E Tāua le Faamaoni

“E manaia i le tagata le tofo o le meaʻai e maua i se ala pepelo, ae e mulimuli ane o le a tumu lona gutu i ʻiliʻili.”—Faataoto 20:17.

PO O se mea talafeagai le lolo atu i faiga lē faamaoni ina ia taulau manuia ai i faiga faapisinisi? O le tali e leai. O le mea moni, o le lē faamaoni e masani lava ona afāina ma leaga ai. Aiseā? Talu ai ona o le faamaoni e maufaatuatuaina ai se tasi ma taulau manuia ai mo se taimi umi.

O le Aogā o le Faamaoni

O lou talaaga faamaoni e aafia ai lou taulau manuia—e tusa lava pe e te iloa pe leai. E faamaonia le mea lenā i le tala i le mea na tupu iā Franz lea na taʻua i le mataupu ua mavae. Na ia faapea mai: “Ina ua faatoʻā amata ona ou faigaluega, na tofotofoina ai e ē na pulea le kamupani loʻu faamaoni i le tele o taimi, e aunoa ma loʻu iloaina. Ma ina ua ou iloa mulimuli ane, ua ou pasi. O le iʻuga, ua tuu mai iā te aʻu le tele o matafaioi ma le saʻolotoga, ma ua tauia aʻu e i latou e pule ona o loʻu faamaoni. Ua ou iloaina e iai isi tagata e sili atu ona lelei e faia aʻu galuega ma sili atu lo latou atamamai nai lo o aʻu. Peitaʻi, ou te manatu ua ou tumau i le galuega ona o le faatuatuaina o aʻu e i latou e pule.”

ʻAlofia Lamatiaga e lē Atamai

Na mātauina e Tavita, le tamāloa fai pisinisi na taʻua i le mataupu talu ai nei e faapea: “A o oʻu mātauina tagata taʻitoʻatasi o loo latou solia tulafono ina ia maua ai aogā mo sina taimi puupuu, na ou manatu ai, ʻE ui lava ina tuai, ae e maua lava i se taimi.’ I se isi faaupuga, o gaoioiga lē faamaoni o le a aumaia ai le tele o faafitauli. E matou te leʻi taliaina avanoa faapisinisi e lē mautū o latou tulaga. Na tapunia mulimuli ane le tele o kamupani sa aafia i nei faiga, ae o nisi tagata na faasalaina. E leʻi aafia la matou kamupani i na faafitauli.”

A o tau amata se lafupovi a Ken i saute i sasaʻe o Aferika, na ono mafai ona tofotofoina o ia e totogi faananā tagata ofisa ina ia faavavevave ai ona taunuu mai a latou oloa, ma ʻalofia ai le totogiina o lafoga. Na ia taʻua: “E toʻatele nisi fai lafumanu na aafia i lenei faiga masani. Ae ona o le faamaoni, na matou faatalitali ai mo le sefulu tausaga mo a matou oloa mo le lafumanu. Pe na tauia? Ioe! O i latou na faatogafalea ona totogi mea, na faaauau ona lutia i le totogiina o tupe faasili i tagata ofisa faimea piʻopiʻo.”

Feagai ma Luʻi Tau Tamaoaiga

Pe a lē taulau se pisinisi tauatiaʻe, e manatu i le lē faamaoni o le avanoa sili lea. Peitaʻi, o lenā tulaga e mafai foʻi ona iloa ai le tāua o le iai o se talaaga faamaoni.

Manatu i le faaaʻoaʻoga a Pili, o sē na lē taulau lana pisinisi faufale ina ua paʻū le tulaga tau tamaoaiga i kamupani faufale i le Iunaite Setete. Na ia taʻua: “O le toʻatele o a matou tagata faatau ua gau a latou pisinisi, e faitau selau afe tālā na nonofo aitalafu ai i la matou kamupani. Ina ua foliga mai ua leai se faamoemoe, na ou faafesootaʻia ai se isi tagata faipisinisi pe faamata e latou te mananaʻo e faafaigaluega nisi o i matou. E leʻi atoa se 48 itula, ae latou faafaigaluegaina loa aʻu ma le toʻatele o laʻu ʻaufaigaluega. Na faailoa mai iā te aʻu sa mātauina e isi loʻu talaaga o le galue malosi ma le faamaoni.”

 O tagata uma o loo taʻua talaaga i le pito i luga, o Molimau a Ieova. O tapulaa uma i a latou pisinisi e faavae mai i le Tusi Paia, e pei lava foʻi o isi vala uma o o latou olaga. E pei ona e iloaina, nai lo o le faia o mea e lē taulau manuia ai a latou pisinisi, na latou maua aogā ona o le faamaoni.

E ui i lea, e iai lava tulaga e ono foliga mai e maua ai aogā ona o le lē faamaoni. Po o le mauaina o tupe ua na o le pau lea o le auala e taulau manuia ai?

[Faamatalaga faaopoopo i le itulau 6]

O lou talaaga faamaoni e aafia ai lou taulau manuia—e tusa lava pe e te iloa pe leai

[Ata i le itulau 7]

“Na faailoa mai iā te aʻu sa mātauina e isi loʻu talaaga o le galue malosi ma le faamaoni.”—Pili, Iunaite Setete