ona iai suiga i le tino, o le a suia homone o se talavou, ma e suia ai foʻi le auala e mafaufau ai o ia. O se faataʻitaʻiga, e tapulaa mea e iloa e se tamaitiiti laʻitiiti, ae e tele atu ma loloto mea e iloa e se talavou ua matua, ma e na te iloa māfuaaga o mea. (1 Korinito 13:11) E tuputupu aʻe o latou manatu ma e lē matamumuli e faailoa atu.

Na mātauina e Paolo mai i Italia lenei suiga i lona atalii talavou. Ua faapea mai o ia: “Ina ua ou vaai atu i loʻu atalii talavou, na ou mātauina ai le faatagatamatua o lona mafaufau ae e lē o toe mafaufau e pei o se tamaitiiti. E lē o iai ni suiga faaletino, ae na ou maofa i le auala na mafaufau ai o ia. E lē fefe o ia e faailoa mai ona manatu, ma e taumafai e faamaonia e saʻo!”

Po o e mātauina se tulaga faapena i lau tama talavou? Atonu sa faigofie ona ia faia au faatonuga a o laʻitiiti, ma e na te faia ona “ua e faatonuina atu e fai”. I le taimi la lenei ua avea o  ia ma talavou, e na te fia iloa māfuaaga e faia ai se mea, ma e na te ono fesiligia tapulaa o loo ola ai le aiga. O nisi o taimi e faailoa mai ai ona manatu, e foliga mai ai ua fouvale.

Ae aua neʻi e faia se faaiʻuga ma manatu o loo taumafai lau tama e faalēaogā au tapulaa. Atonu o loo taumafai o ia e avea au tapulaa o se mea e tāua iā te ia, ma o se vaega o lona olaga. O se faataʻitaʻiga, seʻi mafaufau o lea ua e siitia mai i le fale sa e nofo ai i se isi fale fou, ma o loo ave uma au meafale. Po o le a faigofie ona maua se avanoa e tuu ai meafale taʻitasi i totonu o le fale? Ailoga. Ae e pau le mea e mautinoa, o le a lē taitai ona e tiaʻiina ni mea e tāua.

O loo fesagaʻia e lau tama talavou se tulaga faapena, a o sauniuni mo le taimi e na te ʻtuua ai lona tamā ma lona tinā.’ (Kenese 2:24) E moni, atonu e leʻi taitai ona oo i le taimi e tupu ai lenā mea, auā e leʻi avea o ia ma tagata matua, ae e foliga mai o lea ua amata ona sauniuni. A o faagasolo ona tausaga talavou, o loo ia iloiloina tapulaa na tausia aʻe ai o ia, ma filifili po o fea tapulaa o le a ola ai pe a oo ina matua. *

E ono faapopoleina oe pe a faia e lau tama talavou ni filifiliga faapena. E te mautinoa, pe a avea lau tama ma tagata matua, o le a ia faaaogāina e na o tapulaa e manatu o ia e tāua. O lea la, e lelei ona e iloiloina i le taimi lenei a o lua faatasi ma lau tama, po o ā taʻiala o loo ola ai o ia.—Galuega 17:11.

O le mea moni, o le a aogā i lau tama lou faia faapea. Auā pe afai e na te talia au tapulaa e aunoa ma le malamalama pe aiseā, e ono faigofie foʻi la ona ia talia tapulaa a isi e aunoa ma le malamalama i ai. (Esoto 23:2) O loo faamatalaina i le Tusi Paia lenā ituaiga o talavou o sē e faigofie ona faasesēina ona “ua leai sona mafaufau,” e faaalia ai le leai o se faautauta. (Faataoto 7:7) O se talavou e lē mautonu i ona talitonuga, ua “felafoaʻiina e pei o peau, ma fetosoaʻiina i matagi o aʻoaʻoga eseese, e ala i togafiti a tagata.”—Efeso 4:14.

