O le Faamaoni e Taulau Moni Ai

“E lē ola se tasi i le tele o ana mea ua iā te ia.”—Luka 12:15.

O LE mauaina o le tupe o se vaega tāua o le olaga. Ua iā i tatou se tiute tauave i luma o le Atua, o le tausia lea o i tatou lava ma o tatou aiga.—1 Timoteo 5:8.

Ae faapefea pe afai e avea le mauaina o tupe ma mea e mafai ona faatau mai i tupe, ma mea e sili atu nai lo o le faatumauina o le ola? Ae faapefea pe afai o le a avea ma ou sini autū o le olaga? O i latou e muamua ona mafaufau ia maua le tamaoaiga, e faigofie ona lolo atu i faiga lē faamaoni ina ia maua mai ai. Atonu faatoʻā latou iloa o le lē faamaoni na taofia ai i latou mai le taulau manuia moni, ae ua tuai. E lē gata i lea, e pei ona taʻua i le Tusi Paia, o le manaʻo tele i tupe o le pogai lea o le tele o tigā.—1 Timoteo 6:9, 10.

Ia iloilo faaaʻoaʻoga e fā o loo mulimuli mai, e faatatau i tagata taʻitoʻatasi o ē e manatu e iai isi mea e sili atu nai lo o le faateleina o le tamaoaiga, ina ia taulau manuia ai.

Faaaloalogia

“I ni tausaga ua mavae, na ou faatalanoaina ai se tagata na fuafua e faatau se inisiua o lona ola mo le miliona tālā. O laʻu tupe e maua mai i le faatauina o lenei inisiua e faitau afe tālā. Na faapea mai iā te aʻu ina ia oʻu mauaina lana pisinisi, e tatau ona ou avatu iā te ia le ʻafa o lenā tupe. Na ou taʻu saʻo i ai, o le mea na ia manaʻo i ai e lē gata o se gaoioiga lē faamaoni ae o se solitulafono foʻi.

“Na ou taumafai e fefulisaʻi ma ia e ala i le fesili atu pe e manaʻo moni lava e faailoa atu ana mataupu totino faalilolilo, ma faamatalaga tautupe i se tasi e lē faamaoni. Na ou toe taʻua loʻu tulaga, ma faailoa atu e faafesootaʻi mai aʻu pe afai e manaʻo pea ou te sainia lana inisiua. E leʻi toe maua lava se ma fesootaʻiga.

“Pe ana faapea ou te taliaina lana ofo, semanū e faaleagaina ai loʻu tulaga faamaoni ma faaaloalogia o se Kerisiano. Na semanū foʻi e avea aʻu o se pologa a lenā tamāloa na taumafai e faasesēina aʻu i se faiga lē faamaoni.”—Don, Amerika.

Filemu o le Mafaufau

E pei ona taʻua i le amataga o lenei mataupu, na ofo atu iā Danny se tupe telē i se auala faatogafalea pe afai e na te faia ni faamatalaga pepelo, e mafai ona latou sapalaia se ota telē o oloa. Na faapefea ona ia tali atu?

“Na ou faafetai atu i le pule i lona agaga  talimālō i le saunia o le taumafataga, ma toe faafoʻi atu iā te ia le teutusi o loo iai le tupe. Na ia toe tauanau atili ma faapea mai pe afai e pāsia e lana falegaosimea fuafuaga o oloa e manaʻomia, o le a ia toe faaopoopo le tupe mo aʻu. Ae na ou teena.

“Pe ana ou taliaina le tupe, semanū e faaauau ona ou popole ina neʻi maua aʻu. Mulimuli ane, na iloa e loʻu pule le mea na tupu. Sa ou fiafia tele ma filemu loʻu mafaufau ona o loʻu lē faia o se mea e lē faamaoni ai. Na oso mai i loʻu mafaufau le Faataoto 15:27: ʻO le tagata e maua polofiti i faiga lē saʻo, ua ia aumaia mala i lona lava aiga, a o lē e ʻinoʻino i meaalofa [po o faiga faatogafalea] e ola pea o ia.’”—Danny, Hong Kong.

Fiafia ai le Aiga

“E fai laʻu lava pisinisi faufale. E telē le avanoa e ʻolegia ai tagata faatau pe ʻalofia ai le totogiina o lafoga. Peitaʻi, ua ou maua faatasi ma loʻu aiga aogā ona o loʻu maumauaʻi e faamaoni.

