Aiseā na Ou Faia ai Lenā Tala?
Ua Fesili Mai Talavou
Aiseā na Ou Faia ai Lenā Tala?
O le a fesoasoani lenei mataupu iā te oe e iloa ai pe
AISEĀ e masani ai ona e faia se tala sesē
O LE Ā e fai pe a mao sau tala
E FAAPEFEA ona pulea lou laulaufaiva
“E masani lava ou te lelei tele i le puleaina o loʻu laulaufaiva, ae o nisi taimi e mao ai saʻu tala ma mulimuli ane, e pau le mea ou te manaʻo i ai ia ou mou ese atu!”—Iose
“O nisi taimi ou te faia ai ni tala atonu o loo mafaufau i ai tagata uma, peitaʻi sa lē tatau ona ou leotele ma fai atu lenā tala!”—Elisa
AISEĀ UA TUPU AI
Mau autū: “Afai e lē sesē se tasi i lana tautala, o le tagata lea ua lelei atoatoa.” (Iakopo 3:2) O le ā le uiga o le mau? E leai se tasi e mafai ona ia pulea atoatoa lona laulaufaiva. E toʻatele e ioe iā Aneta * o lē na faapea mai: “O loʻu laulaufaiva e masani lava ona oo mai ai faafitauli iā te aʻu.”
O se tala moni: “Na manaʻo saʻu uō i ni oʻu lavalava tuai na tuu e tiaʻi. E aunoa ma loʻu mafaufauina, na ou faapea atu, ʻAiloga e ofi iā te oe.’ Na ia tali mai, ʻE ā? E te manatu ou te lapoʻa?’”—Corrine.
Ina ia e malamalama pe aiseā atonu e masani ai ona lē pulea lau tautala, ia taumafai e fai mea nei.
● Ia iloa ou vaivaiga.
․․․․․ E masani ona ou tautala a o oʻu ita
․․․․․ E masani ona ou tautala e aunoa ma le mafaufau
․․․․․ E masani ona ou tautala e aunoa ma le faalogo
․․․․․ Ma isi ․․․․․
Faaaʻoaʻoga: “O loʻu faafitauli o le tausua naʻuā, ma o nisi taimi e faauiga sesē ai e tagata aʻu tala e fai.”—Alexis.
● Ia iloa i latou e masani ona sesē i ai au faamatalaga.
․․․․․ O se matua
․․․․․ O sou tei laʻitiiti
․․․․․ O se uō
․․․․․ O isi ․․․․․
Faaaʻoaʻoga: Na faapea mai Christine e 20 ona tausaga: “Ou te faanoanoa talu ai o tagata e pito sili ona ou alofa i ai, e vave ona tigā i aʻu faamatalaga. Masalo ona ua ou masani tele iā i latou ma ua ou lē magafagafa ai i aʻu tala e fai.”
O LE Ā E FAI PE A MAO SAU TALA
Mau autū: “Tausisi i mea e faatupu ai le filemu.” (Roma 14:19) O se tasi o auala e mulimuli ai i lenā fautuaga o le faatoese atu.
O se tala moni: “Na maliu loʻu tinā faatoʻā sefulu oʻu masina ae sa leai se mafutaga ma loʻu tamā, o lea na tausia aʻe ai aʻu e le uso o loʻu tinā ma lona toʻalua. I se tasi o aso ina ua tusa ma le 10 po o le 11 oʻu tausaga, na ou lagona ai le tuua toʻatasi ma na ou ita ai i le maliu o loʻu tinā, e pei ua ou manaʻo e tuuaʻia se tasi ona o lenā mea. O lea ina ua manaʻo le uso o loʻu tinā iā te aʻu ou te faia se feʻau, na amata ona ou leoleoā ma na iʻu ina ou faapea atu, ʻOu te ʻinoʻino iā teʻoe’ ma ʻE lē o oe o soʻu tinā moni.’ Na ou vaaia foliga faanoanoa tele o le uso o si oʻu tinā. Na alu atu o ia i lona potu moe ma tapuni mai le faitotoʻa, ma na ou lagona atu lona tagi masūsū. Na matuā leaga oʻu faalogona. Sa ia tausia faapelepele aʻu ma faia mea uma ou te manaʻo i ai, a o lea ua ou lē faaaloalo atu iā te ia. Na talanoa mai le toʻalua o le uso o loʻu tinā e uiga i le mea na tupu, ma na ia faaali mai iā te aʻu mau e faatatau i le pulea o le laulaufaiva. Na mulimuli ane oʻu matuā faatoese i le uso o loʻu tinā. Ua ou iloa ai o aʻu e sesē.”—Karen.