E faapefea ona e puipuia lau tama mai i le tupu ai o se mea faapena? Ia faamautinoa ua iā te ia mea tāua nei e tolu:

1 MAFAUFAU LELEI

Na tusi le aposetolo o Paulo e faapea o “tagata matutua . . . [e] faaaogā o latou mafaufau e iloa le mea saʻo ma le mea sesē ina ua aʻoaʻoina.” (Eperu 5:14) E te ono faapea mai: ʻUa leva ona ou aʻoaʻoina laʻu tama e iloa le mea saʻo ma le mea sesē.’ E mautinoa na aogā tele na toleniga i lau tama i lenā taimi, ma sauniunia ai o ia mo le isi laasaga o lona tuputupu aʻe. (2 Timoteo 3:14) Peitaʻi, na taʻua e Paulo e manaʻomia pea e tagata ona aʻoaʻoina o latou mafaufau. E ono manaʻomia e le fanau lāiti le poto e iloa ai le mea e saʻo ma le mea sesē, ae e manaʻomia e talavou ona avea ma ni ē e “faatagatamatua i le mafaufau.” (1 Korinito 14:20; Faataoto 1:4; 2:11) E te manaʻo e faaaogā e lau  tama talavou lona mafaufau lelei e fetuutuunaʻi ai, ae aua le usitaʻi e aunoa ma le malamalama i le mea ua faatonuina o ia e fai. (Roma 12:1, 2) E faapefea ona e fesoasoani iā te ia e faia faapea?

O se tasi o auala, o le faailoa mai lea o ona manatu. Aua e te faasalavei, ma taumafai malosi e aua le soona mateletele, e tusa lava pe afai o loo ia faia mai se tala e te lē o fia faalogo i ai. Ua faapea mai le Tusi Paia: “Ia faalogologo lelei . . . . ae aua le vave ona tautala, ma aua foʻi le vave ona ita.” (Iakopo 1:19; Faataoto 18:13) E lē gata i lea, ua faapea mai Iesu: “O le tele o mea i le loto e tautala mai ai le gutu.” (Mataio 12:34) Pe afai e te faalogologo lelei, o le a mafai la ona e iloa le mea moni o loo i le mafaufau o lau tama talavou.

Pe afai e te talanoa atu, taumafai e faaaogā fesili nai lo o le fai atu o upu faatigā. Na iai taimi na fesili atu ai Iesu, “O le ā so outou manatu?” ina ia faailoa mai ai manatu o ona soo faapea ma ē e lotomaaa. (Mataio 21:23, 28) E mafai foʻi ona e faia se mea faapena i lau tama talavou, e tusa lava pe e feteenaʻi ona manatu faaalia ma ou manatu. O se faaaʻoaʻoga:

Pe a fai atu lau tama: “Ou te lē o mautinoa po ou te talitonu i le Atua.”

Nai lo o lou faapea atu: “E lē o le mea lenā na ma aʻoaʻoina ai oe, e tatau ona e talitonu i le Atua!”

E te ono faapea atu: “Aiseā ua e manatu ai faapena?”

Aiseā e te taumafai ai e utufia mai manatu o lau tama? E ui o lea ua e faalogo i lana tala na fai mai, ae e manaʻomia ona e iloa mea o loo mafaufau i ai. (Faataoto 20:5) O lenei mataupu e fitoitonu i tapulaa a le Atua, nai lo o le tau ina mafaufau o loo soifua o ia.

O se faaaʻoaʻoga, pe a faigatā i se talavou ona usiusitaʻi i tapulaa tau amio a le Atua, e ono taumafai la e taʻutonuina lana mea ua fai i lona talitonu e leai se Atua. (Salamo 14:1) E ono faapea mai o ia, ʻafai e leai se Atua, e lē tatau la ona ou ola e tusa ma tapulaa o le Tusi Paia.’

Pe afai o le auala lenā e mafaufau ai lau tama talavou, e tatau la ona fesili ifo o ia: Po ou te talitonu moni lava o tapulaa a le Atua e mo loʻu lelei? (Isaia 48:17, 18) Pe afai e talitonu o ia e mo lona lelei, ia faalaeiau la o ia e tatau ona tumau ai.—Kalatia 5:1.

Pe a fai atu lau tama: “O lou lava lenā talitonuga, ae e lē o loʻu talitonuga lenā.”

Nai lo o lou faapea atu: “O lo ma talitonuga lenā, ma ona o oe o la ma tama, e tatau la ona e talitonu i le mea lea e ma te fai atu ai.”

E te ono faapea atu: “E malosi tele lenā faamatalaga. Pe afai e te teena o ma talitonuga, o ā la talitonuga o le a e taliaina? O ā mea e te talitonu i ai? O ā ituaiga o tapulaa tau amio e te manatu e ao ona e ola ai?”

Aiseā e te taumafai ai e utufia mai manatu o lau tama? Auā o le fetufaaʻi, o le auala lenei e te fesoasoani ai i lau tama e toe iloilo ona talitonuga. E ono faateʻia o ia i le iloa ane e taitutusa o oulua talitonuga, ae e ese mea o loo ia faatāuaina.