“O le faaalia o le faamaoni e aofia ai le olaga atoa o se tagata, ae lē na o taimi i galuega po o le pisinisi. O le iloaina e lē mafai e lau tane po o le avā ona faagutugutulua i tapulaa a le Atua e uiga i le faamaoni, e atili ai ona iai le fefaatuatuaaʻi i le aiga. E lagona e lau paaga le saogalemu i le iloaina e tumau lou faamaoni.

“E mafai ona e pule i se kamupani telē i le lalolagi, ae e lē mafai ona e ʻalofia faafitauli mai i le aiga. I le avea ai o se Molimau a Ieova, na ou iloa ai o le mulimuli i mataupu silisili o le Tusi Paia e mafai ona faapaleni ai le olaga. Ua ou maua le taimi e olioli faatasi ai ma loʻu aiga, e aunoa ma le omia i le agaga o lenei lalolagi o loo pulea e tupe ma le matapeʻapeʻa.”—Durwin, Amerika.

Se Faiā Lelei ma le Atua

“O laʻu galuega e aofia ai le faatauina mai o sapalai mo laʻu kamupani. O nisi taimi e manatu ai paaga faatau e faapea, nai lo o le tuu atoa atu i le kamupani o le tupe maua i le paʻū o oloa, e latou te tuuina mai iā te aʻu le pasene o lenā tupe maua. Ae o lenei mea o se faiga faagaoi mai i laʻu kamupani.

“E lē telē soʻu totogi, ma sa ono mafai ona ou taliaina le tupe na ofo mai. Peitaʻi, e leai se mea e faatusatusa atu i le mauaina o se lotofuatiaifo mamā, ma le iai o se tulaga ua faamaonia i luma o Ieova le Atua. Mai i nei mea uma na tutupu, na ou mulimuli i le mataupu silisili a le Tusi Paia i le Eperu 13:18: ʻMatou te mananaʻo ina ia faia mea uma ma le faamaoni.’”—Raquel, Filipaina.

 [Pusa/Ata i le itulau 9]

Mataupu Silisili e Uiga i le Faamaoni i Faiga Faapisinisi

E lē tutusa manatu o tagata i le auala e usitaʻia ai mataupu silisili e faatatau i faiga faapisinisi. Peitaʻi, e mafai ona faaaogā mataupu silisili a le Tusi Paia o se faavae i le faia o faaiʻuga saʻo. Ua taʻua i vala e ono o loo mulimuli mai faiga faapisinisi e faaalia ai le faamaoni:

Tautala Saʻo

Mataupu Silisili: “Aua le pepelo le tasi i le isi.”—Kolose 3:9.

Faamoemoeina

Mataupu Silisili: “A ia avea la outou upu o le Ioe, ia Ioe; ma le Leai, ia Leai.”—Mataio 5:37.

Maufaatuatuaina

Mataupu Silisili: “Aua e te faailoa mataupu faalilolilo a se tasi.”—Faataoto 25:9.

Faamaoni

Mataupu Silisili: “Aua e te talia se foaʻi e faia i faiga faaalatua, auā o foaʻi faapena e faatauasoina ai tane atamamai.” —Esoto 23:8.

Aua le Faaʻauʻau

Mataupu Silisili: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.”—Mataio 7:12.

Usitaʻi i Tulafono

Mataupu Silisili: “Ia avatu i tagata uma mea e tatau iā i latou, ia totogi atu le lafoga i lē ua tatau i ai le lafoga.”—Roma 13:7.

[Pusa/Ata i le itulau 9]

Le Auala e Tausia ai Lou Faamaoni i Faiga Faapisinisi

● Ia Iloa Mea e Sili Ona Tāua iā te Oe. Mo se faaaʻoaʻoga, o le ā le tāua iā te oe o le mauaina o le tele o le tamaoaiga pe a faatusatusa i le faatumauina o se tulaga lelei ma le Atua?

● Ia Fuafua Mamao. Ia iloa mamao tulaga e luʻia ai lou faamaoni, ma fuafua lelei le auala o le a e tali atu ai.

● Ia Faailoa Atu Lou Tulaga. I le amataga o se faiga paaga i se pisinisi fou, ia faailoa atu ma le faautauta i isi au tapulaa.

● Saʻili se Fesoasoani Mai i Isi. Pe a fesagaʻia se tofotofoga po o se faafitauli e te lē mautonu i ai, ia fesili atu mo se fautuaga mai i se tasi e tutusa mea e te lua faatāuaina.

[Ata i le itulau 8]

Pe afai e te faamaoni, o le a e maua le filemu o le mafaufau