Pe a E Manatu e Pule i Lou Ola

I TAUSAGA taʻitasi, e faitau sefulu afe tagata i le Iunaite Setete e taumafai e pule i o latou ola. Ua taʻua i le Tusi Paia le pogai autū e māfua ai ona oo i le toʻatele lagona faapena. O loo taʻua ai ua tatou ola i “aso e sili ona faigatā.” E toʻatele tagata e lē o gafatia le tele o omiga ma faigatā o le olaga. (2 Timoteo 3:1; Failauga 7:7) Pe a lofitūina se tagata i popolega o le olaga, e ono manatu o ia o le pule i le ola o se auala vave lea e mapu ai mai i mafatiaga. O le ā e mafai ona e faia pe a oo iā te oe na ituaiga o mafaufauga?

E lē na o Oe o Tupu ai Faafitauli!

E ui o lou tulaga e foliga mai e leai se vaifofō, ae ia manatua e lē na o oe e iai na lagona, ma e faanoanoa ona e toetoe lava o tagata uma o loo onosaia isi ituaiga faafitauli eseese i aso nei. Ua faapea mai le Tusi Paia: “O loo ōi faatasi pea ma  tigā faatasi foafoaga uma.” (Roma 8:22) Mo sina taimi atonu e te manatu e lē mafai ona foʻia le faafitauli, peitaʻi e masani lava e umi se taimi e faaalu e faaleleia ai tulaga o mea a o faagasolo taimi. O lea la, o le ā e mafai ona fesoasoani i lenei tulaga?

Faamatala atu ou faalogona i se uō taʻumatuaina ma maufaatuatuaina. Ua taʻua i le Tusi Paia: “O le uō moni e alofa i taimi uma, ma o ia o se uso ua fanau mo taimi o puapuaga.” (Faataoto 17:17) O loo faamatalaina i le Tusi Paia le tagata amiotonu o Iopu, na ia faailoa atu i isi ona faalogona a o faagasolo taimi o ona mafatiaga. Ina ua ia lagona le ʻʻinoʻino i lona ola,’ na ia faapea mai: “Ou te faailoa atu oʻu popolega iā te aʻu lava. Ou te tautala atu foʻi i le tigā o loʻu loto!” (Iopu 10:1) O le faailoa atu i isi o ou popolega e mafai ona faaitiitia ai le mamafa o ou faalogona mafatia, ma e ono mafai ona toe suia ai lou manatu i le faafitauli o loo e fesagaʻia. *

Sasaa atu lou loto i le Atua e ala i le tatalo. O nisi e manatu o le tatalo ua na o se toomaga e tau ina mapu i ai le mafaufau, peitaʻi, e lē o le manatu lenā o le Tusi Paia. Ua taʻua i le Salamo 65:2 o Ieova le Atua o le “Faafofoga tatalo,” ma ua taʻua i le 1 Peteru 5:7: “O loo manatu mamafa mai o ia iā te outou.” O loo faamamafa pea i le Tusi Paia le tāua o le faalagolago atu i le Atua. Mo se faaaʻoaʻoga:

“Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala.”—FAATAOTO 3:5, 6.

“E faia e [Ieova] o mea e mananaʻo ai i latou o ē e matataʻu iā te ia, e faafofoga foʻi o ia i a latou alaga, ma ia faaolaina i latou.”—SALAMO 145:19.

“O le mea lenei ua tatou mautinoa ai i le Atua, po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.”—1 IOANE 5:14.

“E mamao Ieova mai i ē e amioleaga, ae faafofoga o ia i le tatalo a ē e amiotonu.”—FAATAOTO 15:29.

 Pe a e faailoa atu i le Atua faigatā o loo e fesagaʻia, o le a ia saunia le fesoasoani. Ua talafeagai ai la le faalaeiauina o oe e le Tusi Paia ia ʻfaatuatua atu iā te ia i taimi uma. Ia sasaa atu iā te ia mea o loo i lou loto.’—Salamo 62:8.

Pe a Manaʻomia se Mea e Sili Atu

Ua faaalia i suʻesuʻega na faia, o le toʻatele o tagata na pule i o latou ola, sa iai se talaaga o le lotomafatia mo se taimi umi. * O lenei mea ua faamamafa ai le talafeagai ona vaai se fomaʻi mo se togafitiga. Atonu e faatonuina mai e le fomaʻi ni fualaau pe talosaga mai e faia ni fetuutuunaʻiga i meaʻai o loo e taumafaina. I nisi o tulaga, o le iai o se polokalame o le faamalositino, o se suiga aogā lea mai i togafitiga. Ua faamaonia le aogā i le toʻatele o le vaaia o se fomaʻi faapitoa. *

O loo maua i le Tusi Paia le tele o faamatalaga e mafai ona e maua ai le lagolagosua ma le faamoemoe. Mo se faaaʻoaʻoga, ua taʻua i le Faaaliga 21:4 e faatatau iā Ieova: “E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.” O se folafolaga lenei mai i le Atua, ma pe a mafaufau loloto i ai e mafai ona e maua ai le mapusaga.

O loo faasoa atu e Molimau a Ieova lenei faamoemoe e faavae mai i le Tusi Paia, i le faitau miliona o tagata i le lalolagi aoao. O le iʻuga, e toʻatele ua latou maua le faamoemoe moni a o feagai ai ma taimi o mafatiaga. Mo nisi faamatalaga, faafesootaʻi Molimau a Ieova i lou vaipanoa e ala i le asiasi atu i le Maota mo Sauniga, pe tusi atu i le tuatusi talafeagai o loo i le itulau e 5 o lenei mekasini. E mafai foʻi ona e tagaʻi i la matou tuatusi i le Initaneti i le www.watchtower.org.

[Faaopoopoga i lalo]

[Pusa i le itulau 10]

FESOASOANI MAI I LE TUSI PAIA

● “Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.”—Filipi 4:6, 7.

● “Na ou fesili atu iā Ieova, ona tali mai lea o ia iā te aʻu, na ia laveaʻiina foʻi aʻu mai i mea uma na ou fefe ai.”—Salamo 34:4.

● “E latalata mai Ieova iā i latou o ē e lotomomomo; ma e faaola e ia i latou o ē ua loto nutimomoia.”—Salamo 34:18.

● “Ua faamālōlō e ia o ē ua lotomomomo, ma fusifusia o latou manuʻa tigā.”—Salamo 147:3.

[Pusa i le itulau 11]

PE A E MAFAUFAU E PULE I LE OLA . . .

Ia faailoa atu ou faalogona i se uō maufaatuatuaina

Sasaa atu lou loto i le Atua e ala i le tatalo

Saʻili togafitiga faafomaʻi

[Pusa i le itulau 12]

MO UŌ MA AIGA

O tagata o le aiga ma uō vavalalata, e masani lava o i latou ia e muamua iloaina o loo mafaufau se tagata o loo mafatia e pule i lona ola. O le vave faia o se gaoioiga e mafai ona laveaʻiina ai le ola o lenā tagata! Ia avea oe o sē e faalogologo lelei. Ia e amanaʻia le moni o faigatā o loo ia fesagaʻia. Ua taʻua i le Tusi Paia: “Ia faamāfanafana i ē mafatia.” (1 Tesalonia 5:14) Ia faalaeiau atu i lē o loo mafatia ia saʻili se fesoasoani, ma pe a talafeagai, ia faamautinoa ua ia maua lenā fesoasoani.