O se faaaʻoaʻoga, atonu e lē iloa e lau tama talavou ona faamatala ona talitonuga i isi. (Kolose 4:6; 1 Peteru 3:15) Pe atonu foʻi ua tosina  atu o ia i se tasi o le isi itupā e lē tutusa o la talitonuga. Ia iloa le aa o le faafitauli ma ia fesoasoani i lau tama e faia foʻi faapea. O le tele lava e na te faaaogā lelei ai lona mafaufau, o le lava saunia foʻi lenā o ia a o faasolo ina matua.

2 TAʻITAʻIGA A TAGATA MATUTUA

I nisi o aganuu i aso nei, e itiiti lava pe e leai foʻi ni faamaoniga o ni “faafitauli ma faigatā,” lea na taʻua e nisi o fomaʻi o le mafaufau e faatalitalia le oo mai i taimi o le talavou. Ua iloa e tagata suʻesuʻe, o talavou e ola aʻe i na siʻomaga e vave ona amio faatagatamatua a o lāiti lava o latou tausaga. E latou te galulue ma tagata matutua, faifaimea faatasi, ma e tuuina atu i ai tiute tauave faatagatamatua. E lē maua i nei nofoaga faaupuga e pei o “talavou,” o “aga faatalavou,” ma “amioga lē taupulea a talavou.”

E ese mai i lenā, seʻi mātau le mea o loo tupu i talavou i le tele o atunuu lea e ō i aʻoga ua matuā faatumulia, ma e na o talavou lava e mafai ona auaufaatasi i ai. Pe a tuua le aʻoga, e leai se tasi i le fale auā o loo faigaluega uma le tamā ma le tinā, ma e mamao ese mea o loo nonofo ai o latou tauaiga. E pau le vaega o tagata e faigofie ona latou faifaimea faatasi o a latou uō. * Po o e iloa le lamatiaga? E lē na o se mataupu e faatatau i le sesē o tagata e faauō i ai. Ua iloa e le ʻausuʻesuʻe, e oo lava i talavou lelei e latou te lolo atu lava i le faia o amioga lē lelei, pe afai e faaesea i latou mai i tagata matutua.

O se tasi o nuu na lē faaesea o latou talavou mai i tagata matutua, o le nuu o Isaraelu anamua. O se faaaʻoaʻoga, o loo taʻua Usia i le Tusi Paia, o lē na avea ma tupu a o talavou lava. O le ā sa fesoasoani iā Usia e faia ai lenei tiute tauave faigatā? O le mea moni, sa ia maua ni aafiaga lelei mai i se tagata matua e igoa iā Sakaria, o lē o loo faamatalaina i le Tusi Paia o sē na “aʻoaʻoina o ia e mataʻu i le Atua moni.”—2 Nofoaiga a Tupu 26:5.

Po o iai ni tagata matutua e tutusa a outou tapulaa, o loo fesoasoani i lau tama talavou? Aua e te fuā i le fesoasoani o loo avatu e lenā tagata, auā o loo fesoasoani o ia i lau tama ina ia faia le mea saʻo. Ua faapea mai se faataoto o le Tusi Paia: “O lē e savali ma tagata atamamai, e atamai ai o ia.”—Faataoto 13:20.

3 IA ILOA ONA TIUTE TAUAVE

I nisi atunuu, e iai galuega patino e faasā ona faia e tamaiti ma e lē tatau ona galulue e silia atu ma le taimi ua faatapulaaina. O nei faasāsāga ua puipuia ai tamaiti mai i le faia o galuega e lamatia ai, ma o le iʻuga lenā o le suiga i le tulaga tau tamaoaiga i senituri e 18 ma le 19.

O le mea moni, o na tulafono ua puipuia ai talavou mai i lamatiaga ma le faileagaina, ae ua faapea mai nisi o tagata atamamai, o nei faasāsāga ua ʻalo ai talavou mai i le faia o o latou tiute tauave. O le iʻuga, ua taʻua i le tusi Escaping the Endless Adolescence, e toʻatele talavou ua iai “le manatu, e tatau ona latou maua so o se mea e mananaʻo i ai, ae e aunoa ma le  galulue ina ia maua na mea.” Ua taʻua e tusitala, o lenei amioga “o se mea ua masani ai talavou o ē ua ola i se olaga e na o le faamalieina o i latou lava, e aunoa ma le faatalitalia o se mea mai iā i latou.”