I lalo, tusi se māfuaaga se tasi atonu e faigatā ai ona e faatoese atu.
․․․․․
Aiseā atonu e lelei ai ou faalogona pe a uma ona faatoese atu?
․․․․․
Fesoasoani: Manatunatu i mataupu silisili o loo i le Faataoto 11:2 ma le Mataio 5:23, 24.
E moni, e sili ona lelei le ʻalofia o le tupu o se mea i le amataga, ona lē tau manaʻomia ai lea ona faatoese atu. E faapefea ona e faia lenā mea?
E FAAPEFEA ONA PULEA LOU LAULAUFAIVA
Mau autū: “Ia faalogologo lelei tagata uma, ae aua le vave ona tautala, ma aua foʻi le vave ona ita.” (Iakopo 1:19) O ni manatu nei e fesoasoani iā te oe i le faatatauina o na fautuaga.
Faitau mau o loo mulimuli mai, ma faafetaui i faamatalaga taʻitasi.
1 “Taumafai e aua e te soona faamamafa se faamatalaga; o le faia faapena, e lē vave ai ona e tetee atu i se faamatalaga.”—Danette.
2 “Ou te alu e savalivali. O le avanoa lea ou te nofonofo ai na o aʻu mo sina taimi, ma ou maua ai le taimi ou te tau toʻafilemu ai.”—Brielle.
3 “A o oʻu laʻitiiti, e masani ona ou mafaufau o so o se mea lava ou te lē fiafia i ai e tatau ona ou faaali atu. Ae ua ou iloa, e lē o mea lāiti uma e tatau ona ou amanaʻia.”—Celia.
4 “Pe a ee mai se tasi iā te oe ae e te lē toe tali atu i ai i se tala, o le a vave ona fiu le tagata ona e te lē o tali atu. Ia onosaʻi. Aua e te tali atu e atili ai ona faateteleina le faafitauli.”—Kerrin.
5 “E iai taimi ou te lē fiafia ai i se tasi. E pau lava le mea ou te mafaufau i ai, o le fai atu uma i ai o tala o loo oʻu manaʻo e fai atu i lenā tagata. Ae o le faatalitali, ua ou iloa ai e leai ma se aogā o aʻu faamatalaga. O le mea ua ou aʻoaʻoina, ia aua neʻi vave tali atu.”—Charles.
[Faaopoopoga i lalo]
^ pala. 10 Ua suia nisi o igoa.
[Pusa/Ata i le itulau 22]
Elisa—A o leʻi fai atu saʻu tala, ou te fesili ifo iā te aʻu i fesili e pei o nei: ʻPo o le a faaleleia ai le tulaga o loo tupu? E faapefea i laʻu tala o le a fai atu ona aafia ai le tagata o loo oʻu talanoa atu i ai?’ Afai e te lē o mautinoa i lau tala o le a fai atu, atonu la e lē tatau ona e faia lenā tala.
Iose—Pe a ou manaʻo e fai atu se tala, ou te taumafai e mafaufau i āuga e oo i tagata o loo iai i lenā taimi. Ou te manatu a o faasolo ina ou matua, o le a ou iloa lelei pulea loʻu laulaufaiva. E mautinoa e aʻoaʻoina oe mai i mea e tutupu.
[Pusa/Ata i le itulau 29]
AISEĀ E LĒ FESILI ATU AI I OU MĀTUA?
Talu ai e leai se isi e lelei atoatoa—e pei ona tusi Iakopo “e sesē i tatou uma i mea e tele”—talanoa atu i ou mātua po o ā tauiviga na feagai ma i laʻua ina ia pulea ai le laulaufaiva.—Iakopo 3:2.
[Ata i le itulau 28]
“O le taimi lava e faapasī ai i fafo le kulimi fufulu nifo, e lē mafai ona e toe tuuina i totonu. E faapena a tatou upu. O le taimi lava e te faia ai se faamatalaga e faatigā ai i se tasi, e lē mafai ona tatou toe faafoʻi mai.”—James.
