Omiga Ina ia Lē Faamaoni

“O le faamaoni i faiga faapisinisi e mo aso ua teʻa, e lē o toe aogā i aso nei, ma o i latou o loo taumafai ia faamaoni, e mautinoa e lē taulau a latou pisinisi.”—Stephen, Amerika.

PE E te ioe i lenā manatu? E moni e tele faamanuiaga e maua mai i le lē faamaoni—ae e mo na o sina taimi. O le iʻuga, o i latou e taumafai e faamaoni, ua tuua i latou i ni tulaga e matuā omia ai i vala eseese o loo mulimuli mai.

Tofotofoga Tau i le Tagata Lava Ia. O ai sē e lē fiafia pe a maua ni tupe se tele po o mea mananaia i le olaga? Pe a maua le avanoa e maua ai ni mea i se auala lē faamaoni, e faigatā lava ona teena.

● “O aʻu ou te filifilia konekarate e manumalo i tauofoga i laʻu kamupani. E masani lava la ona ofo mai e tagata tupe i auala faatogafalea. O le mauaina o tupe i se auala faigofie faapena o se mailei.”—Franz, Sasaʻe Tutotonu.

Omiga ia Faaitiitia Tupe Faasili. I ni nai tausaga talu ai nei, sa tauivi ai le tele o pisinisi i le lalolagi aoao ma le paʻū maulalo o le tamaoaiga. E ao foʻi ona latou fesagaʻia le televave o fesuiaʻiga o faiga faatekinolosi, ma le faateteleina o faiga faatauvaga i vaipanoa o iai faapea le lalolagi aoao. Atonu la e manatu tagata e pau le auala e faataunuu ai sini o loo faataatitia e pule ma ē e ana kamupani, o le lē faamaoni.

● “Ua matou manatu e fai so o se mea lava e ao ona fai. . . . Auā a leai o le a gau le kamupani.”—Reinhard Siekaczek, na lokaina ona o faiga faatogafalea.—The New York Times.

Omiga Mai i Isi. Atonu o nisi taimi e fai atu ai pe tauanau foʻi oe e tagata e tou te faigaluega faatasi po o tagata faatau, ia auai faatasi ma i latou i faiga lē faamaoni.

● “Na sau se pule o se kamupani autū o loo faatau mai iā i matou ma faapea mai, o le a lē toe iai sa matou faiga paaga faapisinisi pe afai e lē avatua lana ʻvaega o le pisinisi,’ o se isi faaupuga o tupe e avatu faaalatua.”—Johan, Aferika i Saute.

Aganuu. I nisi o aganuu, o se faiga masani mo le sainia o maliega faapisinisi, le faafesuiaʻi o ni meaalofa. Afai e telē tele le meaalofa, o le a faigatā la ona tausia tapulaa o le faamaoni i faiga faapisinisi. I le tele o atunuu, e tāpā ai e ofisa o le malo tupe a o leʻi faatinoina la latou auaunaga ina ia maua ai ni faiga faapitoa.

● “E masani lava ona avea ma luʻi le iloaina o le eseesega o meaalofa, ma tupe e maua mai i faiga faatogafalea.”—Viliamu, Kolomepia.

Siʻomaga. O i latou o loo fesagaʻia tulaga ogaoga o le mativa pe nonofo i atunuu e leaga pulega faalemalo, ua feagai ma omiga e sili atu ona faigatā. O na ituaiga o siʻomaga, atonu e manatu i ē e faamaoni pe mumusu e gāoi, o ni tagata matitiva ma e lē tausia lelei o latou aiga.

● “Ua manatu i le lē faamaoni o se tulaga masani, e talafeagai, ma e taliaina, ae aua lava neʻi maua oe.”—Tomasi, Congo Kinshasa.

Māfuaaga o le Leai o se Faamaoni

E telē le aafiaga o le omiga ia lē faamaoni. Na lipotia mai i se suʻesuʻega na faia i pule o pisinisi i Ausetalia e faapea, e iva mai le toʻasefulu ua manatu i faiga faatogafalea ma piʻopiʻo e “sesē ae e lē mafai ona ʻalofia.” O i latou na suʻesuʻeina na faapea mai e latou te lotomalilie e ʻalofia tapulaa  tau amio, ina ia manumalo ai i se konekarate pe maua ai ni tupe faasili a le kamupani.

Peitaʻi o ē e lē faamaoni e masani ona vāai iā i latou lava o ni tagata faamaoni. E faapefea la ona toe faaleleia lo latou talaaga sa iai muamua ma a latou amioga? Na lipotia mai i le Journal of Marketing Research e faapea: “E amio lē faamaoni tagata ina ia maua polofiti, ae ua manatu o loo lelei pea lo latou talaaga.” Ina ia faaitiitia le lē lelei o o latou lotofuatiaifo, ua faia ai e tagata faamolemolega, faaitiitia, pe taʻutonuina lo latou lē faamaoni i ni auala eseese.

Mo se faaaʻoaʻoga, e ono faamatalaina le lē faamaoni i ni faaupuga e faapea o se amioga e lē matuiā tele. O le pepelo po o le faaʻoleʻole ua avea o se “togafiti” po o se “faiga faatauvaga.” E ono faamatalaina tupe e maua i faiga faatogafalea, ua na o se “meaalofa” po o se “auala faavavevave.”

O isi e faia faamolemolega o na ituaiga amioga e ala i le toe faauigaina o le upu, faamaoni. Na mātauina e Toma, o sē e faigaluega i le matagaluega tautupe e faapea: “O le manatu o tagata i le faamaoni, e uiga e faapea e so o se mea e mafai ona sao mai ai mai i le tulafono nai lo o le mea moni.” Na faapea mai Tavita, o sē sa avea ma pule sili o se kamupani: “E ui o le lē faamaoni e matagā pe a faaalialia, ae e vaai i ai o se mea e taliaina pe a mafai ona sao mai ai. O tagata e sao mai, e manatu i ai e atamamai i mea ua latou ʻausia.’”

E toʻatele ua manatu e manaʻomia ona lē faamaoni ina ia taulau manuia ai. Na faapea mai se tagata ua leva ona faipisinisi: “O uiga faatauvaga e masani ona uunaʻia ai tagata e faapea mai, ʻFai le mea e te mafaia ina ia manumalo ai i se konekarate mo se galuega.’” Ae pe e moni lenā manatu? Po o ē o taumafai e taʻutonuina le lē faamaoni ua ʻfaasesēina i latou i o outou lava manatu sesē’? (Iakopo 1:22) Manatu i faamanuiaga e maua ona o le faamaoni, lea o le a taʻua i le mataupu e sosoo mai.

[Faamatalaga faaopoopo i le itulau 5]

“O le manatu o tagata i le faamaoni, e uiga e faapea e so o se mea e mafai ona sao mai ai mai i le tulafono nai lo o le mea moni”

[Ata i le itulau 5]

E toʻatele ua manatu e manaʻomia ona lē faamaoni ina ia taulau manuia ai