E ese mai i lenā tulaga, o loo taʻua i le Tusi Paia nisi o talavou na faataunuuina ni tiute tauave faatagatamatua a o lāiti lava. Seʻi manatu iā Timoteo, o lē atonu o le taimi o lona talavou na feiloaʻi ai ma Paulo—o le tagata na tele ina taaʻina ai lona olaga. I se tasi o taimi, na faapea atu Paulo iā Timoteo: “Ia e faamumū e pei o se afi le meaalofa a le Atua ua iā te oe.” (2 Timoteo 1:6) Atonu o le lata i le 20 o tausaga o Timoteo po o le sili atu foʻi, na ia tuua ai lona aiga ae malaga faatasi ma le aposetolo o Paulo, e fesoasoani i le faatūina o faapotopotoga ma faalaeiauina le ʻauuso. Ina ua mavae le pe ā ma le sefulu tausaga o galulue ma Timoteo, na tusi ai loa Paulo i Kerisiano i Filipi e faapea: “E lē o iā te aʻu se tasi e mafaufau lelei e pei o ia o lē e manatu mamafa iā te outou.”—Filipi 2:20.

E masani lava ona naunau talavou e faia o latou tiute tauave, aemaise lava pe afai e latou te lagona o galuega o loo latou faia e aogā ma tāua. E lē gata e mafai e lenā mea ona toleniina i latou ina ia avea ma fanau maufaatuatuaina i le lumanaʻi, ae o le a iloa ai foʻi o latou uiga lelei o loo iai.

Faamasani i se “Tau” Fou

E pei ona taʻua i le amataga o lenei mataupu, pe afai o oe o se matua o se talavou, atonu e te lagonaina ai e peiseaʻī o loo e iai i se isi “tau” e ese mai i le tau o le atunuu lea e leʻi leva ona e iai, i ni nai tausaga ua mavae. Ia faamautinoa ua e masani i ai, e pei lava ona sa e faia i isi laasaga o le tuputupu aʻe o lau tama.

Ia manatu i tausaga talavou o lau tama o se avanoa mo oe e (1) fesoasoani iā te ia ina ia atiaʻe se mafaufau lelei, (2) ia iai ni taʻitaʻiga a tagata matutua, ma (3) ia faamautū iā te ia le lagona e iloa ona tiute tauave. O le faia faapea, ua e sauniunia ai lau tama talavou ina ia avea ma tagata matua.

[Faaopoopoga i lalos]

[Pusa/Ata i le itulau 20]

“OU TE FAAFETAI ONA UA OU MAUA NI MĀTUA LELEI”

E aʻoaʻo e mātua Molimau a Ieova a latou fanau ina ia ola e ōgatusa ma taʻiala a le Tusi Paia, e ala i upu ma faaaʻoaʻoga. (Efeso 6:4) Ae peitaʻi, e latou te lē faamalosia a latou fanau ia faia faapea. Ua iloa e mātua Molimau, a o faagasolo taimi, e tatau ona filifili se tama po o se teine po o ā tapulaa tau amio e ola ai.

O Aislyn e 18 tausaga, na ola e tusa ai ma tapulaa tau amio na tausia aʻe ai o ia. Ua faapea mai o ia: “E lē na o le tasi se aso o le vaiaso e fai ai laʻu lotu. O loʻu olaga atoa lea. E aafia ai mea uma ma filifiliga ou te faia—e mai lava i aʻu uō i vasega ou te i ai, e oo lava i tusi ou te faitau ai.”

E matuā talisapaia e Aislyn le auala na tausia aʻe ai o ia e ona mātua Kerisiano. Ua faapea mai o ia “Ou te faafetai ona ua ou maua ni mātua lelei, ma amuia aʻu ona na la totō i loʻu loto le faanaunauga e avea ma se tasi o Molimau a Ieova, ma tumau ai pea. O le a faaauau pea ona avea oʻu mātua o se taʻitaʻiga po o se taʻiala i loʻu olaga, po o le ā lava le umi ou te ola ai.”

[Ata i le itulau 17]

Tuu le avanoa i lau tama e faailoa mai ona manatu

[Ata i le itulau 18]

E iai ni aafiaga lelei o se tagata faufautua matua, i lau tama

[Ata i le itulau 19]

O galuega aogā e fesoasoani ai i lau tama talavou ina ia avea ma tagata maufaatuatuaina